បុរសតង់ហ្សានីដែលមានភរិយា៤នាក់ និងកូនជាង៣០នាក់ ក្លាយជាមហាសេដ្ឋីក្រោយរកឃើញត្បូងថ្មដ៏កម្រ

អន្តរជាតិ

បុរសតង់ហ្សានីដែលមានភរិយា៤នាក់ និងកូនជាង៣០នាក់ ក្លាយជាមហាសេដ្ឋីក្រោយរកឃើញត្បូងថ្មដ៏កម្រ

27, Jun 2020 , 9:59 pm

រូបភាព

ដោយ: ធីតា

បុរសប្រកបអាជីវកម្មរុករករ៉ែខ្នាតតូចម្នាក់នៅតង់ហ្សានី បានក្លាយជាមហាសេដ្ឋីភ្លាមៗ បន្ទាប់ពីបានរកឃើញត្បូងថ្ម Tanzanite ពីរដុំ ដ៏ធំបំផុតក្នុងប្រទេស។ នេះបើតាមការផ្សាយរបស់ BBC ដោយក្រសួងរ៉ែតង់ហ្សានី បានទិញត្បូងថ្មទម្ងន់សរុប១៥គីឡូក្រាមពីលោក Saniniu Laizer ក្នុងតម្លៃ៣.៤លានដុល្លារអាមេរិក។

Tanzanite ជាប្រភេទត្បូងថ្មដ៏កម្របំផុតនៅលើលោក ហើយធ្លាប់ត្រូវបានរកឃើញកន្លងមកនៅភាគខាងជើងប្រទេសតង់ហ្សានី ។ ត្បូងថ្មនេះ ត្រូវយកច្នៃយកធ្វើជាគ្រឿងអលង្ការប្រណីតនានា ហើយភូគព្ភវិទូម្នាក់ បានប៉ាន់ប្រមាណថា វាអាចប្រឈមបាត់បង់ទាំងស្រុងនារយៈពេល២០ឆ្នាំខាងមុខ។

ត្បូងដ៏កម្រនេះ មានតម្លៃខុសៗគ្នាទៅតាមពណ៌បៃតង ក្រហម ស្វាយ និងខៀវ ហើយការកំណត់តម្លៃក៏ធ្វើតាមពណ៌ និងភាពភ្លឺច្បាស់របស់វាផងដែរ។

លោក Laizer បានរកឃើញត្បូង Tanzanite ទាំងពីរដុំដែលមានទម្ងន់៩.២គីឡូក្រាម និង៥.៨គីឡូក្រាម កាលពីសប្តាហ៍មុន ហើយបានលក់ចេញនៅពុធ ទៅឲ្យស្ថាប័នជំនាញនៃក្រសួងរ៉ែតង់ហ្សានី ដោយឆ្លងកាត់ការដេញថ្លៃមួយនៅភាគខាងជើងតំបន់ Manyara។

លោកប្រធានាធិបតីតង់ហ្សានី John Magufuli ក៏បានទូរសព្ទទៅអបអរសាទរលោក Laizer ផងដែរ ដោយលោករីករាយចំពោះអ្នករុករករ៉ែខ្នាតតូចរូបនេះ ដែលមានឱកាសក្លាយជាមហាសេដ្ឋី។ លោក Magufuli ដែលបានកាន់អំណាចតាំងពីឆ្នាំ២០១៥ មក បានចាត់ទុកវិស័យរុករករ៉ែ ជាផ្នែកនៃការលើកកម្ពស់ជីវភាពប្រជាពលរដ្ឋ។

លោក Laizer អាយុ៥២ឆ្នាំ ដែលមានភរិយា៤នាក់ និងកូនជាង៣០នាក់ បានកាប់គោមួយធ្វើម្ហូបអាហារដើម្បីអបអរសាទរលាបសំណាងរបស់លោក។ បុរសរូបនេះ មានបំណងវិនិយោគនៅសហគមន៍របស់ខ្លួនក្នុងស្រុក Simanjiro តំបន់ Manyara រួមទាំងបង្កើតផ្សារ និងសង់សាលាដើម្បីជួយដល់អ្នកភូមិក្រីក្រ។

ទោះបីជាយ៉ាងណាក៏ដោយ លោក Laizer បានអះអាងប្រាប់ BBC ថា លោកនឹងមិនប្តូររបៀបរស់នៅរបស់ខ្លួននោះឡើយ ដោយលោកបន្តប្រកបរបរចិញ្ចឹមគោ២០០០ក្បាល និងរស់នៅដោយសាមញ្ញ៕