អត្ថបទពាណិជ្ជកម្ម
ធនាគារ CIMB ផ្តល់អាហារូបករណ៍ថ្នាក់បរិញ្ញាបត្រ ដល់សិស្សនៃអង្គការមូលនិធិកុមារ
×![]()
ដោយ: ថ្មីៗ
រាជធានីភ្នំពេញ៖ កាលពីថ្ងៃទី១៦ ខែមិថុនាកន្លងទៅនេះ ធនាគារ ស៊ីអាយអិមប៊ី ភីអិលស៊ី (ធនាគារ CIMB) ដែលជាធនាគារអន្តរជាតិឈានមុខគេ ក្នុងប្រទេសកម្ពុជា បានប្រកាសផ្តល់ និងប្រគល់អាហារូបករណ៍ថ្នាក់បរិញ្ញាបត្រជាផ្លូវការ ដល់សិស្ស៣រូប មកពីអង្គការមូលនិធិកុមារ (CCF) នៅអគារ Exchange Square ការិយាល័យកណ្តាលរបស់ធនាគារ CIMB។ អាហារូបករណ៍របស់ធនាគារ CIMB នេះ ឧបត្ថម្ភដល់និស្សិត នូវថ្លៃសិក្សាពេញលេញ សម្រាប់ថ្នាក់បរិញ្ញាបត្រ រយៈពេល ៤-៥ឆ្នាំ អាស្រ័យលើមុខជំនាញ។
សម្រាប់ការដំណើរការជ្រើសរើសសិស្សឲ្យបានទទួលបានអាហារូបករណ៍នេះ អង្គការមូលនិធិកុមារ បានវាយតម្លៃទៅលើសមត្ថភាព លទ្ធផលសិក្សា និងលក្ខខណ្ឌមួយចំនួនទៀត ក្នុងចំណោមកុមារជាច្រើន ដែលបានទទួលការជួយគាំទ្រឧបត្ថម្ភនៅក្នុងអង្គការផ្ទាល់។ ជាលទ្ធផល មានសិស្សចំនួន៥រូប ដែលបានឆ្លងផុតនៅវគ្គទីមួយ។ បន្ទាប់មក ធនាគារ CIMB បានសម្ភាស និងតេស្តសមត្ថភាពផ្ទាល់ ទៅលើសិស្សទាំង៥រូប នៅការិយាល័យកណ្តាល ហើយក្នុងនោះធនាគារបានជ្រើសរើសសិស្សឆ្នើម៣រូប ដើម្បីផ្តល់អាហារូបករណ៍ថ្នាក់បរិញ្ញាបត្រ ទៅតាមមុខជំនាញ ដែលពួកគេចង់សិក្សា ដូចជាថ្នាក់បរិញ្ញាបត្រ ផ្នែកវិស្វកម្មអេឡិចត្រូនិក នៅវិទ្យាស្ថានបច្ចេកវិទ្យានៃកម្ពុជា។ បរិញ្ញាបត្រ ផ្នែកបច្ចេកវិទ្យាព័ត៌មាន នៅសាកលវិទ្យាល័យភូមិន្ទភ្នំពេញ និងបរិញ្ញាបត្រផ្នែកវិស្វកម្មមេកានិក នៅវិទ្យាស្ថានជាតិពហុបច្ចេកទេសកម្ពុជា។
លោកស្រី អ៊ុំ ចិន្តាភក្តី នាយកធនធានមនុស្ស របស់ធនាគារ CIMB បានមានប្រសាសន៍ថា ធនាគារផ្តល់អាហារូបករណ៍នេះ ដើម្បីរួមចំណែកលើកកម្ពស់វិស័យអប់រំ ដែលជាផ្នែកមួយនៃកម្មវិធីទំនួលខុសត្រូវសង្គម ក្នុងការជួយត្រឡប់ទៅដល់សហគមន៍ ដែលយើងកំពុងប្រកបអាជីវកម្ម។ អ្នកស្រី ចិន្តាភក្តីបន្តទៀតថា៖«ការសិក្សា ពិតជាមានសារៈសំខាន់ណាស់ ដែលមិនត្រឹមតែផ្លាស់ប្តូរជីវិតរបស់យុវជន ឲ្យកាន់តែប្រសើរនោះទេ តែថែមទាំងអាចផ្តល់ប្រយោជន៍ដល់គ្រួសារ និងសង្គមជាតិទៀតផង។ ដូច្នេះធនាគារ CIMB រីករាយ ក្នុងការសហការជាមួយអង្គការ មូលនិធិកុមារ ដែលជាអង្គការជួយដល់កុមារខ្វះខាតរាប់រយនាក់ ក្នុងប្រទេសកម្ពុជា ដោយផ្តល់អាហារូបករណ៍ ដល់សិស្សឆ្នើមទាំង៣រូបនេះ ឲ្យបានបន្តការសិក្សាថ្នាក់បរិញ្ញាបត្រ ហើយជូនពរឲ្យពួកគេសម្រេចក្តីបំណងរបស់ខ្លួន ហើយអាចជួយដល់សង្គមជាតិ ក្នុងនាមជាធនធានមនុស្សដ៏ល្អ នាពេលថ្ងៃអនាគត»។
លោក អ៊ា ឆាយគាង តំណាងរបស់អង្គការមូលនិធិកុមារ (CCF) ដែលបានជួយទំនុកបម្រុងដល់សិស្សឆ្នើមទាំង៣រូបកន្លងមកបានថ្លែងថា នេះជាមោទនភាពមួយ និងជាការរីករាយមួយ សម្រាប់យើងខ្ញុំទាំងអស់គ្នា ដែលសិស្សនិស្សិតយើងមានសមត្ថភាពខ្ពស់ ក្នុងការប្រជែងយកអាហារូបករណ៍ ដែលតម្រូវទៅតាមលក្ខខណ្ឌជ្រើសរើសរបស់ធនាគារ CIMB។ លោក អ៊ា ឆាយគាង បន្ថែម៖ «យើងខ្ញុំទាំងអស់គ្នា ក៏ដូចជាថ្នាក់ដឹកនាំរបស់អង្គការមូលនិធិកុមារកម្ពុជា (CCF) សូមថ្លែងអំណរគុណ និងអរគុណយ៉ាងជ្រាលជ្រៅ ជូនចំពោះធនាគារ CIMB និងថ្នាក់ដឹកនាំរបស់ធនាគារ ដែលសម្រេចជ្រើសរើសសិស្សនិស្សិតរបស់យើងខ្ញុំ ដើម្បីផ្តល់អាហារូបករណ៍ពេញលេញ សម្រាប់កម្មវិធីសិក្សាថ្នាក់ឧត្តមសិក្សានេះ។ កាយវិការប្រកបដោយសប្បុរសធម៌នេះ ឆ្លុះបញ្ជាំងឲ្យឃើញពីការយកចិត្តទុកដាក់ខ្ពស់ ក្នុងការចូលរួមចំណែកអភិវឌ្ឍសង្គមជាតិកម្ពុជាយើង ពីសំណាក់ធនាគារ និងថ្នាក់ដឹកនាំរបស់ធនាគារ CIMB ជាពិសេសក្នុងវិស័យអប់រំសិក្សាធិការ ដូចដែលធនាគារបានផ្តល់ជូនក្នុងថ្ងៃនេះ»។
យុវជន បូ រិទ្ធិវង្ស ជាសិស្សមួយរូប ដែលទទួលបានអាហារូបករណ៍ ពីធនាគារ CIMB បានបញ្ជាក់ថា រូបគេរំភើបរីករាយក្រៃលែង ដែល ធនាគារ CIMB បានផ្តល់អាហារូបករណ៍ពេញលេញ សម្រាប់កម្មវិធីថ្នាក់បរិញ្ញាបត្រនេះដល់ខ្លួន និងមិត្តភក្តិខ្ញុំ២រូបទៀត ហើយនេះជាការទទួលបានឱកាសអភិវឌ្ឍខ្លួន និងចំណេះដ៏ល្អមួយសម្រាប់ពួកគេ។ យុវជន បូ រិទ្ធិវង្ស ប្តេជ្ញាដូច្នេះ៖«ខ្ញុំនឹងខិតខំសិក្សាដើម្បីយកចំណេះដឹង ជំនាញរបស់ខ្ញុំចូលរួមក្នុងការអភិវឌ្ឍសហគមន៍យើង សង្គមជាតិយើងឲ្យបានរីកចម្រើនទៅមុខអោយបានឆាប់រហ័ស និងដើម្បីចូលរួមជួយកាត់បន្ថយភាពក្រីក្រ ក្នុងសហគមន៍របស់ខ្ញុំផ្ទាល់ផងដែរ »។
សូមបញ្ជាក់ផងដែរថា ធនាគារ CIMB បានចាប់ផ្តើមប្រតិបត្តិការអាជីវកម្មរបស់ខ្លួន ក្នុងប្រទេសកម្ពុជា នៅចុងឆ្នាំ២០១០ ហើយបច្ចុប្បន្នធនាគារមានសាខាចំនួន១៤ តាមបណ្តារាជធានី និងខេត្តសំខាន់ៗ នៅក្នុងប្រទេស។ នេះគឺជាឆ្នាំទីមួយ នៃកម្មវិធីអាហារូបករណ៍របស់ធនាគារ CIMB នៅក្នុងប្រទេសកម្ពុជា។ ជាមួយគ្នានេះ ធនាគារ CIMB ក៏បានផ្តល់អាហារូបករណ៍អាស៊ាន ជារៀងរាល់ឆ្នាំ ដល់និស្សិតខ្មែរផងដែរ សម្រាប់ថ្នាក់បរិញ្ញាបត្រ នៅគ្រប់សាកលវិទ្យាល័យល្បីៗ ទូទាំងសាកលលោក។ ក្នុងនោះ មាននិស្សិតឆ្នើមខ្មែរយើងមួយរូប ដែលទទួលបានអាហារូបករណ៍ថ្នាក់តំបន់នេះ និងកំពុងសិក្សានៅសាកលវិទ្យាល័យ McGil ប្រទេសកាណាដាផងដែរ។
អស់រយៈពេលជិត១០ឆ្នាំកន្លងមកនេះ ធនាគារ CIMB បានចូលរួមសកម្មភាពសប្បុរសធម៌ជាច្រើន ដែលរួមមានវិស័យសំខាន់ៗ ដូចជាវិស័យអប់រំ ដោយធនាគារ បានឧបត្ថម្ភដល់សាលាដាច់ស្រយ៉ាល និងអង្គការនានាក្នុងប្រទេសកម្ពុជា និងផ្តល់អាហារូបករណ៍ ដល់និស្សិតសិក្សានៅក្រៅប្រទេស។ មិនតែប៉ុណ្ណោះ ធនាគារ CIMB ក៏បាន និងបន្តចូលរួមសកម្មភាពសប្បុរសធម៌ក្នុងវិស័យវិស័យសុខាភិបាលដែរ តាមរយៈការបរិច្ចាគឈាម និងឧបត្ថម្ភ ដល់មន្ទីរពេទ្យគន្ធបុប្ផា មន្ទីរពេទ្យបង្អែកបាទី និងមន្ទីរពេទ្យមិត្តភាពខ្មែរ-សូវៀតជាដើម ក៏ដូចជាចូលរួមក្នុង វិស័យសង្គមកិច្ច ដោយធនាគារបានឧបត្ថម្ភដល់កាកបាទក្រហម និងមជ្ឈមណ្ឌលកុមារកំព្រានានា ព្រមទាំងផ្នែកបរិស្ថាន ដោយធនាគារបានចូលរួមដាំកូនឈើ នៅវិទ្យាល័យ ឧដុង្គជាដើម។
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
