អន្តរជាតិ
លោក ប៉ុមប៉េអូ ពន្លះអតីតសហការី ប៊ូលតុន ដែលត្រៀមចេញសៀវភៅបើកកកាយផ្ទៃក្នុងរដ្ឋបាលលោក ត្រាំ រដ្ឋមន្រ្តីការបរទេសអាមេរិក ម៉ៃ ប៉ុមប៉េអូ និងអតីតទីប្រឹក្សាសន្តិសុខជាតិ ចន ប៊ូលតុន ។ រូបភាព AFP
× រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ នៅថ្ងៃទី១៨ ខែមិថុនា បានរិះគន់ខ្លាំងៗលើអតីតសហការីរបស់លោក គឺអតីតទីប្រឹក្សាសន្តិសុខជាតិ ចន ប៊ូលតុន ដែលនិយាយហែកកេរ្តិ៍លោកក្នុងសៀវភៅមួយដែលចេញផ្សាយនៅសប្ដាហ៍ក្រោយ។ លោក ប៉ុមប៉េអូ បានហៅលោក ប៊ូលតុន ជាមនុស្សកុហក និងជាជនក្បត់ផងដែរ។ រដ្ឋបាលប្រធានាធិបតី ដូណាល់ ត្រាំ កំពុងព្យាយាមរកផ្លូវដើម្បីទប់ស្កាត់ចេញផ្សាយសៀវភៅរបស់លោក ប៊ូលតុន ។
សៀវភៅ «The Room Where It Happened» របស់លោក ចន ប៊ូលតុន អតីតប្រឹក្សាសន្តិសុខជាតិរបស់ប្រធានាធិបតី ដូណាល់ ត្រាំ កំពុងធ្វើឲ្យរញ្ជួយរដ្ឋបាលផ្ទៃក្នុងរដ្ឋាភិបាលអាមេរិក។ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ ក៏បានប្រតិកម្មខ្លាំងៗដាក់អតីតសហការីរបស់ខ្លួនផងដែរ។
ក្នុងសេចក្ដីថ្លែងការណ៍ថ្ងៃទី១៨ ខែមិថុនា លោក ប៉ុមប៉េអូ និយាយថា លោក ប៊ូលតុន កំពុងពង្រាយរឿងកុហកជាច្រើន បង្វិលការពិត ហើយធ្វើឲ្យរឿងមិនត្រូវក្លាយជារឿងត្រូវវិញ។ លោកបន្ថែមថា៖ «ជារឿងសោកស្ដាយផង និងគ្រោះថ្នាក់ផងដែលការបង្ហាញវត្តមានចុងក្រោយរបស់លោក ប៊ូលតុន គឺជាជនក្បតម្នាក់ដែលបំផ្លាញអាមេរិកតាមរយៈការបំពានសេចក្ដីទុកចិត្តរបស់ប្រជាជន។ សម្រាប់មិត្តភក្តិជុំវិញពិភពលោក គ្រប់គ្នាដឹងថា លោកជាកម្លាំងនៃភាពត្រឹមត្រូវ។»
ប្រមុខការទូតរូបនេះ មិនទាន់បានអានសៀវភៅដែលរដ្ឋបាលលោក ត្រាំ រកផ្លូវដើម្បីទប់ស្កាត់ពីការចេញផ្សាយនៅឡើយទេ។
យ៉ាងណាមិញ អ្វីដែលធ្វើឲ្យលោក ប៉ុមប៉េអូ ខឹងខ្លាំងនោះ ទំនងជាចំណុចដែលលោក ប៊ូលតុន សរសេរថា លោក ប៉ុមប៉េអូ ដែលជាមនុស្សជំនិតម្នាក់របស់លោក ត្រាំ និងមិនដែលនិយាយអាក្រក់អ្វីចំពោះមុខមេកើយរបស់ខ្លួន ធ្លាប់និយាយមិនល្អក្រោយខ្នងលោក ត្រាំ ។ កាសែតអាមេរិក The New York Times ផ្សាយដោយស្រង់ផ្នែកនៃសៀវភៅថា លោក ប៊ូលតុន បានទទួលកំណត់ត្រាមួយពីលោក ប៉ុមប៉េអូ អំឡុងពេលជំនួបរវាងលោក ត្រាំ និងមេដឹកនាំកូរ៉េខាងជើងនៅសិង្ហបុរី ដែលសរសេរថា លោក ត្រាំ ពោរពេញដោយគំនិតស្មោកគ្រោក (He is so full of shit)។
លោក ប៉ុមប៉េអូ គឺជាមន្ត្រីម្នាក់ដែលមានតួនាទីសំខាន់ក្នុងការរៀបចំជំនួបមេដឹកនាំអាមេរិក និងកូរ៉េខាងជើង។ លោកធ្វើដំណើរបួនដងទៅកាន់ទីក្រុងព្យុងយ៉ាងដើម្បីចរចាជាមួយកូរ៉េខាងជើងក្នុងឆ្នាំ២០១៨ ដែលបានបើកផ្លូវដល់ទំនាក់ទំនងល្អប្រសើររវាងអតីតសត្រូវទាំងពីរ។ ប៉ុន្តែលោក ប៊ូលតុន បញ្ជាក់ក្នុងសៀវភៅរបស់ខ្លួនថា មួយខែក្រោយជំនួបនៅសិង្ហបុរី លោក ប៉ុមប៉េអូ សារភាពថា លទ្ធភាពជោគជ័យជាមួយកូរ៉េខាងជើង គឺសូន្យ៕
Tag:
អាមេរិក
ម៉ៃ ប៉ុមប៉េអូ
ចន ប៊ូលតុន
© រក្សាសិទ្ធិដោយ thmeythmey.com