COVID-19
កីឡាអន្តរជាតិ
អន្តរជាតិ
Man City នឹងប្រើអាវពិសេសពេលប៉ះ Arsenal ដើម្បីផ្សាយពីមូលនិធិសង្គ្រោះអ្នកជំងឺ COVID-19
× ក្រុម Manchester City នឹងពាក់ឯកសណ្ឋានពិសេសក្នុងការប្រកួតទល់នឹង Arsenal ក្នុងក្របខណ្ឌ Premier League ដើម្បីផ្សព្វផ្សាយពីការចាប់ផ្តើមបង្កើតមូលនិធិសង្គ្រោះអ្នកឆ្លងជំងឺ COVID-19។ មូលនិធិនេះ បង្កើតឡើងដោយក្រុមហ៊ុន City Football Group (CFG) ដែលជារបស់ម្ចាស់ក្លិប Man City។
ការប្រកួតលីគកំពូលអង់គ្លេសនឹងចាប់ផ្តើមឡើងវិញនៅរាត្រីថ្ងៃទី១៧ ខែមិថុនានេះ ក្រោយផ្អាកជាង៣ខែ ដោយសារ COVID-19 ។ ការជួបគ្នាចំនួន២គូដំបូង មានការជួបគ្នារវាង Aston Villa និង Sheffield United នៅម៉ោង ១២:០០នាទីពាក់កណ្តាលយប់ ខណៈ Man City ស្វាគមន៍ Arsenal នៅម៉ោង ២:១៥នាទី រំលងអាធ្រាត្រ។
សម្រាប់ជំនួបដំបូងនេះ Man City នឹងប្រើប្រាស់សម្លៀកបំពាក់ដែលមានស្លាកសញ្ញា (ឡូហ្គូ) យុទ្ធនាការមានឈ្មោះថា «Cityzens Giving for Recovery» ជំនួសឲ្យម្ចាស់ស្ពនស័រធំ Etihad Airways ដែលបានបរិច្ចាគកន្លែងផ្សាយនេះ ដើម្បីផ្សព្វផ្សាយពីគំនិតផ្តួចផ្តើមជួយដល់សហគមន៍ដែលជួបវិបត្តិជំងឺរាតត្បាតសកល។
CFG ដែលជាម្ចាស់ក្លិបកីឡាបាល់ទាត់ចំនួន ៨ នៅជុំវិញពិភពលោក រួមទាំងក្លិបរហស្សនាមមេឃខៀវផង បានបរិច្ចាគថវិកា ១,៣ លានដុល្លារអាមេរិករួចហើយ ដល់យុទ្ធនាការសង្គ្រោះបន្ទាន់ជាសកលនៃជំងឺ COVID-19 នេះ។
City Football Group សង្ឃឹមថា ការប្រកួតលើកនេះនឹងស្របតាមគំនិតផ្តួចផ្តើមថ្មីរបស់ខ្លួន ដោយក្នុងនោះពួកគេនឹងរៃអង្គាសថវិកាជាបន្តបន្ទាប់តាមរយៈក្លិប បុគ្គលិក កីឡាករ គ្រូបង្វឹក និងអ្នកគាំទ្ររួមជាមួយដៃគូពាណិជ្ជកម្មផង ដើម្បីយកទៅជួយដល់ការប្រឆាំងនឹង COVID-19។
Man City ស្ថិតនៅចំណាត់ថ្នាក់ទី២ ក្នុងតារាង Premier League ដោយរកបាន៥៧ពិន្ទុ តាមពីក្រោយក្រុមកំពូលតារាង Liverpool ចំនួន២៥ពិន្ទុ។ Arsenal ឈរលេខរៀងទី៩ មាន៤០ពិន្ទុពីការប្រកួត២៨លើក៕
Tag:
Manchester City
Arsenal
COVID-19
© រក្សាសិទ្ធិដោយ thmeythmey.com