ប៉ូលិសនូវែលសេឡង់ម្នាក់ត្រូវបាញ់ស្លាប់ អំឡុងត្រួតពិនិត្យយានយន្តតាមផ្លូវ

អន្តរជាតិ

ប៉ូលិសនូវែលសេឡង់ម្នាក់ត្រូវបាញ់ស្លាប់ អំឡុងត្រួតពិនិត្យយានយន្តតាមផ្លូវ

19, Jun 2020 , 4:36 pm

រូបភាព

ប្រភពរូប៖ Sky news

ដោយ:

ប៉ូលិសនូវែលសេឡង់ និយាយថា មន្ត្រីប៉ូលិសខ្លួនម្នាក់ ត្រូវបានបាញ់ស្លាប់ និងម្នាក់ទៀតដែលរងរបួសក្នុងទីក្រុង AuckLand អំឡុងត្រួតពិនិត្យយានយន្តតាមដងផ្លូវ។ ជនសង្ស័យដែលបាញ់ប៉ូលិសបានរត់គេចខ្លួនក្នុងរថយន្តមួយ តែជាង៤ម៉ោងក្រោយហេតុនេះ ប៉ូលិសបានសម្រុកចូលផ្ទះមួយ និងចាប់ឃាត់ខ្លួនបុរស២នាក់។ នេះបើតាមប្រភពក្នុងស្រុក nzherald.com.nz ។

ប៉ូលិស និយាយថា ពួកគេបានធ្វើការងារត្រួតពិនិត្យយានយន្តតាមផ្លូវដូចសព្វដង កាលពីព្រឹកថ្ងៃទី១៩ ខែមិថុនា ហើយនៅពេលនោះ មនុស្សម្នាក់បានបើកការបាញ់ប្រហារមកលើពួកគេ មុនពេលបើកឡានចេញ។ បើតាមទីភ្នាក់ងារព័ត៌មាន AFP ពួកគេ និយាយថា រថយន្តជនសង្ស័យ ថែមទាំងបើកបុកម្នាក់នៅកន្លែងកើតហេតុម្នាក់ផងដែរ។

ស្នងការប៉ូលិសនូវែលសេឡង់ Andrew Coster និយាយថា វាគ្មានអ្វីកើតឡើងខុសធម្មតាឡើយ នៅពេលរថយន្តជនសង្ស័យនោះចតឲ្យប៉ូលិសត្រួតពិនិត្យ។ លោកថា មន្ត្រីប៉ូលិស មិនទាំងមានកាំភ្លើងជាប់ខ្លួនផងដែរ។ ជាធម្មតាប៉ូលិសនូវែលសេឡង់ ពុំទម្លាប់កាន់កាំភ្លើងឡើយ តែទុកនៅក្នុងរថយន្ត។

ប្រាប់សារព័ត៌មានក្នុងស្រុក លោក Coster អះអាងដូច្នេះថា៖«នេះគឺជាស្ថានភាពដ៏គូរឲ្យតក់ស្លុតបំផុត។ នេះគឺជាព័ត៌មានអាក្រក់បំផុតដែលប៉ូលិសនិងក្រុមគ្រួសារពួកគេទទួលបាន»។ បើតាមលោកស្នងការ Coster មន្ត្រីប៉ូលិសទី២ កំពុងសម្រាកព្យាបាលដោយមានរបួសធ្ងន់ ខណៈប្រជាជនម្នាក់ដែលនៅកន្លែងកើតហេតុនោះ ក៏នៅមន្ទីរពេទ្យដោយមានរបួសស្រាល។

ក្នុងសេចក្តីថ្លែងការណ៍ អ្នកស្រីនាយករដ្ឋមន្ត្រី Jacinda Ardern និយាយថា ព័ត៌មាននេះ គឺជារឿងតក់ស្លុតបំផុតសម្រាប់ប្រជាជាតិ។ អ្នកស្រីសង្កត់ធ្ងន់ថា៖«បាត់បង់ប៉ូលិសម្នាក់គឺបាត់បង់មនុស្សម្នាក់ដែលធ្វើការបម្រើយើងទាំងអស់គ្នា ប៉ុន្តែក៏ជាសមាជិកគ្រួសារយើង មនុស្សដែលយើងស្រលាញ់ និងមិត្ត»៕