ឥណ្ឌា បន្ថែម​ទ័ព​ទៅ​តំបន់​ដែល​ទើប​ប៉ះទង្គិច​ជាមួយ​ចិន​
សង្គមអន្តរជាតិ​
អន្តរជាតិ
ឥណ្ឌា បន្ថែម​ទ័ព​ទៅ​តំបន់​ដែល​ទើប​ប៉ះទង្គិច​ជាមួយ​ចិន​
25, Jun 2020 , 11:14 am        
រូបភាព
ទ័ពចិន និងឥណ្ឌាតាមព្រំដែន។ រូបភាព AFP
ទ័ពចិន និងឥណ្ឌាតាមព្រំដែន។ រូបភាព AFP
​ឥណ្ឌា នៅ​ថ្ងៃទី​២៤ ខែមិថុនា បាន​បន្ថែម​កងទ័ព ដោយ​រួមមាន​កងកាំភ្លើងធំ និង​រថយន្ត​ដឹក​ទាហាន ទៅកាន់​តំបន់​ដែល​ទើប​ប៉ះទង្គិច​ជាមួយ​ចិន​នៅ​ព្រំដែន​។ ការបន្ថែម​កម្លាំង​នេះ ធ្វើឡើង​ក្រោយ​ការផ្ទុះ​វាយ​ប្រតាយប្រតប់​គ្នា​នឹង​ដុំថ្ម និង​ដំបង នៅលើ​ជ្រលង​ភ្នំ Galwan ដែល​នាំ​ឲ្យ​មានការ​បាត់បង់​ជីវិត និង​រងរបួស​ក្នុងចំណោម​កងទ័ព​ទាំងសងខាង​។

 
​បើតាម​ទីភ្នាក់ងារ​ព័ត៌មាន AFP យោធា​ឥណ្ឌា បាន​អះអាងថា ការបញ្ជូន​កងទ័ព​បន្ថែម​ទៅកាន់​ព្រំដែន​នេះ ជា​ផ្នែក​មួយ​នៃ​ការបង្ហាញ​កំលាំង​របស់ខ្លួន ក្រោយ​ការប៉ះទង្គិច​ជាមួយ​កងទ័ព​ចិន​នៅ​ថ្ងៃទី​១៥ ខែមិថុនា ដែល​បណ្តាល​ឲ្យ​យោធា​ឥណ្ឌា​២០​នាក់​បាន​បាត់​បង់ជីវិត​។ ក្រោយ​ហេតុការណ៍​នេះ ភាគី​ទាំងសងខាង​បានប្រកាសថា នឹង​ដកទ័ព​ចេញពី​តំបន់​មាន​ជម្លោះ​ដើម្បី​បន្ធូរបន្ថយ​ស្ថានការណ៍​។ ប៉ុន្តែ​ជាក់ស្តែង ចិន និង​ឥណ្ឌា​នៅតែ​បន្ត​រក្សា​កងទ័ព​នៅ​តំបន់​មាន​ជម្លោះ ខណៈ​ឥណ្ឌា​ខិតខំ​បង្ហាញ​អំណាច​យោធា​របស់ខ្លួន​។​
 
​កាលពី​ថ្ងៃទី​២៤ ខែមិថុនា យន្តហោះ​ចម្បាំង​ឥណ្ឌា​បាន​ហោះ​ចេញពី​មូលដ្ឋាន​យោធា​នៅក្នុង​តំបន់ Leh ដែលមាន​កំពុងមាន​ជម្លោះ ទៅ​តំបន់​ព្រំដែន​ភ្នំ​ជាមួយ​ចិន​។ បន្ថែម​ពីនេះ អ្នករស់នៅ​ស្រប​ផ្លូវ​ទៅកាន់​តំបន់ Leh បាន​អះអាងថា គេ​ឃើញ​មាន​ក្បួន​រថយន្តយោធា និង​កាំភ្លើង​ធំ​យ៉ាង​វែង​។ នេះ​បើតាម​ប្រភពព័ត៌មាន​ដដែល​។ 
 
«​ពេលនេះ​យើង​មាន​កម្លាំង​គ្រប់គ្រាន់ ដើម្បី​មាន​វត្ត​មាននៅ​តំបន់​នេះ​»​។ នេះ​ជាការ​លើកឡើង​របស់​ម​ន្ត្រី​យោធា​ឥណ្ឌា​ម្នាក់​ដែល​បម្រើការ​នៅ​បញ្ជាការដ្ឋាន​កងទ័ព​ភាគ​ខាងជើង ដោយ​សំដៅ​ទៅលើ​ការបន្ថែម​ទ័ព​។ ចំណែក​លោក Tashi Chhepal ដែលជា​មេបញ្ជាការ​យោធា​ដែល​ចូល​និវត្ត និង​ធ្លាប់មាន​មូលដ្ឋាន​នៅ​តំបន់ Leh បាន​លើកឡើងថា ការ​ចល័ត​កងទ័ព បែបនេះ​មិន​ធ្លាប់មាន​ឡើយ ជាពិសេស​ក្នុង​តំបន់​រសើប​ទាំង​ជាមួយ​ចិន និង​ប៉ា​គី​ស្ថាន​។ 
 
​រូបភាព​ថត​បាន​តាម​រយៈ​ផ្កាយរណប​របស់​អាមេរិក នៅ​ថ្ងៃទី​២១ ខែមិថុនា បានបង្ហាញ​ពី​ឡាន និង​ជំរំ​នៅតាម​បណ្តោយ​ទន្លេ​នៅ​តំបន់​ជ្រលង​នៅតាម​ព្រំដែន ដែល​ស្ថិតនៅ​ចម្ងាយ​៤៥០០​ម៉ែត្រ​ពី​កន្លែង​ដែលមាន​ជម្លោះ​។ ប៉ុន្តែ​គេ​មិនអាច​កំណត់ថា​ជំរំ​នោះ​ជា​របស់​ភាគី​ណា​ឡើយ​។​
 
​សូមបញ្ជាក់ថា ចិន និង​ឥណ្ឌា​ធ្លាប់ធ្វើ​សង្គ្រាម​តាម​ព្រំដែន​ជាមួយគ្នា នៅ​ឆ្នាំ​១៩៦២​ម្តង​។ ប៉ុន្តែ​ការប៉ះទង្គិច​កាលពី​សប្តាហ៍​កន្លងទៅ ត្រូវបាន​គេ​ចាត់ទុកជា​ការប៉ះទង្គិច​ដ៏​អាក្រក់​បំផុត បើទោះបីជា​ភាគី​ទាំងសងខាង​ប្រើ​ដំបង​រុំ​ជាមួយ​ខ្សែលួស​និង ដែកគោល និង​ដុំថ្ម ក្នុងការ​ប្រតាយប្រតប​គ្នា​យ៉ាងណាក្តី​៕

© រក្សាសិទ្ធិដោយ thmeythmey.com
អត្ថបទពេញនិយម