តៃវ៉ាន់ ប្រាប់​ចិន​ឲ្យ​គិតគូរ​ប្រឆាំង COVID-19 ជាជាង​ប្រឹង​ធ្វើ​សមយុទ្ធ​បន្លាច​
COVID-19
អន្តរជាតិ
តៃវ៉ាន់ ប្រាប់​ចិន​ឲ្យ​គិតគូរ​ប្រឆាំង COVID-19 ជាជាង​ប្រឹង​ធ្វើ​សមយុទ្ធ​បន្លាច​
24, Jun 2020 , 9:59 pm        
រូបភាព
លោក Su Tseng-chang នាយករដ្ឋមន្រ្តីតៃវ៉ាន់។ រូបភាព AFP
លោក Su Tseng-chang នាយករដ្ឋមន្រ្តីតៃវ៉ាន់។ រូបភាព AFP
​​នាយករដ្ឋមន្ត្រី​តៃវ៉ាន់ លោក Su Tseng-chang ប្រាប់​ឲ្យ​ចិន​ប្រឹងប្រែង​ទប់ស្កាត់​ការផ្ទុះ​ឡើងជា​ថ្មី​ជំងឺ COVID-19 ជាជាង​ការធ្វើ​សមយុទ្ធ​យោធា​នៅក្បែរ​កោះ​តៃវ៉ាន់​។ លោក Su និយាយ​រិះគន់​បែបនេះ បន្ទាប់ពី​កងទ័ពអាកាស​របស់​ចិនដីគោក​បាន​ហោះ​ឆ្វែល​កោះ​តៃវ៉ាន់​ជាច្រើន​ក្នុង​ប៉ុន្មាន​សប្ដាហ៍​មកនេះ​។ មេដឹកនាំ​តៃវ៉ាន់​រូបនេះ បញ្ជាក់ថា តៃវ៉ាន់​មិន​ចង់​មានរឿង​អ្វី​ឡើយ ហើយ​ចង់​បានតែ​សន្តិភាព​ក្នុង​តំបន់​ប៉ុណ្ណោះ​។​

 
​មិន​ពីរ​សប្ដាហ៍​ចុងក្រោយ កងទ័ពអាកាស​ចិន បាន​សកម្មភាព​៨​ដង​នៅក្បែរៗ​កោះ​តៃវ៉ាន់​។ ក្នុងនោះ យន្តហោះ​ចម្បាំង និង​យន្តហោះ​ទម្លាក់​គ្រាប់បែក​របស់​កងទ័ព​អាកាស​នៃ​កងទ័ព​រំដោះប្រជាជន​ចិន បាន​ហោះចូល​ដែន​កំណត់​អត្តសញ្ញាណ​ការពារ​អាកាស​របស់​តៃវ៉ាន់ ហើយ​ហោះ​ចេញ​វិញ​បន្ទាប់ពី​ទទួល​ការព្រមាន​ពី​ទ័ពអាកាស​តៃវ៉ាន់​។​
 
​សកម្មភាព​យោធា ដែល​កើតឡើង​ស្របគ្នា​នឹង​ការកើនឡើង​ករណី​ឆ្លង​ជំងឺ COVID-19 នៅ​រដ្ឋធានី​ប៉េកាំង បាន​រង​ការរិះគន់​ពី​សំណាក់​នាយករដ្ឋមន្ត្រី​តៃវ៉ាន់ Su Tseng-chang ។ លោក Su ប្រាប់​អ្នក​សារ​ព៏​ត៌មាន​នៅ​ថ្ងៃទី​២៣ ខែមិថុនា ថា ចិន​ដែលជា​ប្រទេស​ធំ មិនបាន​បោះបង់​គំនិត​យក​តៃវ៉ាន់​ដោយ​ប្រើ​កម្លាំងយោធា​ឡើយ​។ ចិន​ក៏បាន​បញ្ជូន​យន្តហោះ​ចម្បាំង និង​នាវា​ប្រយុទ្ធ​ទៅ​ក្បែរ​តៃវ៉ាន់ ដែលជា​សកម្មភាព​គួរ​រំខាន​។​
 
«​តៃវ៉ាន់ គ្រាន់តែ​ចង់​ជា​អ្នកចូលរួម​សម្រាប់​សន្តិភាព​តំបន់​ប៉ុណ្ណោះ​។​» នេះ​ជាការ​បញ្ជាក់​របស់លោក​នាយករដ្ឋមន្ត្រី Su ដែល​ផ្សាយ​ដោយ​ទីភ្នាក់ងារ​ព័ត៌មាន Reuters ។ មេដឹកនាំ​តៃវ៉ាន់​រូបនេះ ក៏​និយាយ​ដល់​បញ្ហា COVID-19 នៅ​ចិន​ដែល​លោក​អះអាងថា ជា​រលក​ទី​ពីរ​។ នាយករដ្ឋមន្ត្រី​រូបនេះ បន្តថា ចិន​គួរ​ប្រមូលផ្ដុំ​កម្លាំង​របស់ខ្លួន​ដើម្បី​មើលថែ​ប្រជាជន​ខ្លួន កាត់បន្ថយ​ផលប៉ះពាល់​ដោយសារ​ជំងឺឆ្លង​នេះ និង​ការពារ​សន្តិភាព​តំបន់ ដែលជា​ទង្វើ​ប្រសើរ​ជាង​។​
 
​នៅ​ប៉េកាំង ករណី​ឆ្លង COVID-19 បាន​ផ្ទុះឡើង​គួរ​ឲ្យ​បារម្ភ បន្ទាប់ពី​ការរកឃើញ​ករណី​ឆ្លង​ពី​ផ្សា​របោះ​ដុំ​មួយកន្លែង ដែល​ធ្វើ​ឲ្យ​គេ​គិតថា រលក​ទី​ពីរ​អាច​កើតមាន​មិន​ខាន​។ ជា​វិធានការ ផ្សា​របោះ​ដុំ Xinfadi ត្រូវបាន​បិទ ផ្នែក​ខ្លះ​នៃ​ប៉េកាំង ក៏​ស្ថិតក្រោម​ការបិទ​ទាំងស្រុង សាលារៀន​ក៏បាន​បិទ​បន្តទៀត ព្រម​គ្នា​នឹង​រោងចក្រ​ក្រុមហ៊ុន Pepsi មួយកន្លែង​ផងដែរ​។ ការធ្វើ​តេស្ត​ទ្រង់ទ្រាយ​ធំ ក៏​កំពុង​ឡើង​ផងដែរ ដើម្បី​ទប់ស្កាត់​ការឆ្លង​ថែមទៀត​។​
 
​ដូច​ដឹង​ស្រាប់ ចិន​ចាត់ទុក​តៃវ៉ាន់​ជា​ផ្នែក​មួយ​របស់ខ្លួន​។ ការធ្វើ​សមយុទ្ធ​នៅក្បែរៗ​កោះ​មួយ​នេះ ត្រូវបាន​ទីក្រុង​ប៉េកាំង ចាត់ទុកជា​សកម្មភាព​ជា​ទម្លាប់​របស់ខ្លួន​ដើម្បី​ពង្រឹងកម្លាំង​ការពារ​អធិបតេយ្យ​ជាតិ​។ រឿង​តៃវ៉ាន់​នេះ ចិន​ក៏​មិនដែល​បោះបង់​ជម្រើស​ប្រើប្រាស់​យោធា​ដើម្បី​គ្រប់គ្រង​ឡើងវិញ​ដែរ ហើយ​ការប្រើប្រាស់​យោធា គឺជា​ជម្រើស​ចុងក្រោយ បើ​តៃវ៉ាន់​ដែល​កាន់តែ​ខ្សត់​ដង្ហើម​ការទូត​ហ៊ាន​ប្រកាស​ឯករាជ្យ​នោះ​៕ 

Tag:
 តៃវ៉ាន់​
  ចិន​
  COVID-19
© រក្សាសិទ្ធិដោយ thmeythmey.com