ជាតិ
មន្ត្រីបរិស្ថាន រឹបអូសសាច់សត្វព្រៃជិត៤០គីឡូ ដែលដាក់លក់នៅផ្សារស្ទឹងត្រែង
រូបភាពពីក្រសួងបរិស្ថាន
×![]()
ភ្នំពេញ៖ សត្វត្រកួត ចំនួន ២ក្បាល, សាច់សត្វប្រើសចំនួន ២០គីឡូក្រាម, សាច់ជ្រូកព្រៃ ១៥គីឡូក្រាម និងសាច់ឈ្លូស ៤គីឡូក្រាម ត្រូវបានមន្ត្រីឧទ្យានុរក្សនៃមន្ទីរបរិស្ថាន បានឆ្មក់បង្ក្រាបបទល្មើសជួញដូរសត្វព្រៃខុសច្បាប់នៅក្នុងផ្សារស្ទឹងត្រែងសាមគ្គី នៃទីរួមខេត្តស្ទឹងត្រែង។ នេះបើតាមទំព័រហ្វេសប៊ុកផ្លូវការក្រសួងបរិស្ថានចេញផ្សាយថ្ងៃទី ២៦ មិថុនា។
សាច់សត្វព្រៃ ដែលជាវត្ថុតាងនៃបទល្មើស ត្រូវបានដុតបំផ្លាញចោល ចំណែកឯម្ចាស់ត្រូវបានរត់គេចខ្លួន។ លោក អេង ភីរុង ប្រធានមន្ទីរបរិស្ថានខេត្តស្ទឹងត្រែង បានប្រាប់សារព័ត៌មានថ្មីៗតាមទូរសព្ទថា៖ «សាច់សត្វព្រៃ ដែលរឹបអូស ត្រូវបានយកទៅដុតកម្ទេចចោល។ ហើយនាពេលកន្លងមក អ្នកដែលជួញដូរសត្វព្រៃ ត្រូវបានធ្វើកិច្ចសន្យា។ ប៉ុន្តែបើពលរដ្ឋ នៅតែប្រព្រឹត្ត នឹងត្រូវអនុវត្តតាមនីតិវិធីច្បាប់»។
ប្រធានមន្ទីរបរិស្ថានខេត្តស្ទឹងត្រែងរូបនេះ បញ្ជាក់ថា មន្ទីរបរិស្ថានខេត្ត តែងតែចុះអប់រំដល់ប្រជាពលរដ្ឋ មិនឲ្យបរបាញ់ និងជួញដូរសត្វព្រៃ។ លោក អេង ភីរុង ក៏អំពាវនាវឲ្យប្រជាពលរដ្ឋឈប់បរិភោគសាច់សត្វព្រៃ ប្រសិនបើឈប់បរិភោគសត្វព្រៃ នោះការបរបាញ់ និងការជួញដូរនឹងមិនមានទៀតនោះទេ។
សូមបញ្ជាក់ថា ក្នុងរយៈពេល៤ខែ ដើមឆ្នាំ២០២០ មន្ត្រីឧទ្យានរក្ស និងសហគមន៍តំបន់ការពារធម្មជាតិនានា បានដោះអន្ទាក់បានជាង១ម៉ឺនអន្ទាក់ពីតំបន់ការពារធម្មជាតិ និងកាំភ្លើង កាំភ្លើងកែច្នៃ និងស្នាតេះ ដែលប្រើសម្រាប់ការបរបាញ់សត្វជាង ៣០០ ដើមត្រូវបានដកហូត។ ដោយឡែក កាលឆ្នាំ២០១៩ មានអន្ទាក់ជាង២ម៉ឺន ត្រូវបានមន្ត្រីឧទ្យានរក្ស និងប្រជាសហគមន៍ ដោះចេញពីតំបន់ការពារធម្មជាតិ ដើម្បីការពារសត្វព្រៃដែលកំពុងរស់នៅ៕
Tag:
បរិស្ថាន
ស្ទឹងត្រែង
សត្វព្រៃ
© រក្សាសិទ្ធិដោយ thmeythmey.com
