ជាតិ
GMAC ចង់ពន្យារពេលចរចាប្រាក់ឈ្នួលកម្មករ ខណៈសហជីពចង់ឲ្យដំណើរការតាមគម្រោង
កម្មកររោងចក្រកំពុងអង្គុយរៀនជំនាញទន់ ដែលរៀបចំបណ្ដុះបណ្ដាលដោយក្រសួងការងារ (រូបពីទំព័រហ្វេសប៊ុករបស់ក្រសួងការងារ)
×![]()
ដោយ: ឡាយ សុភាវតី
ភ្នំពេញ៖ សមាគមរោងចក្រកាត់ដេរនៅកម្ពុជា(GMAC)ថា ការចរចាប្រាក់អប្បបរមាឆ្នាំ២០២១ គួរពន្យារពេល ដោយសារវិស័យកាត់ដេរកំពុងរងផលប៉ះពាល់ ។ ប៉ុន្តែមេសហជីពចង់ឲ្យដំណើរការចរចា តាមគម្រោងរបស់ក្រសួងការងារ និងបណ្ដុះបណ្ដាលវិជ្ជាជីវៈ ដែលគ្រោងធ្វើឡើងនៅដើមខែក្រោយនេះ។ 
GMAC សង្កត់ធ្ងន់ថា ការបង្អង់ចរចាប្រាក់ឈ្នួលអប្បបរមា ជាការគាំទ្រឲ្យវិស័យកាត់ដេរបន្តមានជីវិតរស់នៅ ក៏ដូចជារក្សាការងារដល់កម្មករផងដែរ។ បើតាមសេចក្ដីថ្លែងការណ៍របស់GMAC នៅថ្ងៃទី២៣ មិថុនានេះថា អំឡុងវិបត្តិកូវីដ-១៩នេះ វិស័យកាត់ដេរនៅកម្ពុជាកំពុងរងផលប៉ះពាល់ធ្ងន់ធ្ងរ ដែលបណ្ដាលឲ្យរោងចក្រកាត់ដេរជាច្រើនបានព្យួរការងារនិងបិទ ដោយសារអ្នកបញ្ជាទិញលុបការបញ្ជាទិញ។
«សមាគមសង្ឃឹមយ៉ាងម៉ុតមាំថា ការចរចាប្រាក់ឈ្នួលអប្បបរមាថ្មីសម្រាប់ឆ្នាំ២០២១ នឹងត្រូវផ្អាកជាបណ្ដោះអាសន្នរហូតដល់ស្ថានភាពនៃវិស័យនេះ មានភាពប្រក្រតីឡើងវិញ។ ការបង្អង់ការចរចាប្រាក់ឈ្នួលអប្បបរមានឹងជាយន្តការមួយ ក្នុងការគាំទ្រឲ្យវិស័យនេះ នៅបន្តមានជីវិតរស់នៅ ក៏ដូចជាការរក្សាការងារសម្រាប់បងប្អូនកម្មករនិយោជិតយ៉ាងដូច្នេះដែរ»។ នេះបានតាមលើកឡើងរបស់GMAC នៅក្នុងសេចក្ដីថ្លែងការណ៍។
ដោយឡែក លោក អាត់ ធន់ ប្រធានសហភាពការងារកម្ពុជាថ្លែងប្រាប់សារព័ត៌មានThmeyThmey តាមទូរស័ព្ទថា ការចរចាប្រាក់ឈ្នួលអប្បបរមានេះ មិនចាំបាច់ពន្យារពេលឡើយ ព្រោះកម្មករមិនទាន់ទទួលបានប្រាក់ឈ្នួលសមរម្យនោះទេ។ លើសពីនេះ លោក អាត់ ធន់ បន្ថែមថា ការចរចានៅក្នុងឆ្នាំនេះ គឺអនុវត្តនៅឆ្នាំក្រោយ ដូច្នេះមិនគួរពន្យារពេលឡើយ។
លោក អាត់ ធន់ ថ្លែងថា៖ «កម្មករយើងមិនទាន់ទទួលបានប្រាក់ឈ្នួលសមរម្យនៅឡើយទេ ពួកគាត់ត្រូវតែមានប្រាក់ឈ្នួលមួយសមរម្យ។ បើផ្អាកការចរចារមានន័យថា គាត់មិនបានប្រាក់ឈ្នួលឡើងទេ»។
លោក អាត់ ធន់ រំពឹងថា ការចរចាប្រាក់ឈ្នួលនេះ នឹងធ្វើឲ្យកម្មករទទួលបានប្រាក់អប្បបរមាខ្ពស់ជាងមុន ដោយសារស្ថានភាពរបស់កម្មករលំបាក។
កាលពីថ្ងៃទី១០ មិថុនា ក្រសួងការងារ បានប្រកាសថា ការចរចាប្រាក់ឈ្នួលអប្បបរមានៃវិស័យកាត់ដេរ សម្រាប់ឆ្នាំ២០២១ នឹងធ្វើឡើងចាប់ពីខែកក្កដា ដល់កញ្ញា នៅឆ្នាំ២០២០នេះ។
សូមបញ្ជាក់ថា ប្រាក់ឈ្នួលអប្បបរមារបស់កម្មករនិយោជិត ក្នុងវិស័យកាត់ដេរនៅឆ្នាំ២០១៩ គឺ១៨២ដុល្លារ ហើយសម្រាប់ឆ្នាំ២០២០ កើនឡើង៨ដុល្លារ គឺ១៩០ដុល្លារ៕
Tag:
GMAC
សហជីព
© រក្សាសិទ្ធិដោយ thmeythmey.com
