COVID-19
អន្តរជាតិ
ចិន ត្រៀមធ្វើសាកល្បងវ៉ាក់សាំង COVID-19 លើមនុស្សនៅអេមីរ៉ាតអារ៉ាប់រួម ដបថ្នាំ ដែលមានគេសរសេរថា វ៉ាក់សាំង COVID-19 ។រូបភាព៖ Reuters
× ក្រុមហ៊ុនរដ្ឋចិន China National Biotec Group (CNBG) បានទទួលការអនុញ្ញាតក្នុងការធ្វើតេស្តសាកល្បងវ៉ាក់សាំងការពារកូរ៉ូណាវីរុសលើមនុស្សក្នុងដំណាក់កាល៣នៅអេមីរ៉ាតអារ៉ាប់រួម។ នេះបើតាមការអះអាងរបស់ក្រុមហ៊ុនរដ្ឋចិនមួយនេះ នៅថ្ងៃទី២៣ ខែមិថុនា។
ចិន គឺជាប្រទេសផ្ទុះកូរ៉ូណាវីរុសដំបូងគេបំផុត ប៉ុន្តែប្រទេសនេះ ក៏បានព្យាបាលអ្នកជំងឺCOVID-19 ស្ទើរតែជាសះស្បើយទាំងអស់ផងដែរ។ ដោយសារតែបញ្ហាខ្វះអ្នកជំងឺកូរ៉ូណាវីរុស ដើម្បីធ្វើតេស្តលើវ៉ាក់សាំង ចិន បានស្វែងរកអ្នកជំងឺនៅក្នុងប្រទេសផ្សេងទៀត។
ទាក់ទិននឹងការធ្វើតេស្តវ៉ាក់សាំងលើអ្នកជំងឺCOVID-19 នៅក្រៅប្រទេសនេះ នាថ្ងៃទី២៣ ខែមិថុនា ក្រុមហ៊ុនរដ្ឋចិនCNBG បានប្រកាសនៅលើបណ្តាញសង្គម Weibo ថា ខ្លួន បានទទួលការយល់ព្រមលើការសាកល្បងវ៉ាក់សាំងកូរ៉ូណាវីរុស ក្នុងដំណាក់កាល៣ នៅអេមីរ៉ាតអារ៉ាប់រួម ដោយក្រសួងសុខាភិបាល និងបង្ការជំងឺឆ្លងអេមីរ៉ាតអារ៉ាប់រួម។ យ៉ាងណាក៏ដោយ ក្រុមហ៊ុននេះ មិនបានបញ្ជាក់ពីឈ្មោះវ៉ាក់សាំង ដែលត្រូវធ្វើតេស្តឡើយ។
កន្លងមកក្រុមហ៊ុន CNBG ដែលជាសាខាមួយរបស់ក្រុមហ៊ុនរដ្ឋ China National Pharmaceutical Group (Sinopharm) ក៏បានអភិវឌ្ឍវ៉ាក់សាំងចំនួនពីរប្រភេទផ្សេងទៀតផងដែរ ហើយវ៉ាក់សាំងទាំងនោះ ត្រូវបានសាកល្បងលើមនុស្សចំនួន ២០០០នាក់នៅចិន។
ក្រៅពីក្រុមហ៊ុនCNBG ក៏នៅមានក្រុមហ៊ុនចិនផ្សេងទៀត ស្វែងរកប្រទេសដទៃ ដើម្បីធ្វើតេស្តវ៉ាក់សាំង COVID-19 ផងដែរ។ តួយ៉ាងដូចជា ក្រុមហ៊ុន Clover Biopharmaceuticals ដែលបានផ្តល់វ៉ាក់សាំងមួយចំនួន ដើម្បីធ្វើតេស្តលើ អ្នកចូលរួមនៅអូស្ត្រាលី និងក្រុមហ៊ុន Sinovac Biotech ដែលត្រូវគេរំពឹងថាចាប់ផ្តើមធ្វើតេស្តដំណាក់កាល៣ នៅប្រេស៊ីល ដែលមានអ្នកស្មគ្រ័ចិត្តរហូតដល់ ៩០០០នាក់។
សូមបញ្ជាក់ថា ការធ្វើតេស្តវ៉ាក់សាំង COVID-19 ត្រូវបានគេធ្វើឡើងនៅក្នុងប្រទេសជាច្រើន ដូចជា អាមេរិក អូស្ត្រាលី អាល្លឺម៉ង់ជាដើម។ ប៉ុន្តែ គ្មានប្រទេសណាមួយ ទទួលបានជោគជ័យលើការសាកល្បងវ៉ាក់សាំងការពារកូរ៉ូណាវីរុសក្នុងដំណាក់កាល៣នៅឡើយទេ៕
Tag:
ចិន
អេមីរ៉ាតអារ៉ាប់រួម
COVID-19
© រក្សាសិទ្ធិដោយ thmeythmey.com