អន្តរជាតិ
ប្អូនប្រុសនាយករដ្ឋមន្ត្រីសិង្ហបុរី ចូលរួមជាមួយបក្សប្រឆាំង មុនការបោះឆ្នោតសភា
លោក លី សៀនយ៉ាង ប្អូនប្រុសលោក លី សៀនឡុង នាយករដ្ឋមន្រ្តីសិង្ហបុរី ។ រូបភាព Strait Times
×![]()
ដោយ: តន ចាន់រិទ្ធារ៉ា
លោក លី សៀនយ៉ាង ប្អូនបង្កើតនាយករដ្ឋមន្ត្រីសិង្ហបុរី លី សៀនឡុង បានចូលរួមជាមួយគណបក្សប្រឆាំងរបស់ប្រទេសនេះ។ ការចូលរួមនេះ ធ្វើឡើងមុនការបោះឆ្នោតជ្រើសរើសសមាជិកសភានៅខែកក្កដា ដែលនាំទៅរកការបង្កើតរដ្ឋាភិបាលថ្មីផងដែរ។ ប៉ុន្តែលោក លី ជាប្អូននេះ មិនទាន់បញ្ជាក់ថា នឹងចូលរួមការបោះឆ្នោតឬយ៉ាងណាឡើយ។
លោក Tan Cheng Bock ប្រធានបក្សសិង្ហបុរីជឿនលឿន បានប្រគល់បណ្ណសមាជិកបក្សដល់លោក លី សៀនយ៉ាង អំឡុងពេលកម្មវិធីអាហារពេលព្រឹកនៅថ្ងៃទី២៤ ខែមិថុនា។ លោក Tan ធ្លាប់ជាមន្ត្រីជាន់ខ្ពស់ម្នាក់របស់បក្សសកម្មភាពប្រជាជន (PAP) ដែលកាន់អំណាចនៅសិង្ហបុរីតាំងពីឯករាជ្យនៅឆ្នាំ១៩៦៥ មក មុននឹងបង្កើតបក្សនយោបាយថ្មីនៅឆ្នាំ២០១៩ ។
បើតាមលោក Tan លោក លី ជាសមាជិកបក្សរបស់លោកយូរមកហើយ ប៉ុន្តែការផ្ទុះឡើងជំងឺ COVID-19 ធ្វើឲ្យខកខានដល់ការប្រកាសសមាជិកភាពជាផ្លូវការ ហើយពន្យារពេលមកដល់ពេលនេះ។ នេះបើតាមការផ្សាយរបស់សារព័ត៌មានសិង្ហបុរី The Strait Times ។ តាមពិតទៅ ព័ត៌មានដែលលោក លី ចូលរួមជាមួយបក្សប្រឆាំងនេះ ត្រូវបានផ្សព្វផ្សាយយូរមកហើយដែរ ព្រោះគេឃើញវត្តមានលោក និងលោក Tan ជាញឹកញាប់។
យ៉ាងណាមិញ ទាំងលោក Tan ទាំងលោក លី មិនទាន់បញ្ជាក់ថា ប្អូនប្រុសនាយករដ្ឋមន្ត្រី លី សៀនឡុង រូបនេះ នឹងចូលរួមក្នុងការបោះឆ្នោតសភាដែលនឹងធ្វើនៅថ្ងៃទី១០ ខែកក្កដាខាងមុខ។ លោក លី សៀនយ៉ាង ប្រាប់អ្នកសារព័ត៌មានថា លោកនឹងប្រកាសពីរឿងនេះតាមក្រោយ។ បើចូលប្រជែងកៅអីសមាជិកសភាមែននោះ លោក លី ត្រូវប្រឈមមុខជាមួយបក្ស PAP ដែលកាន់អំណាចរាប់សិបឆ្នាំរបស់បងប្រុសបង្កើតរបស់លោកមិនខាន។
បងប្អូនត្រកូល លី បានផ្ទុះជម្លោះគ្រួសារដ៏គួរឲ្យភ្ញាក់ផ្អើលមួយនៅឆ្នាំ២០១៨ លើផ្ទះសម្បែងបន្សល់ទុកដោយឪពុកលោក លី ក្វាន់យូ ។ លោក លី សៀនយ៉ាង និងប្អូនស្រី លី វិនលីង អះអាងថា លោក លី ជាឪពុកសរសេរបណ្ដាំឲ្យកម្ទេចផ្ទះចោល តែលោក លី សៀនឡុង មិនព្រម។ បិតាស្ថាបនិកសិង្ហបុរីរូបនេះ បានស្លាប់នៅឆ្នាំ២០១៥ ។ ជម្លោះរវាងបងប្អូនត្រកូល លី ដែលមានប្អូនស្រីម្នាក់ទៀត បានស្ងប់ស្ងាត់ ប៉ុន្តែភាពមិនចុះសម្រុងចេះតែមានរហូតមក។
ពាក់ព័ន្ធការបោះឆ្នោតវិញ បក្សកាន់អំណាច PAP ទំនងត្រូវជួបគូប្រជែងច្រើនសម្រាប់ការបោះឆ្នោតលើកនេះ។ បក្សប្រឆាំងចំនួន១២ អាចនឹងចូលរួមដណ្ដើមអាសនសភា។ កាលពីការបោះឆ្នោតឆ្នាំ២០១៥ បក្ស PAP ទទួលបានកៅអីសភា៨៣ ដែលជាចំនួនលើសលប់ក្នុងចំណោមអាសនសរុប៩១ ។ បក្សកម្មករ ជាបក្សប្រឆាំងតែមួយគត់មានសំឡេងក្នុងសភា ក្នុងនោះ ៦នាក់ជាប់តាមការបោះឆ្នោត និងបីនាក់ទៀត ជាប់ក្នុងនាមបេក្ខជនមិនជាប់ឆ្នោតដែលទទួលបានសំឡេងច្រើនជាងគេ៕
Tag:
សិង្ហបុរី
លីន សៀនឡុង
© រក្សាសិទ្ធិដោយ thmeythmey.com
