COVID-19
អន្តរជាតិ
នូវែលសេឡង់ ឲ្យយោធាគ្រប់គ្រងកន្លែងចត្តាឡីស័ក ក្រោយធ្លោយឲ្យមាន COVID-19 ពីរករណី នាយករដ្ឋមន្រ្តីនូវែលសេឡង់ លោកស្រី Jacinda Ardern។ រូបភាព៖ Getty Images
× នាយករដ្ឋមន្ត្រីនូវែលសេឡង់ ចាស៊ីន អាឌើន (Jacinda Ardern) បានបង្ហាញការមិនពេញចិត្តចំពោះការធ្វេសប្រហែលរហូតបណ្ដាលឲ្យមានជំងឺ COVID-19 ពីរករណីក្នុងប្រទេស។ លោកស្រី អាឌើន បានប្រគល់មជ្ឈមណ្ឌលចត្តាឡីស័កទាំងអស់នៅទូទាំងប្រទេសឲ្យស្ថិតក្រោមការគ្រប់គ្រងរបស់យោធាវិញម្ដង។
ក្នុងរយៈពេល ២៤ថ្ងៃកន្លងមក នូវែលសេឡង់ មិនបានរាយការណ៍ពីករណីCOVID-19 ឡើយ។ រហូតដល់ថ្ងៃទី១៦ ខែមិថុនា នូវែលសេឡង់ បានប្រកាសរកឃើញករណីឆ្លងកូរ៉ូណាវីរុស ២ករណីជាថ្មី ដែលជាអ្នកដំណើរមកពីអង់គ្លេស។ ពួកគេត្រូវបានមជ្ឈមណ្ឌលចត្តាឡីស័កផ្តល់សិទ្ធិពិសេស ដោយអនុញ្ញាតឲ្យទៅចូលរួមក្នុងពិធីម្តាយឪពុកស្លាប់ ដោយមិនបានធ្វើតេស្តរក COVID-19 ជាមុន។ ប៉ុន្តែក្រោយមក អ្នកទាំងពីរត្រូវឃើញថា មានផ្ទុក COVID-19 ។
ដោយមើលឃើញពីការធ្វេសប្រហែសបែបនេះ នាយករដ្ឋមន្ត្រីនូវែលសេឡង់ លោកស្រី ចាស៊ីន អាឌើន បានលើកឡើងនៅក្នុងសន្និសីទកាសែតមួយក្នុងសភាថា លោកស្រីបានតែងតែង ប្រធានជំនួយការនៃក្រសួងការពារជាតិ និងជាឧត្តមសនីយ៍ទ័ពអាកាស លោក Digby Webb ឲ្យទទួលបន្ទុកគ្រប់គ្រងមជ្ឈមណ្ឌលចត្តាឡីស័ក និងកន្លែងដាក់នៅដាច់ដោយឡែកទាំងអស់ ដោយរួមបញ្ចូលទាំងការអនុញ្ញាតឲ្យមនុស្សចេញពីមជ្ឈមណ្ឌលផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
បន្ថែមពីលើនេះ លោកស្រីនាយករដ្ឋមន្ត្រី បានបន្ថែមទៀតថា ប្រសិនជាត្រូវការ លោក Webb ក៏អាចស្វែងរកជំនួយយោធា ដើម្បីគ្រប់គ្រងមជ្ឈមណ្ឌលចត្តាឡីស័កនេះផងដែរ។
ការរឹតបន្តឹងលើមជ្ឈមណ្ឌលចត្តាឡីស័ក គឺដើម្បីការពារលទ្ធផលដែលមានក្នុងពេលកន្លងមក។ ក្នុងរយៈថ្មីៗនេះ នូវែលសេឡង់ បានប្រកាសថា ជាប្រទេសគ្មាន COVID-19 ហើយប្រទេសនេះ ក៏បានអនុញ្ញាតឲ្យប្រជាជនរបស់ខ្លួន វិលត្រលប់ទៅរកសភាពធម្មតាវិញដែរ។ ប៉ុន្តែពីរករណីថ្មីនេះ បានធ្វើឲ្យនូវែលសេឡង់ ចាប់ផ្តើមរឹតបន្តឹងសារជាថ្មី។
ក្នុងសន្និសីទកាសែតដដែលនេះ នាយករដ្ឋមន្ត្រីនូវែលសេឡង់រូបនេះ បានអះអាងថា៖ «ខ្ញុំមិនអាចអនុញ្ញាតឲ្យកិច្ចខិតខំ ដែលយើងបានធ្វើក្នុងពេលកន្លងមក ត្រូវបំផ្លាញឡើយ»។ បន្ថែមពីលើនេះ លោស្រី Ardern បានហៅការខ្វះការយកចិត្តទុកដាក់របស់មជ្ឈមណ្ឌលចត្តាឡីស័កថា ជាបរាជ័យ ដែលមិនអាចទទួលយកបាន»។
សូមបញ្ជាក់ថា គិតមកត្រឹមពេលនេះ នូវែលសេឡង់មានករណី COVID-19 សរុបចំនួន ១៥០៦ករណី អ្នកស្លាប់ចំនួន ២២នាក់ និងអ្នកជាសះស្បើយមានចំនួន ១៤៨២នាក់។ អ្នកជំងឺ COVID-19 ដែលស្ថិតក្រោមការព្យាបាលមានចំនួន ២នាក់៕
© រក្សាសិទ្ធិដោយ thmeythmey.com