ជាតិ
ខួបកំណើត៦៩ឆ្នាំ៖ បក្សកាន់អំណាចរម្លឹកពីការរំដោះជាតិរហូតដល់សន្តិភាពពេញលេញ
× ដោយសារតែមិនអាចរៀបចំពិធីអធិកអធមដូចសព្វដង នាថ្ងៃខួបនៃការបង្កើតគណបក្ស សេចក្តីថ្លែងការណ៍ជាច្រើនទំព័រ ដែលរៀបរាប់អំពីស្នាដៃ សមិទ្ធផល ជំហរនយោបាយ និងគោលនយោបាយដឹកនាំប្រទេសដូចរៀងរាល់ឆ្នាំនោះ ត្រូវបានជំនួសដោយសារមួយទំព័រ របស់ប្រធានគណបក្សទៅវិញ។
ទោះយ៉ាងណាក៏ដោយ នៅក្នុងសារដ៏ខ្លី ដែលត្រូវបានផ្សព្វផ្សាយជាសាធារណៈ សម្តេច ហ៊ុន សែន នៅតែរំឭកដោយសង្ខេប ពីបុព្វហេតុ និងបេសកកម្មរបស់គណបក្ស ប្រាប់សមាជិកសមាជិការបស់ខ្លួន ដែលជាការប្រមូលអ្នកស្នេហាជាតិ អ្នកស្រឡាញ់លទ្ធិប្រជាធិបតេយ្យ និងសន្តិភាព។
សម្តេច ហ៊ុន សែន បានសរសេរបន្តយ៉ាងដូច្នេះថា៖រយៈពេល៤១ឆ្នាំកន្លងមកនេះ គណបក្សប្រជាជនកម្ពុជា បានដឹកនាំប្រទេសជាតិឆ្លងកាត់ឧបសគ្គ និងការលំបាកច្រើនរាប់មិនអស់ ដោយសម្រេចបានសមិទ្ធផលធំៗ ជាប្រវត្តិសាស្ត្រយ៉ាងច្រើន តាំងពីដំណាក់កាលនៃការសង្គ្រោះជាតិ ពីរបបប្រល័យពូជសាសន៍ ប៉ុល ពត ដល់ [កម្ពុជា] ទទួលបានសន្តិភាពពេញលេញ…»។
ការអនុវត្តវិធានសុខាភិបាល ដើម្បីចៀសផុតពីការឆ្លងរាលដាលនៃជំងឺកូវីដ-១៩ គឺជាមូលហេតុដែលប្រធានគណបក្សប្រជាជនកម្ពុជា បញ្ជាក់ប្រាប់សមាជិក សមាជិកនៅទូទាំងប្រទេសថា គណបក្ស មិនអាចរៀបចំពិធីខួប នៃការបង្កើតគណបក្ស បានឧឡារិកដូចរៀងរាល់ឆ្នាំ។ នៅក្នុងបរិបទនេះ សម្តេច ហ៊ុន សែន ក៏បានដាស់តឿនប្រាប់សមាជិក សមាជិកាគ្រប់ជាន់ថ្នាក់ និងប្រជាពលរដ្ឋទូទាំងប្រទេស ឱ្យពួកគេអនុវត្តឱ្យបានហ្មត់ចត់ នូវការណែនាំរបស់ក្រសួងសុខាភិបាល និងវិធានការនានា ដើម្បីចៀសផុតពីការឆ្លងជំងឺកូវីដ-១៩នេះ។
«ខ្ញុំមានក្តីសង្ឃឹមជឿជាក់ថា អាស្រ័យដោយការចូលរួមដ៏សកម្ម របស់ប្រជាជនគ្រប់រូប យើងពិតជានឹងទទួលបានជោគជ័យ លើសមរភូមិប្រយុទ្ធនឹងជំងឺកូវីដ-១៩នេះ។»។ នេះជាការអះអាងរបស់សម្តេចប្រធានគណបក្សប្រជាជនកម្ពុជា។
គួរបញ្ជាក់ផងដែរថា បើទោះជាមិនមានការរៀបចំពិធីអធិអធម ដើម្បីប្រារព្ធខួបនៃការបង្កើតគណបក្ស ប៉ុន្តែថ្នាក់ដឹកនាំជាន់ខ្ពស់នៃគណបក្សកាន់អំណាចនេះ បានយកថ្ងៃដ៏សំខាន់នេះ រៀបចំពិធីសាសនា ឡើងអគារស្នាក់ការកណ្តាល ដែលមានតម្លៃជិត៣០លានដុល្លារនេះតែម្តង៕
© រក្សាសិទ្ធិដោយ thmeythmey.com