COVID-19
ជាតិ
លោក អ៊ុំ រាត្រី សុំពិភាក្សាជាមួយភាគីថៃ ពីការបើកច្រកប៉ោយប៉ែតឡើងវិញ ច្រកប៉ោយប៉ែត កាលពីមិនទាន់បិទ
× លោក អ៊ុំ រាត្រី អភិបាលខេត្តបន្ទាយមានជ័យ បានដាក់លិខិតទៅកាន់លោក Woraphan Suwannus អភិបាលខេត្តស្រះកែវ ប្រទេសថៃ ដើម្បីពិភាក្សាគ្នាពីការបើកច្រកទ្វារព្រំដែនអន្តរជាតិប៉ោយប៉ែត-ខ្លងលឹក ឲ្យប្រជាពលរដ្ឋចេញចូលឡើងវិញ។
យោងតាមលិខិតនោះ លោក អ៊ុំ រាត្រី សុំជួបពិភាក្សាជាមួយអភិបាលខេត្តស្រះកែវ នៅព្រឹកថ្ងៃទី២៣ ខែមិថុនា ឆ្នាំ២០២០។ លោក ប្រាប់ អភិបាលខេត្តស្រះកែវ ថា ការសុំជួបពិភាក្សានាពេលនេះ គឺដោយសារតែស្ថានភាពនៃការឆ្លងដែន និងការទប់ស្កាត់ជំងឺកូវីដ-១៩ ស្ថិតក្នុងភាពព្រួយបារម្ភខ្លាំង។
លោក អ៊ុំ រាត្រី មិនអាចផ្តល់ព័ត៌មានបន្ថែមឡើយ នៅថ្ងៃទី២២ ខែមិថុនានេះ ដោយលោក អះអាងថា កំពុងជាប់ប្រជុំ។ លោក កុយ គួង
អ្នកនាំពាក្យការបរទេស ប្រាប់សារព័ត៌មានថ្មីៗ តាមទូរស័ព្ទថា ភាគីថៃ ឆ្លើយតបយ៉ាងចំពោះការសុំបើកព្រំដែន គឺជាសិទ្ធិអធិបតេយ្យរបស់គេ។ លោក បញ្ជាក់ថា៖«រឿងព្រំដែន កាលណាបិទ ភាគីម្ខាង សម្រេចបិទ គឺជិតហើយ តែដល់ពេលបើកវិញ ទាល់តែភាគីទាំងពីរបើក ទើបអាចបើកបាន»។
ក្រោយស្ថានភាពជំងឺកូវីដ-១៩ ហាក់ធូរស្រាល ថៃ បានលុបបម្រាមគោចរ ដោយអនុញ្ញាតឲ្យប្រជាជន ធ្វើដំណើរជាធម្មតាឡើងវិញ ក្នុងផ្ទៃប្រទេស។ តែថៃ នៅមិនទាន់បើកប្រទេស ឲ្យមានការចេញ-ចូលឡើយ។ គិតត្រឹមថ្ងៃទី២២ ខែមិថុនា ឆ្នាំ២០២០ ថៃ មានអ្នកឆ្លងជំងឺកូវីដ-១៩ ៣១៥១នាក់ ជាសះស្បើយ៣០២២នាក់ និង ស្លាប់៥៨នាក់។
ចំណែកជាមួយវៀតណាម កម្ពុជា បានយល់ព្រមអនុញ្ញាតឲ្យប្រជាពលរដ្ឋប្រទេសទាំងពីរចេញចូលវិញហើយ។ មកដល់ថ្ងៃទី២២ ខែមិថុនា វៀតណាម មានអ្នកឆ្លងជំងឺកូវីដ-១៩ ៣៤៩នាក់ ជាសះស្បើយ៣២៨នាក់ ដោយមិនមានអ្នកស្លាប់។
រីឯកម្ពុជា មានអ្នកឆ្លងជំងឺកូវីដ-១៩ ១២៩នាក់ ជាសះស្បើយ១២៨នាក់ ដោយគ្មានអ្នកស្លាប់ (គិតត្រឹមថ្ងៃទី២២ ខែមិថុនា)៕
Tag:
COVID-19
កម្ពុជា-ថៃ
បើកព្រំដែន
© រក្សាសិទ្ធិដោយ thmeythmey.com