COVID-19
ជាតិ
កម្ពុជានិយាយទៅកាន់អន្តរជាតិ៖«បន្ទោសគ្នា បានត្រឹមតែកាត់បន្ថយកិច្ចប្រឹងប្រែងក្នុងការប្រឆាំងជំងឺកូវីដប៉ុណ្ណោះ»
លោក ប្រាក់ សុខុន ប្រមុខការទូតកម្ពុជា ស្ថិតក្នុងកិច្ចប្រជុំជាន់ខ្ពស់ តាមរយៈ Video Conference នៅយប់ថ្ងៃទី១៨ ខែមិថុនា ឆ្នាំ២០២០។ កិច្ចប្រជុំនេះ រៀបចំឡើងក្នុងក្របខ័ណ្ឌកិច្ចសហប្រតិបត្តិការអន្តរជាតិ នៃគំនិតផ្តួចផ្តើមខ្សែក្រវាត់និងផ្លូវរបស់ចិន ដើម្បីពិភាក្សាពីរួមគ្នាប្រឆាំងនឹងជំងឺកូវីដ-១៩។ (រូបពីក្រសួងការបរទេស)
×![]()
ដោយ: សារព័ត៌មានថ្មីៗ
ភាគីកម្ពុជា មិនចង់ឲ្យប្រទេសណាមួយឬសហគមន៍អន្តរជាតិ យកជំងឺកូវីដ-១៩ ទៅធ្វើជារឿងនយោបាយ ហើយបង្កើតឲ្យមានជម្លោះជាមួយគ្នាឡើយ។ ភាគីកម្ពុជា យល់ថា ដំណាក់កាលនេះ សហគមន៍អន្តរជាតិ ត្រូវពង្រឹងសាមគ្គី ក្នុងការយកឈ្នះជំងឺរាតត្បាតកូវីដ-១៩។ 
លោក ប្រាក់ សុខុន រដ្ឋមន្ត្រីការបរទេសកម្ពុជា បានយកឱកាសនៃកិច្ចប្រជុំជាន់ខ្ពស់ ពាក់ព័ន្ធនឹងគោលនយោបាយខ្សែក្រវាត់និងផ្លូវរបស់ចិន និយាយពីកិច្ចសហប្រតិបត្តិអន្តរជាតិ ក្នុងការប្រយុទ្ធប្រឆាំងនឹងជំងឺកូវីដ-១៩។ កិច្ចប្រជុំនេះ ផ្តោតខ្លាំងលើការរួមគ្នាប្រយុទ្ធប្រឆាំងនឹងជំងឺកូវីដ-១៩។
ក្នុងប្រជុំ តាមរយៈការតភ្ជាប់វីដេអូ (Video Conference) កាលពីយប់ថ្ងៃទី១៨ ខែមិថុនា ឆ្នាំ២០២០ ដែលដឹកនាំដោយលោក វ៉ាង យី រដ្ឋមន្ត្រីបរទេសចិន និងមានការចូលរួមពីប្រទេសប្រមាណ២០ រួមទាំងអគ្គនាយកអង្គការសុខភាពពិភពលោក និងតំណាងអង្គការសហប្រជាជាតិ ប្រមុខការទូតកម្ពុជា បញ្ចេញទស្សនៈថា បើគ្មានកិច្ចសហប្រតិបត្តិការនិងសាមគ្គីភាពជាអន្តរជាតិទេ គឺមិនអាចទទួលបានជ័យជម្នះលើការប្រយុទ្ធប្រឆាំងនឹងជំងឺកូវីដ-១៩ឡើយ។
សេចក្តីប្រកាសព័ត៌មានរបស់ក្រសួងការបរទេសកម្ពុជា ស្តីពីលទ្ធផលនៃកិច្ចប្រជុំខាងលើ បានស្រង់សម្តីរបស់លោកប្រមុខការទូតកម្ពុជា ទៅសរសេរដូច្នេះថា៖«ការធ្វើនយោបាយណាមួយ ទៅលើការផ្ទុះឡើងនៃជំងឺកូវីដ-១៩ ឬការលេងល្បែងស្តីបន្ទោសគ្នាដាក់គ្នា គឺបានត្រឹមតែកាត់បន្ថយនូវកិច្ចខិតខំប្រឹងប្រែងអន្តរជាតិ ប្រឆាំងនឹងជំងឺរាតត្បាតសាកលនេះប៉ុណ្ណោះ»។
ជាមួយគ្នានេះ ក្នុងនាមជាអ្នកតំណាងឲ្យរដ្ឋាភិបាលកម្ពុជា លោក ប្រាក់ សុខុន ជំរុញសហគមន៍អន្តរជាតិ ឲ្យគាំទ្រតួនាទីរបស់អង្គការសុខភាពពិភពលោក ខណៈវិស័យសុខាភិបាលតាមបណ្តាប្រទេសនានា កំពុងរងការវាយប្រហារ។ លោក លើកជាយោបល់ថា អង្គការសុខភាពពិភពលោក ត្រូវតែទទួលបានមធ្យោបាយគ្រប់គ្រាន់ ដើម្បីបំពេញបេសកកម្មបានកាន់តែល្អប្រសើរ។
លោករដ្ឋមន្ត្រី បន្ថែមថា មកដល់ពេលនេះ ស្ថានភាពជំងឺកូវីដ-១៩ កំពុងធូរស្រាលនៅតាមប្រទេសមួយចំនួន ដូច្នេះ វា ជាពេលវេលា ដែលត្រូវចាប់ផ្តើមរិះរកមធ្យោបាយ ដើម្បីស្តារសេដ្ឋកិច្ចឡើងវិញ ក្រោយជំងឺរាតត្បាតដ៏អាក្រក់នេះ កន្លងផុតទៅ។
ប្រទេសក្នុងតំបន់អាស៊ាន ទើបនឹងបើកកិច្ចប្រជុំជាមួយរុស្ស៊ី តាមរយៈការតភ្ជាប់វីដេអូ កាលពីថ្ងៃទី១៧ ខែមិថុនា ដើម្បីពិភាក្សាគ្នាពីការប្រយុទ្ធប្រឆាំងនឹងជំងឺកូវីដ-១៩នេះដែរ។
គិតត្រឹមថ្ងៃទី១៩ ខែមិថុនា ឆ្នាំ២០២០ អ្នកឆ្លងជំងឺកូវីដ-១៩ នៅលើសាកលលោក កើនឡើងដល់ជាង៨,៥លាននាក់ហើយ ដោយអាមេរិក ឈរលើគេបង្អស់ ក្នុងតារាងនៃប្រទេសដែលមានជំងឺកូវីដ-១៩ បន្ទាប់មក គឺប្រេស៊ីល រុស្ស៊ី ឥណ្ឌា អង់គ្លេស អេស្ប៉ាញ......៕
Tag:
ប្រាក់ សុខុន
COVID-19
© រក្សាសិទ្ធិដោយ thmeythmey.com
