សង្គមអន្តរជាតិ
អន្តរជាតិ
ឥណ្ឌា ចោទចិនថា បានពង្រាយកងទ័ពជាច្រើនតាមព្រំដែន រថយន្តដឹកកងទ័ពឥណ្ឌា ធ្វើដំណើរឆ្ពោះទៅតំបន់ Ladakh ដែលជាតំបន់ជួរភ្នំហិម៉ាល័យ។ រូបភាព៖ Reuters
× ចិន បានពង្រាយកងទ័ព និងអាវុធជាច្រើននៅតាមបណ្តោយព្រំដែនជម្លោះចិន-ឥណ្ឌា ដែលនេះគឺជាសកម្មភាពបំពានកិច្ចព្រមព្រៀងទ្វេភាគីលើបញ្ហាព្រំដែន។ អ្នកនាំពាក្យក្រសួងការបរទេសឥណ្ឌា បានលើកឡើងបែបនេះ នៅថ្ងៃទី២៥ ខែមិថុនា។
ថ្លែងនៅក្នុងសន្និសីទសារព័ត៌មានមួយនាទីក្រុងញូវដែលី លោកAnurag Srivastava អ្នកនាំពាក្យក្រសួងការបរទេសឥណ្ឌា បានលើកឡើងយ៉ាងដូច្នេះថា៖ «ចំណុចសំខាន់នៃបញ្ហា គឺថាតាំងពីដើមខែឧសភាកន្លងមក ភាគីចិន បានពង្រាយកងទ័ព និងសម្ភារយោធាជាច្រើននៅតាមបណ្តោយខ្សែបន្ទាត់ព្រំដែនគ្រប់គ្រងជាក់ស្តែង (LAC)»។
ក្នុងន័យនេះ អ្នកនាំពាក្យក្រសួងការបរទេសឥណ្ឌាចង់សំដៅថា ចិន មិនបានគោរពតាមខលក្ខខណ្ឌ ដែលមានចែងនៅក្នុងកិច្ចព្រមព្រៀងរវាងទីក្រុងញូវដែលី និងទីក្រុងប៉េកាំងឡើយ ជាពិសេសគឺកិច្ចព្រមព្រៀងឆ្នាំ ១៩៩៣ ដែលតម្រូវឲ្យភាគីទាំងសងខាង ពង្រាយកងទ័ពនៅតាមព្រំដែន ក្នុងចំនួនមានកម្រិត។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
កិច្ចព្រមព្រៀងឆ្នាំ ១៩៩៣ គឺជាកិច្ចព្រមព្រៀងរក្សាសន្តិភាព និងភាពស្ងប់ស្ងាត់លើខ្សែបន្ទាត់រួម ដែលត្រូវបានចុះហត្ថលេខាដោយនាយករដ្ឋមន្ត្រីឥណ្ឌា ណារ៉ាស៊ីមហា រ៉ាវ និងសមភាគីចិន លី ផឹង ។ កិច្ចព្រមព្រៀងនេះ ធ្វើឡើងក្នុងដំណើរទស្សនកិច្ចរបស់នាយករដ្ឋមន្ត្រីឥណ្ឌា ណារ៉ាស៊ីមហា រ៉ាវ ទៅកាន់ទឹកដីចិននៅក្នុងឆ្នាំ ១៩៩៣។
ភាពតានតឹងរវាងចិន និងឥណ្ឌាតាមបណ្តាយព្រំដែន បានកើនឡើងតាំងពីខែឧសភាមកម្លេះ។ នៅពេលនោះ គូភាគីទាំងពីរ បានប៉ះទង្គិចគ្នា តាមរយៈការប្រវាយប្រតប និងគប់ដុំថ្ម ប៉ុន្តែវាបង្កតែរបួសប៉ុណ្ណោះ។ យ៉ាងណាក៏ដោយ នៅថ្ងៃទី១៥ ខែមិថុនា ភាពតានតឹងរបស់ភាគីទាំងពីរ បានបង្កឲ្យមានទាហានស្លាប់រៀងខ្លួន។ បញ្ហា ដែលអាចបង្កឲ្យភាគីទាំងពីមានភាពតានតឹងបែបនេះ គឺដោយសារតែការសាងសង់ហេដ្ឋារចនាសម្ព័ន្ធ និងផ្លូវ នៅលើតំបន់ប្របមាត់ទន្លេ Galwan។
សូមបញ្ជាក់ថា នៅថ្ងៃទី២៤ ខែមិថុនា ឥណ្ឌា បានបន្ថែមកងទ័ព ដោយរួមមានកងកាំភ្លើងធំ និងរថយន្តដឹកទាហាន ទៅកាន់តំបន់ព្រំដែនដែលទើបប៉ះទង្គិចជាមួយចិន។ តាមការចុះផ្សាយរបស់ទីភ្នាក់ងារព័ត៌មាន Reuters ភាគីចិនវិញ បានបន្ថែមជំរំយោធា និងសាងសង់លេណដ្ឋាន និងសំណង់ផ្សេងទៀតជាដើម នៅតំបន់ជម្លោះនោះផងដែរ៕
© រក្សាសិទ្ធិដោយ thmeythmey.com