ក្រុងប៉េកាំង ដកមន្ត្រីមួយចំនួន បន្ទាប់ពីទប់ស្កាត់ COVID-19 មិនបានល្អ

COVID-19

អន្តរជាតិ

ក្រុងប៉េកាំង ដកមន្ត្រីមួយចំនួន បន្ទាប់ពីទប់ស្កាត់ COVID-19 មិនបានល្អ

15, Jun 2020 , 9:59 pm

រូបភាព

ផ្សារលក់បោះដុំ Xinfadi។ រូបភាព៖ Reuters

ដោយ: ធៀន ភារិន្ទ

ទីក្រុងប៉េកាំង បានដកមន្ត្រីមួយចំនួនចេញពីតំណែង បន្ទាប់ពីគ្រប់គ្រង និងទប់ស្កាត់ការរាតត្បាតនៃ COVID-19 មិនបានល្អ ខណៈករណីឆ្លងថ្មីបានកើនឡើងក្នុងរដ្ឋធានី។ ករណីឆ្លងCOVID-19 ថ្មីនេះ គឺទាក់ទងនឹងផ្សារបោះដុំផលិតផលកសិកម្ម Xinfadi ។ នេះបើតាមការចុះផ្សាយរបស់សារព័ត៌មាន Beijing Daily នៅថ្ងៃទី១៥ ខែមិថុនា។

អត្ថបទទាក់ទង

ប៉េកាំង គ្រោងធ្វើតេស្តទ្រង់ទ្រាយធំ បន្ទាប់ពីមានករណីឆ្លងCOVID-19 កើនឡើងថ្មី

បន្ទាប់ពីមានករណីឆ្លងជាចង្កោមនៅក្នុងទីក្រុង រដ្ឋបាលក្រុងប៉េកាំង បានសម្រេចដកតំណែងមន្ត្រីជាច្រើនរូប ដោយផ្អែកលើហេតុផលទប់ស្កាត់ និងគ្រប់គ្រង COVID-19 មិនបានល្អ។ ការដកតំណែងនេះ បានកើតឡើងលើ លោក Zhou Yuqing ចៅសង្កាត់រង សង្កាត់Fengtai បន្ទាប់ពីទីក្រុងប៉េកាំងមានករណីឆ្លង COVID-19 ជាច្រើនករណី ។

មិនត្រឹមតែចៅសង្កាត់រងទេ បុគ្គលផ្សេងទៀត ក៏ត្រូវគេដកតំណែងដែរ។ បើតាមការចុះផ្សាយរបស់សារព័ត៌មាន Beijing Daily លោក Wang Hua លេខាធិការបក្សកុម្មុយនិស្តចិន នៃតំបន់ Huaxiang Town ក្នុងសង្កាត់ Fengtai និងលោក Zhang Yuelin អ្នកគ្រប់គ្រងទូទៅនៃក្រុមហ៊ុនផ្សារលក់ដុំផលិតផលកសិកម្ម Xinfadi ក៏ត្រូវគេដកតំណែងដែរ។

ផ្សារលក់បោះដុំ Xinfadi ដែលមានលក់ផលិតផលផ្លែឈើ បន្លែ សាច់ជាដើម ត្រូវបានគេបិទហើយ បន្ទាប់ពីមានករណីឆ្លង COVID-19 ជាបណ្តុំ។ បន្ថែមពីលើនេះ រដ្ឋបាលក្រុងប៉េកាំង បានបិទតំបន់មួយផ្នែកទៀតនៅក្នុងទីក្រុងប៉េកាំង ដោយរួមបញ្ចូលកន្លែងមួយចំនួនទៀតនៅជិតផ្សារ Xinfadi ។ ចំណែកសាលារៀននៅក្នុងតំបន់ក្បែរផ្សារ ក៏ត្រូវគេបិទដែរ។

គិតមកត្រឹមពេលនេះ ករណីឆ្លង ដែលមានទាក់ទងនឹងផ្សារបោះដុំXinfadi បានកើនឡើងដល់ ៧៥ករណីហើយ។ តួលេខសរុប COVID-19 របស់ចិន បានកើនដល់ប្រមាណ ៨៣១៨១ករណី អ្នកស្លាប់ចំនួន ៤៦៣៤នាក់ និងអ្នកជាសះស្បើយមានចំនួន ៧៨៣៧០នាក់៕