COVID-19
កីឡាអន្តរជាតិ
អន្តរជាតិ
Casillas បោះបង់បេក្ខភាពជាប្រធានសហព័ន្ធបាល់ទាត់អេស្ប៉ាញដោយសារ COVID-19
× Iker Casillas អតីតប្រធានក្រុមជម្រើសជាតិអេស្ប៉ាញ បានដកខ្លួនចេញពីបេក្ខភាពប្រជែងធ្វើប្រធានសហព័ន្ធកីឡាបាល់ទាត់អេស្ប៉ាញ (SFF) វិញ ដោយសារតែវិបត្តិជំងឺឆ្លង COVID-19 ក្នុងប្រទេស។
អតីតអ្នកចាំទី Real Madrid រូបនេះបាននិយាយថា រូបគេកំពុងពិចារណាឡើងវិញនូវបេក្ខភាពជាប្រធាន SFF ដោយសារតែស្ថានភាពសង្គម សេដ្ឋកិច្ច និងសុខភាពនៅក្នុងប្រទេសរបស់ខ្លួនកំពុងរងទុក្ខខ្លាំង។
គិតមកទល់ពេលនេះ អេស្ប៉ាញមានករណីស្លាប់ដោយសារ COVID-19 ជាង ២៧០០០នាក់ ក្នុងចំណោមអ្នកឆ្លងជិត ៣០ម៉ឺននាក់ ចាប់តាំងពីមានការផ្ទុះឡើងនៃជំងឺរាតត្បាតសកលមួយនេះ។
Casillas បានបង្ហោះនៅលើបណ្តាញសង្គម Twitter ផ្ទាល់របស់ខ្លួនក្រោយបោះបង់បេក្ខភាពប្រជែងតំណែងប្រធាន SFF ថា សំឡេងឆ្នោតសម្រាប់តួនាទីនេះលែងសំខាន់ហើយ អំឡុងពេលមានវិបត្តិជំងឺរាតត្បាតនេះ។
កីឡាករ វ័យ៣៩ឆ្នាំរូបនេះ មិនទាន់ប្រកាសចូលនិវត្តន៍ជាផ្លូវការនោះទេ ប៉ុន្តែរូបគេក៏មិនបានលេងឲ្យក្រុម FC Porto ដែរ ចាប់តាំងពីខែមេសា ឆ្នាំ ២០១៩ រហូតសព្វថ្ងៃ បន្ទាប់ពីមានជំងឺគាំងបេះដូងអំឡុងពេលហ្វឹកហាត់កន្លងមក។ ដោយសារបញ្ហាជំងឺនេះ Casillas ត្រូវបាន Porto ផ្តល់តួនាទីជាបុគ្គលិកគ្រូបង្វឹកចាប់ពីខែកក្កដា ឆ្នាំ ២០១៩ មក។
ការដកខ្លួនចេញពីបេក្ខភាពប្រជែងតំណែងខាងលើរបស់ Casillas មានន័យថាលោក Luis Rubiales ដែលកំពុងកាន់អំណាចនឹងត្រូវបានបោះឆ្នោតជ្រើសរើសជាថ្មីដោយគ្មានអ្នកជំទាស់នៅខែសីហាខាងមុខ ដើម្បីបន្តតំណែងអាណត្តិរយៈពេល ៤ ឆ្នាំទៀត៕
Tag:
Iker Casillas
COVID-19
SFF
© រក្សាសិទ្ធិដោយ thmeythmey.com