ជាតិ
បទយកការណ៍ / បទសម្ភាសន៍
លោក ស៊ា សុផល៖ ពលរដ្ឋត្រូវការជំរុញពីអាជ្ញាធរ ដើម្បីឱ្យការងារបរិស្ថានមានភាពល្អប្រសើរ
×![]()
សៀមរាប៖ គេមើលឃើញថា ការចោលសំរាមពាសវាលពាសកាល នៅតែក្លាយជាបញ្ហាប្រឈមសម្រាប់សង្គម។ ពលរដ្ឋនៅតិចណាស់ដែលយល់បញ្ហានេះ ក្រៅពីនេះពួកគេនៅយល់ថា ការងារបរិស្ថានគឺជាទំនួលខុសត្រូវរបស់អាជ្ញាធរផ្តាច់មុខ។ លោក ស៊ា សុផល ជាអ្នកបរិស្ថានមួយរូបយល់ថា ដើម្បីឱ្យពលរដ្ឋយល់ពីបញ្ហានេះកាន់តែច្រើន ទាមទាមការជំរុញលើកទឹកចិត្តពីអាជ្ញាធរមូលដ្ឋាន និងស្ថាប័នពាក់ព័ន្ធ ពិសេសការអប់រំតាមសហគមន៍ឱ្យបានជាប្រចាំ ទើបការងារបរិស្ថាននេះមានភាពល្អប្រសើរទៅបាន។
ព័ត៌មានពិស្ដារ សូមស្ដាប់បទសម្ភាសរវាងអ្នកសារព័ត៌មានថ្មីៗ ជាមួយលោក ស៊ា សុផល ប្រធានអង្គការមូលនិធិទំពាំងស្នងឫស្សី ដូចតទៅ
រដ្ឋបាលសង្កាត់ចុងឃ្នៀស ដោយមានការគាំទ្រពីអង្គការមូលនិធិទំពាំងស្នងឫស្សី បានរៀបចំកម្មវិធីសម្អាតបរិស្ថានរដូវទឹកឡើង ក្នុងបំណងប្រមូលសំរាមប្លាស្ទិកមុនទឹកទន្លេសាបឡើងលិចភូមិនាពេលឆាប់ៗខាងមុខ។ កម្មវិធីដែលធ្វើនៅព្រឹកថ្ងៃទី២០ មិថុនា មានអ្នកចូលរួមប្រមាណ២០០នាក់ ក្នុងនោះមានក្រុមយុវជនសង្កាត់ ក្រុមអ្នកស្ម័គ្រចិត្តពីសណ្ឋាគារ និងក្រុមយុវជនមេត្រីភាពបរិស្ថានបឹងទន្លេសាប។
សម្រាប់លោក ស៊ា សុផល បញ្ហាសំរាមនៅតែចោទសម្រាប់សហគមន៍ជាប់បឹងទន្លេសាប ព្រោះថាពួកគេនៅខ្វះការអប់រំ និងការជំរុញពីអាជ្ញាធរឱ្យគិតគូរពីបញ្ហានេះ។ លោក សុផល គ្រោងបង្កើតគម្រោងមួយឈ្មោះថា «គម្រោងលើកកម្ពស់ជីវភាពសហគមន៍ អប់រំសុខភាព អនាម័យ និងបរិស្ថាន» ដោយគម្រោងនេះនឹងជ្រើសរើសគ្រួសារក្រីក្រ បំណងបង្កើនប្រាក់ចំណូលដល់ពួកគេ ដោយឱ្យជាកញ្ចប់ថវិកា ហើយឱ្យពួកគេរៀបចំ និងវេចខ្ចប់ឬញែកកាកសំណល់ឱ្យបានត្រឹមត្រូវ។ លោក សុផល បញ្ជាក់ថា គម្រោងនេះនឹងចាប់ផ្តើមដំបូងនៅសហគមន៍ពាមតាអួរ ស្ថិតនៅឃុំមេជ្រៃ ស្រុកពួក ខេត្តសៀមរាប។
គួរបញ្ជាក់ថា កម្មវិធីសម្អាតបរិស្ថានរដូវទឹកឡើងនៅឆ្នាំនេះ នឹងធ្វើឡើងនៅតំបន់៣សំខាន់ៗ មានសង្កាត់ចុងឃ្នៀស សហគមន៍ឃុំកំពង់ឃ្លាំង និងសហគមន៍មេជ្រៃ។ អង្គការមូលនិធិទំពាំងស្នងឫស្សី បានជ្រើសរើសសង្កាត់ចុងឃ្នៀស សម្រាប់រៀបចំកម្មវិធីសម្អាតធំ និងមានមនុស្សចូលរួម តែបានគោរពតាមគោលការណ៍ណែនាំរស់ក្រសួងសុខាភិបាល ក្នុងការរក្សាគំលាត២ម៉ែត្រពីគ្នា។ ក្រៅពីនេះ គឺសហគមន៍កំពង់ឃ្លាំង និងមេជ្រៃ អង្គការបានផ្តល់ជាថវិកា និងកញ្ចប់មនុស្ស ដើម្បីឱ្យអាជ្ញាធរចុះចែក និងអប់រំពីបញ្ហាអនាម័យដល់មូលដ្ឋាន។ល៕
Tag:
បរិស្ថាន
ទន្លេសាប
© រក្សាសិទ្ធិដោយ thmeythmey.com
