ជាតិ
ខេត្តកំពង់ចាមមាន«ផ្សារចុងសប្ដាហ៍»ដែលដាក់លក់បន្លែផ្លែឈើសុវត្ថិភាព និងសរីរាង្គ
×![]()
ភ្នំពេញ៖ មន្ទីរពាណិជ្ជកម្មខេត្តកំពង់ចាម ក្រោមគម្រោងជំរុញទីផ្សារសម្រាប់កសិកម្មខ្នាតតូច (AIMS) បានរៀបចំ «ផ្សារចុងសប្ដាហ៍» សម្រាប់លក់បន្លែ-ផ្លែឈើសុវត្ថិភាព និងសរីរាង្គ ដែលដាំដុះដោយកសិករនៅក្នុងខេត្តកំពង់ចាម។ «ផ្សារចុងសប្ដាហ៍» នេះ ចាប់ផ្ដើមលក់នៅថ្ងៃទី២៧-២៨ មិថុនានេះ នៅមុខមន្ទីរពាណិជ្ជកម្មខេត្តកំពង់ចាម។
បើតាមទំព័រហ្វេសប៊ុកមន្ទីរពាណិជ្ជកម្មខេត្តកំពង់ចាម «ផ្សារចុងសប្តាហ៍» បង្កើតក្នុងគោលបំណង ផ្សព្វផ្សាយផលិតផលកសិកម្មរបស់កសិករ សហគមន៍កសិកម្ម អ្នកប្រមូលទិញ សហគ្រាសនានា ដែលគាំទ្រដោយដោយគម្រោងជំរុញទីផ្សារសម្រាប់កសិកម្មខ្នាតតូច។ បន្ថែមលើនេះ «ផ្សារចុងសប្តាហ៍» នឹងបង្កើតឱកាសដល់ក្រុមកសិករផលិតចាប់ដៃគូជាមួយអ្នកប្រមូលទិញធំៗក្នុងតំបន់ និងក្រៅតំបន់ ដើម្បីបង្កើនផលិតភាព និងផលិតកម្ម។
តាមរយៈផ្សារចុងសប្ដាហ៍នេះ នឹងចូលរួមបង្កើតភាពអង់អាចដល់កសិករក្នុងវិស័យកសិពាណិជ្ជកម្ម ដែលជំរុញឲ្យមានគាំទ្រផលិតផលខ្មែរកាន់តែច្រើន។ «ផ្សារចុងសប្ដាហ៍» មានលក់បន្លែផ្លែឈើសុវត្ថិភាព និងសរីរាង្គ, មាន់ស្រែ, អង្ករ ,ម្សៅដំឡូងមី និងផលិតផលកសិកម្មកែច្នៃជាច្រើនទៀត៕
រូបភាពពីក្រុមការងារគម្រោងជំរុញទីផ្សារសម្រាប់កសិកម្មខ្នាតតូច (AIMS)៖
© រក្សាសិទ្ធិដោយ thmeythmey.com
