បើតាមសម្ដេច ហ៊ុន សែន ប្រាក់ឧបត្ថម្ភដល់គ្រួសារក្រីក្រ និងងាយរងគ្រោះ នៅទីប្រជុំជនក្នុងរាជធានីភ្នំពេញ គឺអនុវត្តទៅតាមកម្រិតក្រីក្រ (១) និងក្រីក្រ(២) ។ ក្នុងនោះគ្រួសារមានបណ្ណសមធម៌ទាំងពីរកម្រិតនេះ នឹងទទួលបានប្រាក់១២ម៉ឺនរៀលដូចគ្នា ។ ក្រៅពីទឹកប្រាក់ឧបត្ថម្ភរួមនេះ សមាជិកក្នុងគ្រួសារ១នាក់ ក៏ទទួលបានថវិកា៥២០០០រៀលដែរ សម្រាប់ក្រីក្រកម្រិត(១) និងទឹកប្រាក់៣៦,០០០រៀល សម្រាប់កម្រិតក្រីក្រ(២) ។ ដោយឡែក កុមារអាយុ៥ឆ្នាំចុះក្រោម ,ជនពិការភាព ,មនុស្សចាស់វ័យ៦០ឆ្នាំឡើងទៅ និងសមាជិកផ្ទុកជំងឺអេដស៍ ក្នុងគ្រួសារកម្រិតក្រីក្រ(១) ទទួលបានថវិកា៤០,០០០រៀលក្នុង១នាក់ និងថវិកា២៨០០០រៀល សម្រាប់សមាជិក១នាក់នៃគ្រួសារក្រីក្រកម្រិត(២)។
 

សម្រាប់ប្រាក់ឧបត្ថម្ភដល់គ្រួសារក្រីក្រ និងងាយរងគ្រោះ នៅទីប្រជុំជនក្រៅពីរាជធានីភ្នំពេញ ក៏អនុវត្តទៅតាមកម្រិតក្រីក្រ (១) និងក្រីក្រ(២) គ្រួសារមានបណ្ណសមធម៌ទាំងពីរកម្រិតនេះ នឹងទទួលបានប្រាក់១២ម៉ឺនរៀលដូចគ្នា ។ រីឯទឹកប្រាក់ឧបត្ថម្ភដោយឡែក សម្រាប់សមាជិកក្នុងគ្រួសារដទៃទៀត នៃកម្រិតក្រីក្រ(១) គឺ ទទួលបានថវិកា៤០,០០០រៀលក្នុង១នាក់ និងថវិកា២៨០០០រៀល សម្រាប់សមាជិក១នាក់នៃគ្រួសារក្រីក្រកម្រិត(២)។
 

ចំណែកប្រាក់ឧបត្ថម្ភដល់គ្រួសារក្រីក្រ និងងាយរងគ្រោះ នៅទីជនបទ គឺទាបជាងក្នុង និងក្រៅរាជធានីភ្នំពេញបន្តិច ដោយគ្រួសារមានបណ្ណសមធម៌ទាំងពីរកម្រិត នឹងទទួលបានប្រាក់៨ម៉ឺនរៀលដូចគ្នា។ សម្រាប់សមាជិកក្នុងគ្រួសារដទៃទៀត នៃកម្រិតក្រីក្រ(១) គឺ ទទួលបានថវិកា២៤,០០០រៀលក្នុង១នាក់ និងថវិកា១៦,០០០រៀល សម្រាប់សមាជិក១នាក់នៃគ្រួសារក្រីក្រកម្រិត(២)។
 

ប៉ុន្តែសិនជាសមាជិកគ្រួសារមានចំនួនច្រើន ស្របតាមលក្ខខណ្ឌដែលបានកំណត់នោះ ពួកគេនឹងទទួលបានថវិកាបន្ថែម តាមចំនួននោះផងដែរ។ ត្រង់ចំណុចនេះ សម្ដេច ហ៊ុន សែន បានពន្យល់ថា បើក្នុងគ្រួសារនោះ មានកុមារអាយុក្រោម៥ឆ្នាំ ចំនួន៣នាក់ គឺពួកគេអាចទទួលបានប្រាក់១២ម៉ឺនរៀល សម្រាប់គ្រួសារក្រីក្រកម្រិត(កុមារម្នាក់៤០០០០រៀល) និងទឹកប្រាក់៨៤០០០រៀល សម្រាប់កម្រិត(២) ។ ហើយបើមានមនុស្សចាស់វ័យលើស៦០ឆ្នាំ ចំនួន ៤នាក់ គ្រួសារនោះ អាចទទួលបានប្រាក់១៦ម៉ឺនរៀល សម្រាប់គ្រួសារក្រីក្រកម្រិត(មនុស្សចាស់ម្នាក់៤០០០០រៀល) និងទឹកប្រាក់១១២,០០០រៀល សម្រាប់កម្រិត(២)។
 

ដូច្នេះបើស្ថានភាពគ្រួសារ ដូចអ្វីដែលសម្ដេច ហ៊ុន សែន ពន្យល់មែននោះ គ្រួសារនីមួយៗទំនងជាអាចទទួលបានថវិកាចន្លោះពី៥០ដុល្លារ ទៅជាង១០០ដុល្លារក្នុងមួយខែ សម្រាប់ដោះស្រាយបញ្ហាជីវភាពរបស់ពួកគេ។ នេះជាការបញ្ជាក់របស់ប្រមុខរដ្ឋាភិបាល ដែលចង់ឆ្លើយតបទៅអ្នករិះគន់ថា ថវិកាឧបត្ថម្ភរបស់រដ្ឋ ទៅពលរដ្ឋក្រីក្រ និងងាយរងគ្រោះនេះ មានចំនួនតិចតួច មិនស្របនឹងស្ថានភាពជាក់ស្ដែង៕