ជាតិ
សង្គមជាតិ
អាជ្ញាធរដុតគ្រឿងញៀនជិត៥០០គីឡូក្រាម នៅថ្ងៃទី ២៦ មិថុនា សម្តេច ស ខេង រដ្ឋមន្ត្រីក្រសួងមហាផ្ទៃក្នុងទិវាដុតចោលនូវគ្រឿងញៀនកាលពីកន្លងទៅ
× ភ្នំពេញ៖ អាជ្ញាធរដុតបំផ្លាញគ្រឿងញៀន ដែលប្រមូលបានពីករណីបទល្មើសគ្រឿងញៀនខុសច្បាប់ជិត៥០០គីឡូក្រាម នៅមជ្ឈមណ្ឌលកោះពេជ្រ នាថ្ងៃទី២៦ ខែមិថុនា។ ការដុតចោលនូវគ្រឿងញៀននេះ បង្ហាញពីសកម្មភាពសម្រាប់ដាស់តឿនដល់យុវជនជៀសផុតពីការប្រើប្រាស់គ្រឿងញៀនដែលនាំឲ្យបំផ្លាញសុខភាព និងអនាគត។
លោក មាស វីរិទ្ធិ អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានបញ្ជាក់ថា គ្រឿងញៀនជិត៥០០គីឡូក្រាមនេះ គឺភាគច្រើនជាសារធាតុមេតង់វីតាមីន និងសារធាតុផ្សេងៗទៀត។ បើតាមលោក មាស វិរិទ្ធិ គ្រឿងញៀនជិត៥០០គីឡូក្រាម គឺប្រមូលបានពីករណីបទល្មើសគ្រឿងញៀនដែលអាជ្ញាធរឃាត់ និងចាប់បាននៅទូទាំងរាជធានីខេត្ត-ក្រុង ក្នុងរយៈពេលប៉ុន្មានខែកន្លងទៅ។
ទាក់ទងនឹងការដុតចោលនូវគ្រឿងញៀននេះ លោក មាស វិរិទ្ធិ បានពន្យល់ថា ក្រុមអ្នកជំនាញមានការប្រើបច្ចេកទេសក្នុងការដុតចោលដែលមិនផ្តល់ផលប៉ះពាល់ដល់បរិស្ថាន ឬសុខភាពមនុស្សឡើយ។ លោក និយាយដូច្នេះថា៖«យើងដុតតាមលក្ខណៈបច្ចេកទេស របស់ណាដែលមានបង្កគ្រោះថ្នាក់ បានយើងយកវាទៅដុតនៅក្នុងម៉ាស៊ីន»។
អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានបញ្ជាក់ថា សកម្មភាពការដុតចោលនូវគ្រឿងញៀននេះ គឺជាគំរូភាពមួយសម្រាប់ក្រើនរំលឹកឲ្យយុវជនចាកឆ្ងាយពីការប្រើប្រាស់គ្រឿងញៀនដែលវាប៉ះពាល់ដល់សុខភាព និងបំផ្លាញអនាគត។
សូមបញ្ជាក់ថា គិតត្រឹមខែមិថុនា ឆ្នាំ២០២០នេះ មានករណីគ្រឿងញៀនជាង៥ពាន់ករណី ដោយឃាត់មនុស្សបាន១០,២១៣នាក់ និងប្រមូលបានគ្រឿងញៀនជាងជិត៣០០គីឡូក្រាមទៀត រួមទាំងសម្ភារខុសច្បាប់មួយចំនួនផងដែរ។ នេះបើយោងតាមរបាយការណ៍ដែលចេញផ្សាយដោយអគ្គស្នងការដ្ឋាននគរបាលជាតិ៕
© រក្សាសិទ្ធិដោយ thmeythmey.com