អ្នកសារព័ត៌មានហ្វីលីពីនល្បីឈ្មោះ អ្នកស្រី Maria Ressa ត្រូវបានតុលាការរកឃើញទោសកំហុស ដែលប្រឈមជាប់គុកដល់ទៅ៦ឆ្នាំ នៅថ្ងៃទី១៥ ខែមិថុនា ក្នុងរឿងក្តីសរសេរបរិហារកេរ្តិ៍តាមប្រព័ន្ធអនឡាញ (cyber libel)។ សម្រាប់ករណីអ្នកស្រី Ressa សកម្មជនទាមទារសេរីភាពសារព័ត៌មាន បានហៅទង្វើនេះថា គឺជាការរៀបចំលុបបំបាត់ការរិះគន់លើប្រធានាធិបតី រ៉ូឌ្រីហ្គោ ឌូទើតេ ។
ស្ត្រីអ្នកសារព័ត៌មានដែលមានឈ្មោះបោះសំឡេងល្បីល្បាញ អ្នកស្រី Ressa និងវេបសាយព័ត៌មានអ្នកស្រី Rappler បានប្រឈមមុខចំណាត់ការច្បាប់ និងការស៊ើបអង្កេត ក្រោយចុះផ្សាយអត្ថបទរិះគន់គោលនយោបាយលោកប្រធានាធិបតី ឌូទើតេ ជាអាទិ៍ សង្គ្រាមប្រឆាំងគ្រឿងញៀនលោក ដែលសម្លាប់មនុស្សរាប់ពាន់នាក់។
តាមការចុះផ្សាយរបស់ទីភ្នាក់ងារព័ត៌មានAFP អ្នកស្រី Ressa ប្រឈមជាប់ពន្ធនាគារចាប់ពី ៦ ខែដល់ ៦ ឆ្នាំ ។ ទោះជារកឃើញទោសបែបនេះ តុលាការអនុញ្ញាតឲ្យអ្នកស្រីនៅក្រៅឃុំបណ្តោះអាសន្នរង់ចាំការប្តឹងឧទ្ធរណ៍។ តាមសេចក្តីសម្រេចតុលាការ អ្នកស្រី Ressa និងអតីតអ្នកព័ត៌មាន Rappler ម្នាក់ទៀត លោក Reynaldo Santos ដែលសរសេរអត្ថបទរិះគន់នោះ ត្រូវបង្គាប់ឲ្យបង់ប្រាក់ខូចខាតចំនួន ៨០០០ដុល្លារ។
«យើង នឹងឈរតតាំងទល់នឹងការវាយប្រហារគ្រប់បែបយ៉ាងដែលប្រឆាំងសេរីភាពសារព័ត៌មាន»។ អ្នកស្រី Ressa ប្រាប់អ្នកសារព័ត៌មានបែបនេះ ក្រោយការកាត់ទោសក្នុងរដ្ឋធានី ម៉ានីល ។
សាលក្រមនៅថ្ងៃចន្ទនេះ បានសម្រេចលើរឿងក្តីដែលកើតចេញពីការប្ដឹងតវ៉ាឆ្នាំ២០១៧របស់អ្នកជំនួញម្នាក់ជុំវិញអត្ថបទព័ត៌មានរបស់វេបសាយព័ត៌មានហ្វីលីពីន Rapper កាលពី៥ឆ្នាំមុន ពាក់ព័ន្ធទំនាក់ទំនងលោកជាមួយតុលាការជាន់ខ្ពស់របស់ប្រទេសហ្វីលីពីន។
អ្នកស្រី Ressa ដែលជាប់ឈ្មោះក្នុងបញ្ចី «បុគ្គលឆ្នើមប្រចាំឆ្នាំ២០១៨» របស់ទស្សនាវដ្តីអាមេរិក Time ពុំបានសរសេរអត្ថបទនេះ ហើយភ្នាក់ងារស៊ើបអង្កេតរបស់រដ្ឋាភិបាលហ្វីលីពីន ពីដំបូងឡើយ បានច្រានចោលបណ្ដឹងរបស់អ្នកជំនួញហ្វីលីពីនរូបនោះ។ ក៏ប៉ុន្តែ រដ្ឋអាជ្ញាហ្វីលីពីន ក្រោយមក បានសម្រេចចោទប្រកាន់ប្រឆាំងអ្នកស្រី និងសហការីអ្នកស្រី ដោយផ្អែកលើច្បាប់ឧក្រិដ្ឋកម្មអ៊ីនធឺណិត ដែលមានគោលដៅដាក់ទោសលើបទល្មើសតាមអនឡាញដូចជា រឿងអាសអាភាសកុមារជាដើម។
អ្វីដែលគួរឲ្យចាប់អារម្មណ៍ ច្បាប់ដែលហ្វីលីពីនប្រើចោទអ្នកស្រី Ressa និងអតីតសហការី បានចូលជាធរមានក្នុងខែកញ្ញា ឆ្នាំ២០១២ ពោលគឺប៉ុន្មានខែប៉ុណ្ណោះក្រោយអត្ថបទនេះត្រូវបានចុះផ្សាយ។ ទោះជាបែបនេះក្តី រដ្ឋាភិបាលលោកឌូទើតេ ធ្លាប់អះអាងថា ករណីអ្នកស្រី Ressa សហស្ថាបនិកម្នាក់នៃវេបសាយ Rappler និងជាអតីតអ្នកព័ត៌មាន CNN រូបនេះ ពុំមានចរិតនយោបាយឡើយ ហើយអាជ្ញាធរត្រូវតែអនុវត្តច្បាប់នេះ។
ទាក់ទិនបញ្ហានេះ ក្រុមសិទ្ធិមនុស្សនិងសកម្មជនទាមទារសេរីភាពសារព័ត៌មាន បញ្ជាក់ថា បទចោទបរិហារកេរ្តិ៍នេះជាមួយនឹងសំណុំរឿងពន្ធដារប្រឆាំងវេបសាយ Rappler និងវិធានការរដ្ឋាភិបាលហ្វីលីពីនដកហូតអាជ្ញាបណ្ណ គឺជាការបៀតបៀនរដ្ឋ។ បើតាម AFP អង្គការលើកលែងទោសអន្តរជាតិ បញ្ជាក់ថា ការវាយប្រហារលើសារព័ត៌មាន Rappler គឺជាផ្នែកមួយនៃការបង្ក្រាបរដ្ឋាភិបាលប្រឆាំងសេរីភាពសារព័ត៌មាន៕