ភ្នំពេញ៖ ឯកអគ្គរាជទូតកម្ពុជាប្រចាំការិយាល័យអង្គការសហប្រជាជាតិលោក អាន សុខខឿន ប្រាប់អ្នករាយការណ៍ពិសេសស្វែងរកអង្គហេតុ និងព័ត៌មានពិតពីកម្ពុជា។ទូតកម្ពុជា ថ្លែងបែបនេះ នៅក្នុងកិច្ចប្រជុំលើកទី៤៣ នៃកិច្ចពិភាក្សាលើរបៀបវារៈទី៥ ស្តីពីយន្តការសិទ្ធិមនុស្ស នាទីក្រុងហ្សឺណែវ ប្រទេសស្វីស កាលពីថ្ងៃទី១៥ មិថុនា។
ថ្លែងនៅក្នុងកិច្ចប្រជុំនោះ លោក អាន សុខខឿន បាននិយាយថា អ្នករាយការណ៍ពិសេស មិនគួរចាត់ទុករាល់របាយការណ៍ ដែលទិតៀនរដ្ឋាភិបាល ជា«ការពិតដែលសម្រេចរួចហើយ» ដោយមិនបានសិក្សាអំពីសុក្រឹតភាពនៃព័ត៌មានដែលបានយកប្រើប្រាស់ សាវតាដែលបានកើតមានឡើងក្នុងប្រទេស និងហេតុផលនយោបាយនោះទេ។
ឯកអគ្គរាជទូតកម្ពុជាប្រចាំការិយាល័យអង្គការសហប្រជាជាតិរូបនេះ បានសង្កត់ដូច្នេះថា៖«អាណត្តិរបស់អ្នករាយការណ៍ពិសេសត្រូវតែអនុវត្តឱ្យបានខ្ជាប់ខ្ជួនតាមក្រមប្រតិបត្តិ និងសៀវភៅណែនាំប្រតិបត្តិការ សម្រាប់នីតិវិធីពិសេសរបស់ក្រុមប្រឹក្សាសិទ្ធិមនុស្ស។ អ្នករាយការណ៍ពិសេសត្រូវតែស្វែងរកអង្គហេតុពិត ដោយផ្អែកលើព័ត៌មានសត្យានម័ត និងអាចជឿជាក់បាន ចេញពីប្រភពដែលអាចជឿទុកចិត្ត និងត្រូវបានផ្ទៀងផ្ទាត់យ៉ាងហ្មត់ចត់ត្រឹមត្រូវ ដូចមានចែងក្នុងមាត្រា៦ មាត្រា៨ និងមាត្រា៩ នៃក្រមប្រតិបត្តិរបស់នីតិវិធីពិសេសរបស់ក្រុមប្រឹក្សាសិទ្ធិមនុស្ស…»។
លោក អាន សុខខឿន ក៏ស្នើឱ្យអ្នករាយការណ៍ពិសេស គោរពឱ្យបានម៉ឹងម៉ាត់នូវគោលបំណង និងគោលការណ៍ជាសារវ័ន្ត នៃធម្មនុញ្ញអង្គការសហប្រជាតិ ដែលក្នុងនោះបញ្ជាក់ពីការគោរពអធិបតេយ្យភាព និងការមិនជ្រៀតជ្រែកកិច្ចការផ្ទៃក្នុងរបស់រដ្ឋ។
«អាណត្តិរបស់អ្នករាយការណ៍ពិសេស គឺជួយរដ្ឋជាសមាជិក ក្នុងវិស័យសិទ្ធិមនុស្សតាមរយៈកិច្ចសន្ទនា និងកិច្ចសហប្រតិបត្តិការ មិនមែនតាមរយៈការវិនិច្ឆ័យផ្ដល់ពិន្ទុទៅតាមទស្សនៈយល់ឃើញផ្ទាល់ខ្លួន ដូចមានចែងក្នុងសៀវភៅណែនាំប្រតិបត្តិការសម្រាប់នីតិវិធីពិសេសរបស់ក្រុមប្រឹក្សាសិទ្ធិមនុស្ស។ អ្នករាយការណ៍ពិសេស មិនមែនជាចៅក្រម ហើយក៏មិនមែនជាព្រះរាជអាជ្ញាដែរ»។ នេះជាការលើកឡើងរបស់ឯកអគ្គរាជទូតកម្ពុជា ឆ្លើយតបទៅនឹងអ្នករាយការណ៍ពិសេសរបស់អង្គការសហប្រជាជាតិ ដែលតែងតែវាយតម្លៃអវិជ្ជមានលើបញ្ហាសិទ្ធិមនុស្សកម្ពុជា។
កន្លងមកអ្នករាយការណ៍ពិសេសដែលទទួលបន្ទុកសិទ្ធិមនុស្ស របស់អង្គការសហប្រជាជាតិ បានវាយតម្លៃថា ស្ថានភាពសិទ្ធិមនុស្សនៅកម្ពុជា មានការធ្លាក់ចុះ ដោយសារការរឹតត្បិតសិទ្ធិបញ្ចេញមតិ និងការប្រើប្រាស់ច្បាប់ ដើម្បីធ្វើទុក្ខបុកម្នេញលើមន្ត្រីសិទ្ធិមនុស្ស សកម្មជន និងអ្នកនយោបាយជាដើម ។
តែយ៉ាងណារដ្ឋាភិបាលកម្ពុជា ធ្លាប់បានអះអាងការពារខ្លួនថា កម្ពុជាមិនបានរឹតត្បិតសេរីភាពបញ្ចេញមតិរបស់ពលរដ្ឋទេ ប៉ុន្តែបើការរិះគន់ និងបញ្ចេញមតិណា ដែលមានចរិតបែបញុះញង់ ហើយបង្កចលាចលក្នុងសង្គមនោះ គឺនឹងត្រូវអនុវត្តតាមវិធានការច្បាប់ជាធរមាន។
ចាប់តាំងពីឆ្នាំ១៩៩៣មក កម្ពុជាទទួលយកអ្នករាយការណ៍ពិសេសប្រចាំប្រទេស ចំនួន៦រូបហើយ។ ដោយឡែកនៅឆ្នាំ២០១៩ រដ្ឋាភិបាល ក៏បានឯកភាពបន្តអាណត្តិរបស់អ្នករាយការណ៍ពិសេសស្តីពីស្ថានភាពសិទ្ធិមនុស្សនៅកម្ពុជា រយៈពេលពីរឆ្នាំតទៀត៕