អន្តរជាតិ
កូរ៉េខាងជើង ថាកងទ័ពត្រៀមរួចរាល់ក្នុងការចាត់វិធានការលើខិត្តបណ្ណឃោសនាពីកូរ៉េខាងត្បូង ទាហានកូរ៉េខាងជើង នៅតំបន់គ្មានកងទ័ព។រូបភាព៖AP
× កងទ័ពកូរ៉េខាងជើង នៅថ្ងៃទី១៦ ខែមិថុនា បានត្រៀមខ្លួនរួចជាស្រេចក្នុងការចេញសកម្មភាព បើសិនជាក្រុមជនភៀសខ្លួនពីកូរ៉េខាងជើង នៅតែបន្តសកម្មភាពក្នុងការបញ្ជូនខិត្តប័ណ្ណចូលទឹកដីកូរ៉េខាងជើង។ ការព្រមាននេះត្រូវបានគេចាត់ទុកថាជាវិធានការតបតចុងក្រោយបង្អស់របស់កូរ៉េខាងជើង។ នេះយោងតាមទីភ្នាក់ងារព័ត៌មានរដ្ឋKCNA។
អគ្គសេនាធិការ នៃកងទ័ពប្រជាជនកូរ៉េ បាននិយាយថា ខ្លួនកំពុងតែសិក្សាពីផែនការសកម្មភាពក្នុងការចូលទៅកាន់តំបន់គ្មានកងទ័ពដែលកំណត់ឡើងដោយកិច្ចព្រមព្រៀងអន្តរកូរ៉េ រួចចបំលែងតំបន់នោះឲ្យទៅជាបន្ទាយតែម្តង។ សេចក្តីថ្លែងការរបស់យោធាកូរ៉េ បានបន្ថែមទៀតថាកងទ័ព នឹងអនុវត្តយ៉ាងរហ័សនិងពេញលេញនូវរាល់សេចក្តីសម្រេចចិត្តរបស់បក្ស និងរដ្ឋាភិបាល។
ភាពតានតឹងរវាងប្រទេសកូរ៉េទាំង២បានកើនឡើងសារជាថ្មី ជុំវិញការបង្ហោះខិត្តប័ណ្ណចូលដីកូរ៉េខាងជើង ដែលរួមមានការរិះគន់លោក គីម ជុងអ៊ុន និងការរំលោភបំពានសិទ្ធិមនុស្សជាដើម។ ក្រុមអ្នកដែលបានរត់ភៀសខ្លួនពីកូរ៉េខាងជើងតែងតែដាក់ខិត្តប័ណ្ណ អាហារ ក្រដាស់ប្រាក់១ដុល្លារ កូនវិទ្យុ និងUSB ដែលមានរឿង បទចម្រៀង និងព័ត៌មានពីកូរ៉េខាងត្បូង ដោយតាមរយៈប៉េងប៉ោងកាត់ពីលើតំបន់ដែលមានការការពារយ៉ាងតឹងតែង ឫដាក់ក្នុងដបរួចបណ្តែតតាមទន្លេ។
ដោយសារតែទង្វើចែកចាយខិត្តប័ណ្ណនេះហើយ ទើបកាលពីថ្ងៃទី១៣ ខែមិថុនា លោកស្រីគីម យ៉ូចុង ដែលជាប្អូនស្រីរបស់លោកគីម ជុងអ៊ុន បានបញ្ជាឲ្យកងទ័ពត្រៀមចេញសកម្មភាព។ ចំណែកឯ កូរ៉េខាងត្បូងវិញ ក្នុងន័យចង់បន្ធូរបន្ថយស្ថានការណ៍ បានចេញសកម្មភាពផ្លូវច្បាប់ប្រឆាំងអង្គការចំនួន២ដែលដឹកនាំដោយអ្នកភៀសខ្លួនពីកូរ៉េខាងជើង ដោយលើកឡើងថាវាធ្វើឲ្យប៉ះពាល់ដល់ស្ថានភាពតាមព្រំដែន ក៏ដូចជាប៉ះពាល់ដល់បរិស្ថានផងដែរ។
ចំណែកឯលោកប្រធានាធិបតីកូរ៉េខាងត្បូង ម៉ូន ចេអ៊ីន កាលពីថ្ងៃទី១៥ ខែមិថុនាបានទទូចឲ្យកូរ៉េខាងជើងរក្សាកិច្ចព្រមព្រៀងដែលមានស្រាប់ និងត្រឡប់មកសន្ទនាគ្នាវិញ៕
Tag:
កូរ៉េខាងជើង
កូរ៉េខាងត្បូង
© រក្សាសិទ្ធិដោយ thmeythmey.com