សង្គមអន្តរជាតិ
អន្តរជាតិ
លោក ត្រាំ មិនទាន់ដាក់ទណ្ឌកម្មលើចិនរឿងបំពានសិទ្ធិមនុស្សនៅស៊ីនជាំង ព្រោះគិតគូរពីពាណិជ្ជកម្ម ប្រធានាធិបតីអាមេរិក ដូណាល់ ត្រាំ ចាប់ដៃប្រធានាធិបតីចិន ស៊ី ជិនភីង នាជំនួបនៅជប៉ុន។ រូបភាព Xinhua
× ប្រធានាធិបតីអាមេរិក ដូណាល់ត្រាំ បានថ្លែងប្រាប់ក្នុងកិច្ចសម្ភាសមួយថា លោកពន្យារពេលមិនទាន់ដាក់ទណ្ឌកម្មលើមន្ត្រីជាន់ខ្ពស់ចិនពាក់ព័ន្ធលើការធ្វើទុក្ខបុកម្នេញលើជនជាតិភាគតិចមូស្លីមវីហ្គ័រ នៅតំបន់ស៊ីនជាំង ដោយខ្លាចប៉ះពាល់ដល់ការចរចាពាណិជ្ជកម្ម។
« យើងកំពុងស្ថិតនៅក្នុងកិច្ចចរចារពាណិជ្ជកម្មយ៉ាងធំមួយ។ ហើយខ្ញុំទើបតែសម្រេចកិច្ចសន្យាលក់ទំនិញតម្លៃជាង២៥០ពាន់លានដុល្លារ។ ហើយដូចដែលអ្នកឃើញហើយចិនទិញច្រើនណាស់»។ នេះជាការអះអាងរបស់លោក ដូណាល់ ត្រាំ នៅក្នុងកិច្ចសម្ភាសជាមួយសារព័ត៌មាន Axios នៅថ្ងៃទី២១ ខែមិថុនា ទាក់ទងមូលហេតុដែលលោកមិនទាន់ដាក់បញ្ជាឲ្យក្រសួងរតនាគារដាក់ទណ្ឌកម្មលើមន្ត្រីបក្សកុម្មុយនីស្តចិនពាក់ព័ន្ធនឹងការរំលោភយ៉ាងធ្ងន់ធ្ងរទៅលើសិទ្ធិជនជាតិវីហ្គ័រនៅស៊ីនជាំង។
កាពន្យារពេលដាក់ទណ្ឌកម្មនេះ ត្រូវបានគេយល់ឃើញថា ដើម្បីជៀសវាងភាពរកាំរកូសសារជាថ្មីក្នុងការធ្វើពាណិជ្ជកម្មជាមួយចិន ក៏ដូចជាការអនុវត្តកិច្ចព្រមព្រៀងពាណិជ្ជកម្មដំណាក់កាលទី១ផងដែរ។ នៅក្នុងកិច្ចព្រមព្រៀងពាណិជ្ជកម្មដំណាក់កាលទី១ ដែលចរចាបានសម្រេចក្នុងឆ្នាំ២០១៩ និងដែលបានចូលជាធរមានក្នុងខែកុម្ភៈឆ្នាំ២០២០នេះ ចិនយល់ព្រមបង្កើនការទិញទំនិញ និងសេវាពីអាមេរិកឲ្យបានយ៉ាងតិចណាស់២០០ពាន់លានដុល្លារក្នុងរយៈពេល២ឆ្នាំ។
សូមបញ្ជាក់ថា លោកត្រាំ បានចុះហត្ថលេខាលើច្បាប់ដែលដាក់ទណ្ឌកម្មលើមន្ត្រីចិនដែលពាក់ព័ន្ធនឹងការធ្វើទុកបុកម្នេញ និងរំលោភសិទ្ធិជនជាតិភាគតិចមូស្លីមវីហ្គ័រនៅថ្ងៃទី១៧ ខែមិថុនា។ ប៉ុន្តែ លោកត្រាអះអាងថា ចំណាត់ការក្នុងការដាក់ទណ្ឌកម្មជាសិទ្ធិរបស់លោក។
ទោះបីជាលោកត្រាំមិនទាន់ដាក់ទណ្ឌកម្មដូចជាការបង្កកទ្រព្យសម្បត្តិយ៉ាងណាក្តី ក្រសួងការបរទេស និងក្រសួងពាណិជ្ជកម្មអាមេរិកតាំងតែពីខែកញ្ញាឆ្នាំ២០១៩មក បានដាក់ទណ្ឌកម្មរឹតត្បិតការនាំចូលពីក្រុមហ៊ុនរដ្ឋចិនចំនួន២១ និងក្រុមហ៊ុនចំនួន១៦ផ្សេងទៀតដែលជាប់ពាក់ព័ន្ធការរំលោភសិទ្ធិមនុស្សនៅភាគខាងលិចចិន។ បន្ថែមពីនេះ អាមេរិកក៏បានរឹតបន្តឹងការផ្តល់ទិដ្ឋាការដល់មន្ត្រីបក្សកុម្មុយនីស្តចិនដែលជាប់ពាក់ព័ន្ធបញ្ហានេះផងដែរ។
ជនជាតិភាគតិចមូស្លីមវីហ្គ័រចំនួនច្រើនជាង១លាននាក់ ត្រូវបានអង្គការសហប្រជាជាតិប៉ាន់ស្មានថា ត្រូវបានគេចាប់បង្ខាំងក្នុងជំរំជាច្រើន។ ក្រសួងការបរទេសអាមេរិក បានចោទចិនថាបំពានសិទ្ធិ និងធ្វើទារុណកម្មលើជនជាតិវីហ្គ័រទាំងនោះ។ ចិនវិញ បានទាត់ចោលនូវការចោទប្រកាន់ទាំងឡាយដោយអះអាងថា ជំរំទាំងអស់នោះសម្រាប់ការបណ្តុះបណ្តាលវិជ្ជាជីវៈ និងប្រឆាំងក្រុមជ្រុលនិយម។
ប៉ុន្តែនៅក្នុងសៀវភៅ The Room Where It Happened របស់លោក ចន ប៊ូលតុន អតីតទីប្រឹក្សាសន្តិសុខជាតិរបស់លោក ត្រាំ បានសរសេរថា លោកត្រាំ បានស្វែងរកជំនួយពីលោកប្រធានាធិបតីចិនឲ្យលោកអាចជាប់ឆ្នោតអាណត្តិទី២។ មិនតែប៉ុណ្ណោះ លោក ប៊ូលតុន ក៏បានចោទថា លោក ត្រាំ ខ្លួនឯផ្ទាល់ ដែលជាអ្នកលើកទឹកចិត្តឲ្យលោកស៊ី ជិនភីង បន្តសាងសង់ជំរំទាំងនោះ។ លោក ត្រាំ ក៏ដូចជារដ្ឋមន្ត្រីការបរទេស ម៉ៃ ប៉ុមប៉េអូ និងទីប្រឹក្សាពាណិជ្ជកម្ម Peter Navarro សុទ្ធតែចេញមុខបដិសេធ៕
Tag:
ចិន
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com