COVID-19
អន្តរជាតិ
ផ្នែកខ្លះរបស់ប៉េកាំងត្រូវបិទ ក្រោយរកឃើញករណីឆ្លង COVID-19 ថ្មីបន្តបន្ទាប់ ប៉ូលិសចិនឈរយាមផ្លូវចូលផ្សារ Xinfadi ដែលត្រូវបិទ។ រូបភាព AFP
× ផ្នែកខ្លះនៃរដ្ឋធានីប៉េកាំង ប្រទេសចិន ត្រូវបានដាក់ឲ្យស្ថិតក្រោមការរឹតត្បិតនៅថ្ងៃទី១៣ ខែមិថុនានេះ បន្ទាប់ពីករណីឆ្លងជំងឺ COVID-19 ត្រូវបានរកឃើញជាបន្តបន្ទាប់។ ផ្សារលក់ដុំទំនិញកសិកម្មមួយកន្លែងក៏ត្រូវបានបិទដែរ ដោយអាជ្ញាធរសង្ស័យថា អាចជាកន្លែងចម្លងជំងឺផ្លូវដង្ហើមមួយនេះ។ អាជ្ញាធរក្រុងប៉េកាំង ក៏បានពន្យារពេលចូលរៀនដែលគ្រោងចាប់ផ្ដើមនៅដើមសប្ដាហ៍ក្រោយផងដែរ។
ប្រជាជនចិនតំបន់លំនៅដ្ឋានចំនួន១១ ក្នុងខណ្ឌ Fengtai ភាគខាងត្បូងទីក្រុងប៉េកាំង ត្រូវបានហាមឃាត់មិនឲ្យចេញពីផ្ទះរបស់ពួកគេ បន្ទាប់ការផ្ទុះឡើងករណីឆ្លងជំងឺ COVID-19 ដែលត្រូវបានជឿថា ឆ្លងចេញពីទីផ្សារមួយកន្លែងឈ្មោះ Xinfadi ។ នេះបើតាមការបញ្ជាក់របស់មន្ត្រីទីក្រុងប៉េកាំងក្នុងសន្និសីទសារព័ត៌មានថ្ងៃទី១៣ ខែមិថុនា។
ទីក្រុងប៉េកាំង ប្រកាសពីករណីឆ្លង COVID-19 ថ្មីក្នុងពេលជាច្រើនសប្ដាហ៍កាលពីថ្ងៃទី១១ ខែមិថុនា។ អ្នកជំងឺ ធ្លាប់ធ្វើដំណើរទៅកាន់ផ្សារ Xinfadi ហើយមិនធ្លាប់ចេញទៅក្រៅប៉េកាំងឡើយនារយៈពេលចុងក្រោយ។ ករណីឆ្លងចំនួន៦ទៀត ក៏ត្រូវបានរាយការណ៍នៅថ្ងៃទី១៣ ខែមិថុនា ក្នុងនោះបីនាក់ជាកម្មករក្នុងផ្សារ ម្នាក់ជាអ្នកដើរផ្សារ និងពីរនាក់ទៀតជាបុគ្គលិកមជ្ឈមណ្ឌលស្រាវជ្រាវសាច់សត្វដែលនៅចម្ងាយ៧គីឡូម៉ែត្រពីផ្សារ ប៉ុន្តែបុគ្គលិកធ្លាប់ទៅផ្សារ Xinfadi កាលពីសប្ដាហ៍មុន។
ក្រោយការរកឃើញករណីឆ្លងនេះ អាជ្ញាធរទីក្រុងប៉េកាំង ក៏សម្រេចចិត្តបិទផ្សារនេះ និងផ្សារគ្រឿងសមុទ្រមួយកន្លែងទៀតដែលអ្នកជំងឺធ្លាប់ទៅ ដើម្បីបាញ់សម្លាប់មេរោគ និងប្រមូលសំណាកដើម្បីធ្វើតេស្ត។ សាលារៀនចំនួន៩ដែលនៅក្បែរនោះ ក៏ត្រូវបានបិទ ហើយការចូលរៀនរបស់សាលាបឋមទូទាំងប៉េកាំង ត្រូវបានលើកពេល ព្រមគ្នានឹងសកម្មភាពកីឡា និងដំណើរកម្សាន្តលក្ខណៈជាក្រុមផងដែរ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ជាមួយគ្នានោះ អាជ្ញាធរ ក៏បើកយុទ្ធនាការធ្វើតេស្តទ្រង់ទ្រាយធំដើម្បីកំណត់ករណីឆ្លង។ លទ្ធផលបង្ហាញ កម្មករផ្សារចំនួន៤៦មានលទ្ធផលវិជ្ជមានក្រោយការធ្វើតេស្តសំណាកយកពីបំពង់ក។ មន្ត្រីចិនអះអាងថា ករណី៤៦នាក់ មិនបានបញ្ចេញរោគសញ្ញាឡើយ ហើយពេលនេះកំពុងស្ថិតក្រោមការត្រួតពិនិត្យសុខាភិបាល៕
© រក្សាសិទ្ធិដោយ thmeythmey.com