កីឡាករម្នាក់ៗតែងតែមានយុទ្ធសាស្ត្ររៀងៗខ្លួនក្នុងការវាយ និងផ្តួលគូប្រកួត។ ជាក់ស្តែងអ្នកលេងគុនចម្រុះជួរមុខរបស់កម្ពុជាចាន់ រតនា ហាក់ជោគជ័យខ្លាំងជាមួយយុទ្ធសាស្ត្រ«ទន់រឹង» ដែលជាយុទ្ធសាស្ត្រធ្វើឲ្យគូប្រកួតឆាប់ថមថយកម្លាំង។ តាមរយៈយុទ្ធសាស្ត្រនេះ រតនា តែងតែផ្តួលគូប្រកួតមិនឲ្យលើសទឹកទី៣ នាការប្រកួតគុនចម្រុះ(MMA)ប៉ុន្មានប្រកួតចុងក្រោយនេះ។ មុនឡើងសង្វៀនប្រកួតកីឡាករវ័យ៣៤ឆ្នាំរូបនេះ តែងតែប្តេជ្ញាថា បើដៃគូមិនសន្លប់ គឺខ្លួនសន្លប់។
«ទន់រឹង» ជាយុទ្ធសាស្ត្រមួយ ដែលកីឡាករ ចាន់ រតនា តែងប្រើក្នុងការប្រកួតគុនចម្រុះ នាព្រឹត្តិការណ៍ ONE Championship ហើយទទួលបានលទ្ធផលល្អគួរឲ្យកត់សម្គាល់។ បើតាមកីឡាកររូបនេះ យុទ្ធសាស្ត្រនេះជាបច្ចេកទេសដ៏មានប្រសិទ្ធិភាពក្នុងការធ្វើឲ្យដៃគូឆាប់ចុះខ្សោយកម្លាំង និងធ្លាក់ស៊ុះ។
ពាក់ព័ន្ធនឹងយុទ្ធសាស្ត្រនេះ រតនា បានបន្យល់យ៉ាងដូច្នេះថា៖«នៅពេលដៃគូ(គូប្រកួត)គាត់ចាប់ខ្ញុំគាត់ប្រើកម្លាំងខ្លាំង តែខ្ញុំមានតិចនិចមួយអាចធ្វើឲ្យដៃគូឆាប់ធ្លាក់កម្លាំង ចំណុចនេះហើយ ដែលជួយឲ្យខ្ញុំអាចសន្ធប់បុកដៃគូបញ្ចប់មុនទឹកទី៣។ ត្រង់ចំណុចនេះខ្ញុំពិបាកពន្យល់ដែរ តែខ្ញុំអាចនិយាយត្រួសៗ គឺខ្ញុំប្រើទន់រឹង ព្រោះពេលដៃគូគេប្រឹងចាប់យើង គេប្រើកម្លាំងរឹងច្រើនជាងយើង ហើយខ្ញុំនៅក្រោមគេមិនប្រើកម្លាំងរឹងច្រើនទេ គឺខ្ញុំប្រើទន់រឹង ដើម្បីឲ្យគេប្រើកម្លាំងច្រើន»។
កីឡាករមកពីខេត្តបន្ទាយមានជ័យរូបនេះបានបន្ថែមថា៖«នៅពេលខ្ញុំមានឱកាស ខ្ញុំរកច្រកចេញ ពេលខ្ញុំងើបឡើងបានខ្ញុំវាយទៀត ព្រោះខ្ញុំដឹងថាដៃគូខ្ញុំ គាត់ប្រើកម្លាំងច្រើន ដោយសារពេលយើងបំបែកគ្នា គឺគាត់ត្រូវការពេលដកដង្ហើម តែខ្ញុំមិនឲ្យគាត់ដកដង្ហើមទេ គឺខ្ញុំបុកទៅទៀត ព្រោះខ្ញុំនៅមានដង្ហើម អ៊ីចឹងធ្វើឲ្យដៃគូយើងឆាប់ធ្លាក់ដង្ហើមលឿន ដោយសារអត់មានពេលដកដង្ហើម ជាហេតុធ្វើឲ្យស៊ុះដៃគូរបស់ខ្ញុំអស់រលីងត្រឹមទឹកទី២»។
ម្ចាស់ក្លិបសិល្បៈក្បាច់គុនរូបនេះ អះអាងថា រូបគេតែងតែទទួលបានលទ្ធផលល្អពីការប្រើយុទ្ធសាស្ត្រវាយបកនៅពេលគូប្រកួតថមថយកម្លាំងមួយនេះ។ ជាក់ស្តែងយើងសង្កេតឃើញថា បីប្រកួតចុងក្រោយរបស់កីឡាករវ័យ៣៤ឆ្នាំរូបនេះ រូបគេទទួលបានជ័យជម្នះទាំងបីប្រកួត តាមរយៈការផ្តួលដៃគូឲ្យបោះបង់ការប្រកួតចំនួនពីរលើក និងឈ្នះដោយពិន្ទុមួយលើក។
ការសិក្សាពីគូប្រកួតតាមរយៈវីដេអូប្រកួត ក៏ជាវិធីសាស្ត្រមួយរបស់កីឡាករ ចាន់ រតនា ផងដែរ។ ព្រោះការសិក្សានេះធ្វើឲ្យរូបគេអាចដឹងពីកម្រិតសមត្ថភាពរបស់គូប្រកួតថា គេខ្លាំង ឬខ្សោយត្រង់ចំណុចណា។ «សម្រាប់ការប្រកួតធំៗដូច MMA ការសិក្សាពីដៃគូវាជួយយើងច្រើន ព្រោះបើយើងសិក្សាពីដៃគូបានយើងអាចមានតែមច្រើន ហើយគេក៏សិក្សាពីយើងដូចគ្នា។ ប៉ុន្តែបើយើងមិនបានសិក្សាពីចំណុចខ្សោយ ឬចំណុចខ្លាំងរបស់គូប្រកួត ជ័យជម្នះរបស់យើង គឺស្ថិតក្នុងភាពហេងស៊យ»។ នេះជាការលើកឡើងរបស់កីឡាករ ចាន់ រតនា។
ការព្យាយាមហ្វឹកហាត់ជាមួយការរៀបចំផែនការ និងកំណត់របបអាហារត្រឹមត្រូវ ក៏កត្តារួមចំណែកដ៏ធំក្នុងភាពជោគជ័យរបស់កីឡាករ ចាន់ រតនា ផងដែរ។ រតនា បានចូលប្រឡូកក្នុងវិស័យកីឡាវាយដាក់ទ្រុងនៅអំឡុងឆ្នាំ២០០៥ និងធ្លាប់ឡើងសង្វៀនប្រកួតបានចំនួន១០លើក ក្នុងនោះឈ្នះ៧លើក និងចាញ់៣លើក។
រូបគេជាកីឡាករកម្ពុជាតែម្នាក់គត់ ដែលបានឈ្នះបីប្រកួតជាប់គ្នា ហើយត្រូវបានស្ថាប័ន ONE គ្រោងដាក់ឲ្យប្រកួតជាមួយកីឡាករកម្រិត A ជនជាតិជប៉ុន ដែលគ្រោងធ្វើឡើងនៅអំឡុងខែមេសា ឆ្នាំ២០២០ នេះ តែត្រូវបានលើកពេលដោយសារជំងឺកូវីដ-១៩។ បើតាមកីឡាកររូបនេះ រូបគេអាចនឹងឡើងសង្វៀនប្រកួតនៅអំឡុងខែសីហា ខាងមុខនេះ បើស្ថានភាពជំងឺកូវីដ-១៩មានភាពធូរស្បើយ៕