«ប្រាសាទយាយព័ន្ធ» និមិត្តសញ្ញាចម្បងនៃខេត្តកំពង់ធំ

ជាតិ

សង្គមជាតិ

«ប្រាសាទយាយព័ន្ធ» និមិត្តសញ្ញាចម្បងនៃខេត្តកំពង់ធំ

21, Jun 2020 , 5:19 pm

រូបភាព

ប្រាសាទយាយព័ន្ធ ឬប្រាសាទនាគព័ន្ធ នៅក្នុងតំបន់ប្រសាទសំបូរព្រៃគុក។

ដោយ: អ៊ូ សុខមាន (OU Sokmean)

សាងសង់ឡើងដោយព្រះបាទឦសានវរ្ម័នទី១ នាដើមសតវត្សទី៧ ប្រាសាទយាយព័ន្ធ ឬនាគព័ន្ធ នៅរមណីដ្ឋានប្រាសាទសំបូរគ្រៃគុក ត្រូវបានក្រសួងមហាផ្ទៃ ជ្រើសរើសធ្វើជានិមិត្តសញ្ញាចម្បងតំណាងឲ្យខេត្តកំពង់ធំ។

តាមសេចក្តីសម្រេចរបស់ក្រសួងមហាផ្ទៃកាលពីថ្ងៃទី១ ខែមេសា ឆ្នាំ២០១៩ រូបប្រាសាទយាយព័ន្ធ តំណាងឲ្យភាពរុងរឿងនៃស្ថាបត្យកម្មខ្មែរនាសតវត្សទី៧ ដែលមាននៅក្នុងតំបន់ប្រាសាទសំបូរព្រៃគុក នាទឹកដីខេត្តកំពង់ធំ និងតំណាងឲ្យជំនឿរបស់ខ្មែរបុរាណក្នុងការគោរពព្រហ្មញ្ញសាសនា។ និមិត្តសញ្ញានេះ ត្រូវប្រើប្រាស់ជាផ្លូវការលើឯកសារស្នាមម្រាប់រដ្ឋបាលខេត្តកំពង់ធំ ដែលក្រៅពីរូបប្រាសាទយាយព័ន្ធ មានរូបបដិមាតោ រូបដំរីជាន់ខ្លា កួរស្រូវ និងដើមឈើ។

ប្រាសាទនាគព័ន្ធ ឬយាយព័ន្ធ ប្រាសាទសំបូរព្រៃគុក ដែលស្ថិតនៅភូមិអូរគ្រូកែ ឃុំសំបូរ ស្រុកប្រាសាទសំបូរ ខេត្តកំពង់ធំ។ តាមឯកសាររដ្ឋបាលខេត្ត ប្រាសាទនាគព័ន្ធ ឬប្រាសាទយាយព័ន្ធ ជាសំណង់តួប៉មកណ្តាលនៃក្រុមប្រាសាទខាងត្បូង នៅតំបន់រមណីយដ្ឋានប្រវត្តិសាស្ត្រ ដែលអមដោយតួប៉មបន្ទាប់បន្សំចំនួន៧ទៀត។ សំណង់នេះ ត្រូវបានកសាងឡើងសម្រាប់ឧទ្ទិសចំពោះព្រះសិវៈ។

ក្រុមប្រាសាទតោ ស្ថិតចំកណ្តាលនៃតំបន់ប្រាសាទសំបូរព្រៃគុក។ ‬

ក្រុមការងារសារព័ត៌មានថ្មីៗ បានសាកសួរព័ត៌មានបន្ថែមពីលោក សេង មឿន នាយកផ្នែកនគរបាលទេសចរណ៍នៅតំបន់ប្រាសាទសំបូរព្រៃគុក ដោយលោកបានបញ្ជាក់ថា ប្រាសាទយាយព័ន្ធ មានកម្ពស់២៥ម៉ែត្រ និងជាប្រាសាទដែលខ្ពស់ជាងគេក្នុងចំណោមប្រាសាទ២៩៣នៅតំបន់ប្រាសាទសំបូរព្រៃគុក។

លោក បានបន្តថា ប្រាសាទយាយពន្ធ័នេះ គឺជាក្រុមប្រាសាទខាងត្បូងនៃតំបន់ប្រាសាទសំបូរព្រៃគុក ដែលស្ថិតនៅចំកណ្តាលហ៊ុំពន្ធ័ដោយប្រាសាទជាច្រើន និងមានកំពែងពីរជាន់ ដែលកំពែងខាងក្នុងមាន តោបុរៈ ចូលទាំងបួនទិស។

ប្រាសាទយាយព័ន្ធ ជាក្រុមប្រាសាទដែលស្ថិតនៅភាគត្បូងនៃតំបន់ប្រាសាទសំបូរព្រៃគុក។ ‬

បើតាមលោក សេង មឿន ប្រាសាទយាយព័ន្ធនេះ មានរាងចតុកោណកែង ស្ថាបនាឡើងពីឥដ្ឋ ដោយនៅលើខឿនមានក្រាលដោយថ្មភក់ ដែលបានសាងសង់ឡើងនៅក្នុងរជ្ជកាលព្រះបាទឦសានវរ័ន្មទី១ ចន្លោះឆ្នាំ៦១៦-៦៣៧ ដើម្បីឧទ្ទិសថ្វាយដល់ព្រះឥសូរជាអាទិទេពនៃព្រហ្មញ្ញសាសនា នាសម័យចេឡានចុងសតវត្សរ៍ទី៦ និងដើមសតវត្សរ៍ទី៧។ លោកបានអះអាងប្រាប់សារព័ត៌មានថ្មីៗដូច្នេះ៖« បន្ទាប់ពីប្រាសាទសំបូរ ប្រាសាទយាយព័ន្ធនេះ គឺជាប្រាសាទដែលចំណាស់ជាងគេផងដែរ»។

នៅក្នុងតំបន់ប្រាសាទសំបូរព្រៃគុក ដែលមានផ្ទៃដី៣,០០០ហិកតា ត្រូវបានដាក់បញ្ចូលក្នុងបញ្ជីសម្បត្តិបេតិកភណ្ឌពិភពលោករបស់អង្គការយូណេស្កូ កាលពីថ្ងៃទី៨ កក្កដា ឆ្នាំ២០១៧ នៅទីក្រុងក្រាខូវ សាធារណរដ្ឋប៉ូឡូញ៕