COVID-19
ជាតិ
COVID-19៖ ពលរដ្ឋខ្មែរជាប់គាំងនៅម៉ាឡេស៊ី ជាង១២០នាក់ នឹងមកកម្ពុជាវិញ នៅថ្ងៃទី១៦ មិថុនា
ពលរដ្ឋខ្មែរដែលជាប់គាំងនៅព្រលានយន្តហោះកូឡាឡាំពួរ ប្រទេសម៉ាឡេស៊ី កាលពីថ្ងៃទី៧ ខែមេសា ឆ្នាំ២០២០ (រូបពីស្ថានទូតកម្ពុជាប្រចាំនៅម៉ាឡេស៊ី)
×![]()
ភ្នំពេញ៖ បើគ្មានអ្វីប្រែប្រួលទេ! ពលរដ្ឋខ្មែរជាប់គាំងនៅម៉ាឡេស៊ីជាង១២០នាក់ នឹងមកដល់កម្ពុជា នៅថ្ងៃទី១៦ មិថុនា តាមរយៈការសម្របសម្រួលរវាងរដ្ឋាភិបាលទាំងពីរ។ ពលរដ្ឋខ្មែរទាំងនោះ បានជាប់គាំងនៅម៉ាឡេស៊ី អស់រយៈពេលជាងពីរខែមកហើយ ដោយសារវិធានការរឹតបន្តឹង ការចេញ-ចូលប្រទេស ដើម្បីទប់ស្កាត់ជំងឺកូវីដ-១៩។
អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក កុយ គួង បានបញ្ជាក់ថា ក្រុមហ៊ុនអាកាសចរណ៍ម៉ាឡេស៊ី បានរៀបចំជើងហោះហើរពាណិជ្ជកម្មមួយ សម្រាប់ពលរដ្ឋខ្មែរជាប់គាំងនៅម៉ាឡេស៊ីនេះ។ បើតាមលោក កុយ គួង ពលរដ្ឋខ្មែរជាង១២០នាក់ ក្នុងចំណោម១៤៣នាក់ ដែលជាប់គាំងនៅម៉ាឡេស៊ី នឹងមកដល់កម្ពុជា តាមជើងយន្តហោះ MH762 នៅល្ងាចស្អែកនេះ ។ ក្រៅពីពលរដ្ឋខ្មែរជាប់គាំងនេះ ក៏មានអ្នកដំណើរជិត១០០នាក់ផ្សេងទៀតរួមដំណើរមកដែរ។
អ្នកនាំពាក្យក្រសួងការបរទេស ដែលទើបទទួលបានរបាយការណ៍ចុងក្រោយពីទូតខ្មែរប្រចាំម៉ាឡេស៊ីនេះ បានប្រាប់សារព័ត៌មានថ្មីៗដូច្នេះថា៖« មុនហ្នឹងមានពលរដ្ឋតែ២០៤នាក់ទេមកកម្ពុជា តែឥឡូវទូតយើងទើបប្រាប់ខ្ញុំមុនហ្នឹងថា មានពលរដ្ឋចុះឈ្មោះមក(កម្ពុជា) មាន១០នាក់ទៀតហើយ អ៊ីចឹងពលរដ្ឋប្រមាណ២២០នាក់ នឹងមកដល់កម្ពុជា»។
ជើងយន្តហោះពាណិជ្ជកម្មនេះ មានអ្នកដំណើរចំនួន ២១៩នាក់ ដែលក្នុងនោះមានប្រជាពលរដ្ឋខ្មែរមានចំនួន ២១២នាក់ និងជនបរទេសចំនួន៧នាក់។ នៅថ្ងៃទី១៦ មិថុនាដដែល ជើងយន្តហោះនេះ ក៏នឹងដឹកយកប្រជាពលរដ្ឋម៉ាឡេស៊ីចំនួនជាង១៦០នាក់ ត្រឡប់មកកាន់ប្រទេសម៉ាឡេស៊ីវិញផងដែរ។ នេះបើតាមលោក ចឺយ វិចិត្ត ឯកអគ្គរាជទូតកម្ពុជាប្រចាំប្រទេសម៉ាឡេស៊ី ដែលបានបញ្ជាក់លើហ្វេសប៊ុក។
កាលពីថ្ងៃទី៧ ខែមេសា ពលរដ្ឋខ្មែរ១៤៣នាក់ បានជាប់គាំងនៅម៉ាឡេស៊ី ដោយសាររដ្ឋាភិបាលកម្ពុជា បានអនុវត្តវិធានការរឹតបន្តឹងការចេញ-ចូលប្រទេស ដើម្បីទប់ស្កាត់ជំងឺកូវីដ-១៩។ ប៉ុន្តែដោយសារតែពលរដ្ឋខ្មែរទាំងនោះ ស្នើរដ្ឋាភិបាល តាមរយៈស្ថានទូតខ្មែរប្រចាំម៉ាឡេស៊ី ឱ្យជួយដោះស្រាយទុក្ខលំបាកពួកគេនោះ ទើបបានជាសម្ដេច ហ៊ុន សែន សម្រេចឱ្យស្ថានទូតសម្របសម្រួលដឹកជញ្ចូនពួកគេត្រឡប់មកមាតុភូមិវិញ។
ពលរដ្ឋខ្មែរទាំងនោះ មិនត្រូវបានពិនិត្យ និងធ្វើតេស្តសុខភាព នៅម៉ាឡេស៊ីឡើយ។ ប៉ុន្តែនៅពេលពួកគេចូលមកកម្ពុជា នៅថ្ងៃទី១៦ មិថុនានោះ មន្ត្រីជំនាញសុខាភិបាល នឹងធ្វើតេស្តពិនិត្យសុខភាពពួកគេ ដើម្បីទប់ស្កាត់ជំងឺកូវីដ-១៩។ ចំពោះវិធានការចត្តាឡីស័កនោះ គឺអាស្រ័យលើការកំណត់របស់ក្រសួងសុខាភិបាល។ នេះបើតាមលោក កុយ គួង អ្នកនាំពាក្យក្រសួងការបរទេស។
សារព័ត៌មានថ្មីៗ មិនទាន់អាចទាក់ទងអ្នកនាំពាក្យក្រសួងសុខាភិបាល ដើម្បីសុំការអត្ថាធិប្បាយបន្ថែមឡើយ។ ប៉ុន្តែក្រសួងសុខាភិបាល ធ្លាប់បានអះអាងកន្លងមកថា រាល់អ្នកដំណើរចូលមកកម្ពុជា គឺក្រសួងតែងតែកំណត់ឱ្យពួកគេអនុវត្តវិធានការចត្តាឡីស័កដោយខ្លួនឯង រយៈពេល១៤ថ្ងៃសិន មុននឹងធ្វើដំណើរត្រាចរនៅកម្ពុជា។
គិតត្រឹមថ្ងៃទី១៥ មិថុនានេះ កម្ពុជា មានអ្នកជំងឺកូវីដ-១៩ ចំនួន១២៨នាក់ ក្នុងនោះជាសះស្បើយ១២៥នាក់។ ដោយឡែកនៅម៉ាឡេស៊ីវិញ មានអ្នកជំងឺកូវីដ-១៩ ជាង៨ពាន់នាក់ ជាសះស្បើយជាង៧ពាន់នាក់ និងស្លាប់ជាង១២០នាក់៕
Tag:
COVID-19
ម៉ាឡេស៊ី
© រក្សាសិទ្ធិដោយ thmeythmey.com
