ភ្នំពេញ៖ លោក ស្រ៊ុន ពៅ ប្រធានសមាគមចិញ្ចឹមសត្វកម្ពុជាអះអាងថា លោកនឹងជួបម្ចាស់ក្រុមហ៊ុននាំចូលជ្រូកក្នុងសប្ដាហ៍នេះ ដើម្បីស្នើឲ្យបញ្ចុះតម្លៃជ្រូករស់ត្រឹម១២០០០រៀលក្នុងមួយគីឡូក្រាម ដើម្បីសម្រួលដល់អ្នកបរិភោគសាច់។ ជាមួយគ្នានេះ លោក សាន់ ចាន់ថេត ប្រធានសមាគមផ្គត់ផ្គង់ជ្រូកកម្ពុជា បានស្នើឲ្យស្ថាប័នជាតិទប់ស្កាត់ការក្តោបក្តាប់តម្លៃទីផ្សារពីសំណាក់ក្រុមហ៊ុនដែលនាំចូលផ្តាច់មុខ។
បន្ទាប់ពីលោក វេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទ ស្នើឲ្យមានការសម្រួលតម្លៃជ្រូកនៅលើទីផ្សារ ប្រធានសមាគមចិញ្ចឹមសត្វកម្ពុជា បានជួបពិភាក្សាជាមួយម្ចាស់កសិដ្ឋានធំៗក្នុងស្រុក ដោយឯកភាពក្នុងតម្លៃ១២០០០រៀលក្នុង១គីឡូក្រាម។ «ខណៈដែលម្ចាស់កសិដ្ឋានក្នុងស្រុកយល់ព្រម យើងក៏បានការឯកភាពផងដែរពីបណ្តាក្រុមហ៊ុននាំចូល។ ខ្ញុំកំពុងព្យាយាមទាក់ទងពួកគាត់ ធ្វើយ៉ាងណាដោះស្រាយឲ្យបានតាមអ្វីដែលសមាគមបាននិយាយ ខិតខំធ្វើឲ្យតម្លៃជ្រូករស់នៅត្រឹម១២០០០រៀល តាមការណែនាំពីក្រសួងកសិកម្ម»។ នេះជាការបញ្ជាក់របស់លោក ស្រ៊ុន ពៅ តាមទូរសព្ទមកកាន់សារព័ត៌មានថ្មីៗ។
លោកបានបញ្ជាក់ថា តម្លៃជ្រូកឡើងថ្លៃ ដោយសារតម្លៃនាំចូលពីថៃ គឺ១២០០០រៀលក្នុងមួយគឺឡូក្រាមរួចស្រាប់ទៅហើយ ទើបធ្វើតម្លៃក្នុងស្រុកឡើងដល់ជាង១៤០០០ក្នុងមួយគីឡូក្រាម។
ក្រៅពីនេះ លោក ស្រ៊ុន ពៅ ក៏យល់ឃើញដូចក្រសួងកសិកម្មលើកឡើងក្នុងសេចក្ដីប្រកាសព័ត៌មានដែរ ថាជ្រូកឡើងថ្លៃ ដោយសារដំណាក់កាលផ្ទុះកូវីដ-១៩ កម្មវិធីផ្សេងៗត្រូវផ្អាក ធ្វើឲ្យអាជីវករលក់បានតែសាច់សុទ្ធ។ ចំណែក ឆ្អឹងជ្រូក ជើង និងគ្រឿងក្នុង មិនបានប្រើអស់លទ្ធភាពទេ ដូច្នេះអាជីវករអាចរកប្រាក់ចំណេញបាន ដោយបូកតម្លៃទាំងអស់លើសាច់។
ចំពោះលោក សាន់ ចាន់ថេត ប្រធានសមាគមផ្គត់ផ្គង់ជ្រូកកម្ពុជា បញ្ហាចម្បងនៃតម្លៃជ្រូកដែលឡើងថ្លៃនោះ គឺការនាំចូលផ្តាច់មុខរបស់ក្រុមហ៊ុនមួយ ដែលបានប្រមូលផ្ដុំសិទ្ធិនាំចូលជ្រូកពីក្រុមហ៊ុនផ្សេងទៀត ដើម្បីក្ដោបក្ដាប់តម្លៃទីផ្សារជ្រូក។ ជាដំណោះស្រាយលោកថា ទាល់តែបំបែកការប្រមូលផ្ដុំសិទ្ធិនាំចូលជ្រូកនេះ។
«ដោះស្រាយបញ្ហាតម្លៃទីផ្សារឡើងខ្ពស់នេះបាន គឺបំបែកការប្រមូលផ្ដុំការនាំចូលជ្រូក ធ្វើឲ្យមានទីផ្សារសេរី មានការប្រកួតប្រជែងតម្លៃគ្នា គឺលែងមានអ្នកក្ដោបក្ដាប់តម្លៃទីផ្សារហើយ។ ហើយរឿងនេះ បើក្រសួងកសិកម្មតាំងចិត្តធ្វើ គឺដោះស្រាយបានហើយ ព្រោះលោកជាអ្នកធ្វើការលើរឿងនេះ»។ នេះបើតាមការលើកឡើងរបស់ លោក ចាន់ថេត ដោយបន្ថែមថា គិតត្រឹមថ្ងៃទី១៥ ខែមិថុនានេះ តម្លៃជ្រូករស់គឺ ១៣៦០០រៀល ក្នុងមួយគីឡូក្រាម។
ទន្ទឹមនឹងនេះ ប្រធានសមាគមផ្គត់ផ្គង់ជ្រូកកម្ពុជារូបនេះអះអាងថា លោករង់ចាំមើលដំណោះស្រាយរបស់ក្រសួងកសិកម្ម បើគ្មានដំណោះស្រាយ លោកនឹងរៀបចំសំណុំរឿងប្ដឹងទៅអង្គភាពប្រឆាំងអំពើពុករលួយ(ACU)។
ជុំវិញការសង្ស័យពីអំពើពុករលួយនេះ ក្រសួងកសិកម្ម បានចេញសេចក្ដីប្រកាសព័ត៌មាននៅរសៀលថ្ងៃទី៩ មិថុនា បកស្រាយថា ការនាំចូលជ្រូកពីក្រៅប្រទេស មិនពាក់ព័ន្ធនឹងអំពើពុករលួយឡើយ។ ការបកស្រាយនេះ ធ្វើឡើងភ្លាមៗ បន្ទាប់ពីសន្និសីទសារព័ត៌មានរបស់សមាគមផ្គត់ផ្គង់ជ្រូកកម្ពុជារៀបចំឡើងនៅព្រឹកថ្ងៃទី៩ មិថុនា ពីតម្លៃជ្រូកឡើងថ្លៃ ដែលប្រធានសមាគមបានលើកពីបញ្ហាប្រមូលផ្ដុំការនាំចូលជ្រូកនិងសង្ស័យថា មានអំពើពុករលួយ៕