អន្តរជាតិ
នាវាផ្ទុកយន្តហោះរបស់ចិន។ រូបភាព AFP
×![]()
មន្ត្រីជាន់ខ្ពស់ចិន នៅថ្ងៃទី២៣ ខែមិថុនា បានអះអាងថា វត្តមានដ៏ច្រើនដែលមិនធ្លាប់មានរបស់កងទ័ពអាមេរិក នៅតំបន់អាស៊ីប៉ាស៊ីហ្វិក កំពុងបង្កើនលទ្ធភាពនៃការប៉ះទង្គិចជាយថាហេតុជាមួយកងនាវារបស់អាមេរិក។ សមុទ្រចិនខាងត្បូង ដែលជាតំបន់ប្រទាញប្រទង់រវាងចិន និងប្រទេសតូចជាងខ្លួនមួយចំនួន ត្រូវបានមើលឃើញថា ជាតំបន់ក្ដៅរវាងមហាអំណាចយោធាទាំងពីររបស់ពីភពលោក។ 
«លទ្ធភាព នៃឧប្បទ្ទវហេតុយោធា ឬការបាញ់ច្រលំដោយចៃដន្យកំពុងកើនឡើង»។ នេះជាអះអាងរបស់ លោក Wu Shicun ប្រធានវិទ្យាស្ថានជាតិស្តីពីការសិក្សាសមុទ្រចិនខាងត្បូង ដែលជាគ្រឹះស្ថានស្រាវជ្រាវរបស់រដ្ឋាភិបាលចិន។ លោក Wu បាននិយាយ ថា ប្រសិនបើទំនាក់ទំនងយោធារវាងអាមេរិក និងចិន កាន់តែដុនដាបជាងមុន វាអាចនឹងបង្កើនលទ្ធភាពនៃការផ្ទុះវិបត្តិ ឬជម្លោះប្រដាប់អាវុធ ដែលនាំឲ្យមានផលវិបាកយ៉ាងធ្ងន់ធ្ងរដល់ទំនាក់ទំនងរវាងប្រទេសទាំងពីរ។
លោក Wu ថ្លែងបែបនេះ ក្នុងពេលធ្វើបទបង្ហាញពីរបាយការណ៍របស់វិទ្យាស្ថានលោកទៅលើវត្តមានរបស់កងទ័ពអាមេរិក នៅក្នុងតំបន់អាស៊ីប៉ាស៊ីហ្វិក។ របាយការណ៍នេះ បានកត់សម្គាល់ថា វត្តមានកងទ័ពអាមេរិកនៅក្នុងតំបន់មានចំនួនច្រើនមិនធ្លាប់មាន។ របាយការណ៍នេះ បង្ហាញថា អាមេរិកបានដាក់ពង្រាយកងទ័ព ៣៧៥,០០០ នាក់ នាវាចម្បាំងចំនួន៦០ភាគរយនៃនាវាដែលខ្លួនមាន និងនាវាផ្ទុកយន្តហោះចំនួន៣ នៅក្នុងតំបន់ឥណ្ឌូប៉ាស៊ីហ្វិក។
តាំងពីឆ្នាំ២០១៧មក និងជាពិសេសក្រោយពេលលោកប្រធានាធិបតី ដូណាល់ ត្រាំ ឡើងកាន់អំណាច អាមេរិក និងចិន កំពុងប្រឈមមុខជាមួយគ្នាលើបញ្ហាជាច្រើន។ មហាអំណាចទាំង២ នេះក៏បានអួតអាងបញ្ចេញសាច់ដុំផ្នែកយោធា និងការទូតផងដែរ។
ជាក់ស្តែងរបាយការណ៍នេះបានបង្ហាញថា ក្នុងរយៈពេលជាង៣ឆ្នាំដែលលោក ត្រាំ ចូលកាន់អំណាច អាមេរិក បានធ្វើប្រតិបត្តិការសេរីភាពនាវាចរណ៍ក្នុងសមុទ្រចិនខាងត្បូង ក៏ដូចជាច្រកសមុទ្រតៃវ៉ាន់ចំនួន២២ដង ដែលជាចំនួនច្រើនខ្លាំងបើធៀបទៅនឹងរយៈពេល៨ឆ្នាំក្នុងអាណត្តិរបស់លោកអតីតប្រធានាធិបតី បារ៉ាក់ អូបាម៉ា ដែលមានត្រឹមតែ៤ដងប៉ុណ្ណោះ។
ដូចដឹងស្រាបហើយ អាមេរិក តែងតែចាត់ឲ្យនាវាចម្បាំងរបស់ខ្លួនធ្វើប្រតិបត្តិការនៅសមុទ្រចិនខាងត្បូង ក៏ដូចជាបើកកាត់ច្រកសមុទ្រតៃវ៉ាន់ជាដើម ដោយសម្អាងថា ជាដែនសមុទ្រអន្តរជាតិ និងអនុវត្តតាមច្បាប់អន្តរជាតិ។ ប៉ុន្តែសកម្មភាពទាំងអស់នេះ សុទ្ធសឹងតែត្រូវបានចិនចាត់ទុកជាការបង្កហេតុ និងធ្វើឲ្យចិនខឹងសម្បារសឹងតែរាល់ដង ត្បិតអីចិនចាត់ទុកសកម្មភាពទាំងអស់នោះជាការបំពានបូរណភាពដែនដី និងអធិបតេយ្យរបស់ខ្លួន។
របាយការណ៍នេះ បានលើកឡើងថា ចិនមិនបានចាត់ទុកអាមេរិកជាគូប្រជែងសក្តានុពលឡើយ ហើយក៏មិនមានបំណងបង្កើតសង្គាមត្រជាក់ឬក្តៅជាមួយអាមេរិកនោះទេ។ ក្នុងបំណងធ្វើឲ្យទំនាក់ទំនងរវាងប្រទេសទាំង២ ប្រសើរឡើងវិញ របាយការណ៍នេះបានចង្អុលបង្ហាញថា យោធាប្រទេសទាំង២ គួរបង្កើនទំនាក់ទំនងជាមួយគ្នា ដើម្បីបញ្ជៀសការយល់ច្រលំ ក៏ដូចជាការគណនាយុទ្ធសាស្ត្រខុស៕
Tag:
ចិន
អាមេរិក
សមុទ្រខាងត្បូង
© រក្សាសិទ្ធិដោយ thmeythmey.com
