COVID-19
ជាតិ
មេសហជីព១៣ស្ថាប័ន ស្នើឲ្យក្រសួងការងារ បើកប្រាក់អតីតភាពការងារដល់កម្មករ
លោក ប៉ាវ ស៊ីណា កំពុងផ្ដល់បទសម្ភាសន៍ដល់ក្រុមសារព័ត៌មាននៅព្រឹកថ្ងៃទី២២ មិថុនា ពេលយកលិខិតទៅដាក់នៅក្រសួងការងារ។ (រូបពីទំព័រហ្វេសប៊ុករបស់លោក ប៉ាវ ស៊ីណា)
×![]()
ដោយ: ឡាយ សុភាវតី
ភ្នំពេញ៖ មេសហជីពមកពី១៣ស្ថានប័ន បានដាក់លិខិតស្នើឲ្យរដ្ឋមន្រី្តក្រសួងការងារ និងបណ្ដុះបណ្ដាលវិជ្ជាជីវៈ និងនិយោជកបើកប្រាក់អតីតភាពការងារឆ្នាំ២០១៩ និងឆ្នាំ២០២០ ដល់កម្មករនៅអំឡុងពេលជំងឺកូវីដ-១៩។ មេសហជីពពី១៣ស្ថានប័ន បានជួបជុំគ្នាដាក់លិខិតនៅក្រសួងការងារ នៅថ្ងៃទី២២ មិថុនា។ 
លោក អាត ធន់ ប្រធានសហភាពការងារកម្ពុជាថ្លែងប្រាប់សារព័ត៌មានថ្មីៗនៅព្រឹកថ្ងៃទី២២ មិថុនានេះថា ប្រាក់អតីតភាពនេះ ជាផ្នែកមួយសំខាន់ណាស់ សម្រាប់កម្មករក្នុងការជួយដោះស្រាយបញ្ហាជីវភាពប្រចាំថ្ងៃ នៅក្នុងអំឡុងពេលកូវីដ-១៩។ លោក អាត ធន់ ស្នើឲ្យក្រសួងការងារពិចារណាឡើងវិញ ពីភាពខុសគ្នា រវាងការខ្វះខាតរបស់កម្មករ និងនិយោជក។ លោក ថ្លែងថា៖ «កម្មករខ្វះខាតគឺដាច់បាយហូប។ ចំណែកនិយោជកខ្វះខាត គឺគ្រាន់ជាការខាតផលចំណេញពីជំនួញប៉ុណ្ណោះ ហើយកន្លងមកនិយោជកបានត្រៀមប្រាក់ទុករួចហើយតាមច្បាប់ស្ដីពីការងារសម្រាប់កម្មករ»។
ការដាក់លិខិតស្នើទៅក្រសួងការងារនេះ ធ្វើឡើងបន្ទាប់ពីក្រសួងការងារបានប្រកាសពន្យារពេលបើកប្រាក់អតីតភាពការងារ នៅឆ្នាំ២០១៩និងឆ្នាំ២០២០ ដោយប្តូរទៅបើកនៅឆ្នាំ២០២១វិញ។ ការសម្រេចរបស់ក្រសួងការងារ គឺដើម្បីសម្រួលដល់ម្ចាស់រោងចក្រ និងម្ចាស់សហគ្រាស។
ក្រសួងការងារ បានទទួលលិខិតពីមេសហជីពហើយ ប៉ុន្តែក្រសួងស្នើឱ្យសាធារណៈទាំងអស់ពិនិត្យ និងអនុវត្តតាមសេចក្តីជូនដំណឹងរបស់ក្រសួងកន្លងមកវិញ។ នេះជាការបញ្ជាក់របស់អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ។
អ្នកនាំពាក្យក្រសួងការងាររូបនេះ បានអះអាងប្រាប់សារព័ត៌មានថ្មីតាមប្រព័ន្ធតេឡេក្រាមថា «បុគ្គលជានិត្តិបុគ្គលឬរូបវ័ន្តបុគ្គលទាំងអស់ មានសិទ្ធិធ្វើញត្តិនិងដាក់ញត្តិ។ យើងបានទទួលហើយសង្ឃឹមថាគ្រប់បុគ្គលទាំងអស់នឹងអានសេចក្តីជូនដំណឹងក្រសួងសារជាថ្មី ហើយរួមគ្នាអនុវត្តតាមសេចក្តីជូនដំណឹងរបស់ក្រសួងដែលមានន័យគ្រប់គ្រាន់ត្រឹមត្រូវ សម្រាប់ជួយរក្សាការងារមនុស្សរាប់លាននាក់ក្នុងកាលៈទេសៈនេះ។ ប្រសិនជារោងចក្រ សហគ្រាសកំពុងមានស្ថានភាពធម្មតា ឬមានលទ្ធភាព នោះប្រហែលជាមិនមានករណីរោងចក្រសហគ្រាសកំពុងព្យួរការងារនោះទេ»។
លោក ប៉ាវ ស៊ីណា ប្រធានសហភាពចលនាកម្មករកម្ពុជា សង្ឃឹមថាភាគីក្រសួងការងារនឹងពិចារណាតាមសំណើររបស់សហជីព ដែលធ្វើឡើងដើម្បីប្រយោជន៍កម្មករនិយោជិត។ បើតាមលោក ប៉ាវ ស៊ីណា និយោជកមានលទ្ធភាពបើកប្រាក់ឲ្យកម្មករ ព្រោះប្រាក់អតីតភាពការងារក្នុងម្នាក់ប្រមាណ៨០ទៅ១០០ដុល្លារ។
«និយោជកមានលទ្ធភាពប្រើប្រាក់ឲ្យកម្មករ ព្រោះការរងផលប៉ះពាល់ដោយសារកូវីដ-១៩ ទើបតែកើតមាន ហើយនិយោជកក៏មិនដល់ថ្នាក់គ្មានលទ្ធភាពបើកប្រាក់អតីតភាពដល់កម្មករឡើយ» ។នេះបើតាមការអះអាងរបស់លោក ប៉ាវ ស៊ីណា ដោយបន្ថែមទៀតថា បើក្រសួងមិនដំណោះស្រាយ ក្រុមសហជីពនឹងបន្តដាក់លិខិតទៅរដ្ឋាភិបាលបន្តទៀត៕
Tag:
សហជីព
ប្រាក់អតីតភាព
© រក្សាសិទ្ធិដោយ thmeythmey.com
