ជាតិ
សុខភាព
អ្នកជំនាញ៖ អំឡុងពេលពត់តម្រង់ធ្មេញ ពុំគួរបរិភោគប្រភេទអាហារផ្អែម និងរឹង ព្រោះ…!
×![]()
ភ្នំពេញ៖ ជាទូទៅការពត់តម្រង់ធ្មេញត្រូវប្រើរយៈពេលជាង១៨ខែ ឫអាចប្រើរយៈពេលយូរជាងនេះ ដោយអាស្រ័យលើបញ្ហាធ្មេញរបស់អ្នកជំងឺ។ បើតាមលោកទន្តបណ្ឌិត យឹម សេដ្ឋាវុឌ្ឍ អំឡុងពេលពត់តម្រង់ធ្មេញ អ្នកជំងឺត្រូវថែទាំអនាម័យមាត់ធ្មេញឱ្យបានត្រឹមត្រូវ ជាពិសេសនោះគួរជៀសវាងប្រភេទអាហារផ្អែម និងរឹង។
ដើម្បីជ្រាបច្បាស់សូមអញ្ជើញលោក-អ្នកទស្សនាបទសម្ភាស រវាងកញ្ញា អ៊ុត រស្មី អ្នកសារព័ត៌មានថ្មីៗ និង ទន្តបណ្ឌិត យឹម សេដ្ឋាវុឌ្ឍ ឯកទេសពត់តម្រង់ធ្មេញ និងជាប្រធានក្រុមគ្រូពេទ្យនៃគ្លីនិកធ្មេញអេវើប្រាយ ដូចទៅ៖
ទន្តបណ្ឌិតឯកទេសពត់តម្រង់ធ្មេញ យឹម សេដ្ឋាវុឌ្ឍ បានពន្យល់ថា ការបរិភោគប្រភេទអាហារផ្អែម ឬស្អិតដូចជា សូកូឡា ធ្វើឱ្យពិបាកសម្អាតធ្មេញ និង បណ្ដាលឱ្យសឹកធ្មេញផងដែរ។ លោកវេជ្ជបណ្ឌិត បានបន្ថែមដូច្នេះថា៖ «នៅពេលទទួលទានអាហារផ្អែម វានឹងប្រែប្រួលជាតិផ្អែម ទៅជាជាតិអាស៊ីត ដូចនេះយើងមិនគួរដុសធ្មេញភ្លាមៗនោះទេ ដោយគួររង់ចាំរយៈពេល៣០ ទៅ៦០នាទី ដើម្បីជៀសវាងសឹកធ្មេញ»។
បន្ថែមលើនេះ នៅពេលអ្នកពត់ធ្មេញបរិភោគប្រភេទអាហាររឹង វាអាចប៉ះឧបករណ៍ពត់ធ្មេញ ដែលវាធ្វើឱ្យឧបករណ៍ដែលភ្ជាប់នោះរបកចេញពីធ្មេញ ។ លោកទន្តបណ្ឌិត យឹម សេដ្ឋាវុឌ្ឍ បានពន្យល់ពីដូច្នេះថា៖« នៅពេលរបកឧបករណ៍ពត់ គឺគាត់ខាតពេលវេលា ដោយត្រូវមកជួបគ្រូពេទ្យដើម្បីភ្ជាប់ឡើងវិញ អ្វីដែលសំខាន់ គឺខាតពេលវេលាលើការពត់ធ្មេញរបស់គាត់ ដូចជាអ្នកជំងឺខ្លះធ្មេញគាត់ចាប់ផ្ដើមត្រង់ស្អាតហើយ ដល់ពេលត្រូវបិទប្រឡោះធ្មេញ តែចៃដន្យគាត់រវល់មិនបានជួបគ្រូពេទ្យ អីចឹងធ្មេញដែលត្រង់បែរជាវៀច ដោយគាត់ត្រូវតម្រង់ឡើងវិញ »។
ប្រធានក្រុមគ្រូពេទ្យនៃគ្លីនិកធ្មេញអេវើប្រាយរូបនេះ បានបន្ថែមថា អំឡុងពត់ធ្មេញ អ្នកជំងឺ ត្រូវតែសម្អាតធ្មេញឱ្យបានត្រឹមត្រូវតាមការណែនាំរបស់គ្រូពេទ្យ។ ក្នុងករណីអ្នកជំងឺមិនបានថែទាំធ្មេញឱ្យបានស្អាតនោះទេ នឹងអាចបណ្ដាលឱ្យកើតជំងឺរលាកអញ្ចាញ និងពុកធ្មេញជាដើម៕
Tag:
ពត់តម្រង់ធ្មេញ
អនាម័យ
សុខភាព
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
