ភ្នំពេញ៖ បន្លែ និងផ្លែឈើចំនួន៤មុខ ដែលអាជីវករខ្មែរនាំចូលពីប្រទេសវៀតណាម តាមច្រកព្រំដែនអន្តរជាតិភ្នំដិន ខេត្តតាកែវ ត្រូវបានកាំកុងត្រូលរកឃើញថា មានកាកសំណល់សម្លាប់សត្វល្អិត ឬសារធាតុថ្នាំពុលគីមីកសិកម្ម ដែលធ្វើឱ្យប៉ះពាល់ដល់សុខភាពអ្នកបរិភោគ។ បើតាមលោក ប៉ោ លាងគង់ ប្រធានសាខាការពារអ្នកប្រើប្រាស់កិច្ចការប្រកួតប្រជែង បង្ក្រាបការក្លែងបន្លំ (កាំកុងត្រូល) ខេត្តតាកែវ បន្លែ-ផ្លែឈើទាំង៤នោះ មានម្ទេស ខ្ញី ស្ពៃគុយឡេង និងក្រូចសម្រាប់ធ្វើតែជ្រក់ ដែលមានទម្ងន់សរុប ៤តោន។
លោក ប៉ោ លាងគង់ បានបន្តប្រាប់សារព័ត៌មានថ្មីៗ(ThmeyThmey) ថា បន្លែ និងផ្លែឈើទាំង៤មុខនោះ គឺបានស្ថិតនៅក្នុងចំណោមបន្លែ-ផ្លែឈើចំនួន២១មុខ ដែលមន្ត្រីជំនាញបានត្រួតពិនិត្យគុណភាព និងសុវត្ថិភាព នៅត្រង់ចំណុចច្រកព្រំដែនអន្តរជាតិភ្នំដិន ក្នុងខេត្តតាកែវ។
តាមប្រធានសាខាការពារអ្នកប្រើប្រាស់កិច្ចការប្រកួតប្រជែងបង្ក្រាបការក្លែងបន្លំខេត្តតាកែវ បច្ចុប្បន្នបន្លែ និងផ្លែឈើ ដែលមានផ្ទុកសារធាតុគីមីសម្លាប់សត្វល្អិត ដែលមានការហាមឃាត់នោះ ត្រូវបានអាជ្ញាធរបញ្ជូនទៅប្រទេសវៀតណាមវិញ ហើយមិនអនុញ្ញាតឱ្យបន្លែ និងផ្លែឈើទាំងនោះ នាំចូលកម្ពុជាតាមច្រកព្រំអន្តរជាតិភ្នំដិន ទៀតទេ។
លោក ប៉ោ លាងគង់ បាននិយាយដូច្នេះ៖«បច្ចុប្បន្នយើងបានដាក់ បន្លែនិងផ្លែឈើទាំង៤មុខហ្នឹង ជាទំនិញដែលមានហានិភ័យខ្ពស់។ យើងមិនអនុញ្ញាតឱ្យនាំចូលទៀតទេ»។ លោកបានបន្តថា ក្នុងករណីដែល អាជីវករ អាចនាំបន្លែនិងផ្លែឈើទាំង៤មុខនេះ ចូលកម្ពុជាតាមច្រកព្រំដែនភ្នំដិននេះសារជាថ្មីបាន លុះត្រាតែមុននឹងនាំចូល អាជីវករត្រូវមានប័ណ្ណវិភាគគុណភាពទំនិញទៅលើប្រភេទបន្លែននិងផ្លែឈើទាំងអស់ហ្នឹងពីខាងភាគីប្រទេសដែលត្រូវនាំចូលកម្ពុជាសិន។
លោក ប៉ោ លាងគង់ បានអះអាងថា៖«ប័ណ្ណវិភាគគុណទំនិញ[បន្លែ-ផ្លែឈើ]ទាំងអស់ហ្នឹង គឺត្រូវបញ្ជាក់ថា ទំនិញទាំងអស់ហ្នឹង មានគុណភាពល្អ អត់មានសារធាតុគីមីពុលទេ ហើយមន្ត្រីគយខាងភាគីប្រទេសនាំចូល ត្រូវទំនាក់ទំនងខាងខ្ញុំ ដើម្បីឱ្យមន្ត្រីកាំកុងត្រូលខ្ញុំ ទៅដកយកគំរូមកវិភាគសារជាថ្មី។ ប្រសិនបើយើងមើលឃើញថា បន្លែនិងផ្លែឈើទាំងនោះគុណភាពហើយ យើងនឹងអនុញ្ញាតឱ្យអាជីវករនាំចូលសរជាថ្មី។ ប៉ុន្តែបើយើងវិភាគរកឃើញទំនិញទាំងអត់មានគុណភាព និងសុវត្ថិភាពទេ យើងនៅតែរាំងខ្ទប់មិនឱ្យនាំចូលដដែល»។
កាលពីថ្ងៃទី១២មិថុនា ឆ្នាំ២០២០ មន្ត្រីកាំកុងត្រូលខេត្តកណ្តាល ក៏បានរកឃើញបន្លែនិងផ្លែឈើចំនួន៦មុខ ក្នុងបរិមាណ៥តោន ដែលនាំចូលពីប្រទេសវៀតណាមតាមព្រំច្រកព្រំដែនជ្រៃធំ មានផ្ទុកកាកសំណល់ថ្នាំសម្លាប់សត្វនេះផងដែរ។ បន្លែនិងផ្លែឈើចំនួន៥មុខនោះ ក្រៅពីក្រូចសម្រាប់ធ្វើតែជ្រក់ គឺមាន ស្ពៃបូកគោ ផ្កាខាត់ណា ពោតបារាំង ផ្លែល្ពៅ និងផ្កាគូឆាយ។
កាលពីថ្ងៃទី១២ ខែឧសភា ក្រសួងមហាផ្ទៃបានបង្គាប់ឱ្យរដ្ឋបាលខេត្តជាប់ព្រំដែន និងអាជ្ញាធរមានសមត្ថកិច្ចប្រចាំនៅតាមច្រកព្រំដែនទាំងអស់ ត្រូវពង្រឹងការត្រួតពិនិត្យននិងទប់ស្កាត់ការនាំចូលបន្លែ និងផ្លែឈើមានជាតិគីមីពុល និងទំនិញខូចគុណភាព ដោយសំដៅដល់ការការពារអាយុជីវិត និងសុខភាពពលរដ្ឋ។
សកម្មភាពដែលមន្ត្រីអាជ្ញាធរមានសមត្ថកិច្ចប្រចាំនៅដែលជាប់នៅព្រំដែនប្រទេសវៀតណាម កំពុងរឹតតែបន្តឹងនៃការចូលបន្លែ-ផ្លែឈើក្នុងទឹកដីកម្ពុជានេះ គឺបានធ្វើឡើងក្រោយមានបង្គាប់ពីក្រសួងមហាផ្ទៃ ដោយត្រូវពង្រឹងការត្រួតពិនិត្យននិងទប់ស្កាត់ការនាំចូលបន្លែ និងផ្លែឈើមានជាតិគីមីពុល និងទំនិញខូចគុណភាពចូលកម្ពុជា ដើម្បីធានាដល់ការការពារអាយុជីវិត និងសុខភាពពលរដ្ឋ។ ក្រសួងមហាផ្ទៃបានចេញលិខិតបង្គាប់ឱ្យរដ្ឋបាលខេត្តជាប់ព្រំដែន និងអាជ្ញាធរមានសមត្ថកិច្ចប្រចាំនៅតាមច្រកព្រំដែនទាំងអស់ ត្រូវពង្រឹងការត្រួតពិនិត្យននិងទប់ស្កាត់ការនាំចូលបន្លែ និងផ្លែឈើមានជាតិគីមីពុល និងទំនិញខូចគុណភាពនោះ កាលពីថ្ងៃទី១២ឧសភា ឆ្នាំ២០២០ បន្ទាប់ពីមានការស្នើសុំពីក្រសួងកសិកម្ម រុក្ខាប្រមាញ់ និងនេសាទ កន្លងមក។
ក្រសួងកសិកម្មបានសិក្សានិងប៉ានស្មាន ពីតម្រូវការប្រើប្រាស់បន្លែរបស់ពលរដ្ឋក្នុងស្រុកប្រចាំឆ្នាំ២០២០ មានជាង១០៤ម៉ឺនតោន ខណៈកម្ពុជាមានលទ្ធភាពអាចផ្គង់ផ្គង់បានជិត៧២ម៉ឺនតោន (៦៩ភាគរយ) ដែលមាន៣៣ម៉ឺនតោន (៣២ភាគរយ)ទៀត ត្រូវនាំចូលពីរបរទេស។ យោងតាមរបាយការណ៍នេះ បើគិតជាប្រចាំថ្ងៃវិញ កម្ពុជាមានតម្រូវបន្លែចំនួន២,៨៦៥តោន តែលទ្ធភាពផ្គត់ផ្គង់បន្លែក្នុងស្រុកបានត្រឹម១,៩៦២តោនប៉ុណ្ណោះ។ ដើម្បីបំពេញតម្រូវការប្រើប្រាស់បន្លែក្នុងស្រុកនេះ កម្ពុជាត្រូវនាំចូលបន្លែពីបរទេសជាង៩០០តោនទៀតក្នុងមួយថ្ងៃ៕