COVID-19
អន្តរជាតិ
ឥណ្ឌូណេស៊ី ត្រៀមប្តូររបៀបធ្វើការរបស់មន្ត្រីឲ្យស្របតាមបច្ចេកវិទ្យា ក្រោយវិបត្តិ Covid-19 បញ្ចប់
× វិបត្តិមេរោគរាតត្បាត Covid-19 មិនត្រឹមតែគំរាមកំហែងសេដ្ឋកិច្ច ពាណិជ្ជកម្ម លើវិស័យឯកជនប៉ុណ្ណោះនោះទេ ក៏ប៉ុន្តែវីរុសនេះ បានធ្វើឲ្យកកស្ទះការបំពេញការងារជាទូទៅផងដែរ។ ជាដំណោះស្រាយ និងដើម្បីកែទម្រង់រដ្ឋបាលសាធារណៈឲ្យកាន់តែមានភាពបន់បែនផងនោះ រដ្ឋាភិបាលឥណ្ឌូណេស៊ី បានដាក់ផែនការកែទម្រង់របៀបរបបធ្វើការរបស់មន្ត្រីស៊ីវិល ដោយពឹងផ្អែកខ្លាំងលើប្រព័ន្ធបច្ចេកវិទ្យាវិញម្តង។
រដ្ឋមន្ត្រីទទួលបន្ទុកកំណែទម្រង់រដ្ឋបាល និងការិយាល័យធិបតេយ្យឥណ្ឌូណេស៊ី លោក Tjahjo Kumolo នៅថ្ងៃ ២៦ មិថុនា បានឲ្យដឹងថា វិបត្តិ Covid-19 បានបង្កផលប៉ះពាល់ធ្ងន់ធ្ងរលើរបៀបរបបការងាររបស់មន្ត្រីរដ្ឋការស៊ីវិល ដ្បិតកន្លងមក ការងារភាគច្រើន ត្រូវពឹងផ្អែកលើការធ្វើការនៅនឹងកន្លែងការិយាល័យតែម្តង ក៏ប៉ុន្តែដោយសារតែវិបត្តិនេះ មន្ត្រីរដ្ឋ ត្រូវបង្ខំចិត្តផ្លាស់ប្តូររបៀបធ្វើការថ្មី ដែលធ្វើឲ្យដំណើរការការងារមិនអាចរលូនដូចពេលមុន។
តាមការចុះផ្សាយរបស់សារព័ត៌មាន Jakarta Globe ជាការឆ្លើយតប និងជាចក្ខុវិស័យវែងឆ្ងាយផង លោករដ្ឋមន្ត្រី បានអះអាងថា រដ្ឋាភិបាលឥណ្ឌូណេស៊ី នឹងធ្វើការផ្លាស់ប្តូរទ្រង់ទ្រាយធំមួយលើការិយាល័យធិបតេយ្យ ក្រោយវិបត្តិ Covid-19 បញ្ចប់។ ហើយនោះគឺ របៀបរបបធ្វើការរបស់មន្ត្រីរដ្ឋឥណ្ឌូណេស៊ី នឹងត្រូវពឹងផ្អែកខ្លាំងលើប្រព័ន្ធបច្ចេកវិទ្យាឌីជីថល។
តាមរបៀបធ្វើការថ្មីនេះ លោករដ្ឋមន្ត្រីរូបនេះ រំពឹងថា មន្ត្រីរដ្ឋ នឹងកាន់តែផ្លាស់ប្តូរខ្លួនទៅតាមបច្ចេកវិទ្យាទំនើប ហើយការទទួលខុសត្រូវរបស់ពួកគេ នឹងអាចមានភាពបន់បែនជាងមុន។ ពួកគេ ក៏អាចមានលទ្ធភាពក្នុងការធ្វើការពីចម្ងាយ និងកន្លែងផ្សេងៗគ្នាបានប្រកបដោយភាពរលូនផងដែរ។ លោករដ្ឋមន្ត្រី គូសបញ្ជាក់ថា នៅពេលដែលកំណែទម្រង់នេះដំណើរការនេះ នោះមន្ត្រីរដ្ឋការស៊ីវិលអនាគត នឹងអាចបំពេញការងារសម្រាប់រដ្ឋាភិបាលពេញសមត្ថភាព និងមានភាពបន់បែនខ្ពស់តែម្តង។
គួរជម្រាបផងដែរថា វីរុស Covid-19 ដែលជាប្រភេទវីរុសរាតត្បាតងាយចម្លងពីមនុស្សម្នាក់ទៅមនុស្សម្នាក់ទៀតតាមរយៈការប្រាស្រ័យទាក់ទងដោយផ្ទាល់នោះ បានធ្វើឲ្យចរន្តការងារសកលរងការគំរាមកំហែងខ្លាំង ជាពិសេសនោះ នៅក្នុងបណ្តាប្រទេសក្រីក្រ និងកំពុងអភិវឌ្ឍ ដ្បិតប្រទេសទាំងនេះ ពុំទាន់មានបច្ចេកវិទ្យាទំនើបគ្រប់គ្រាន់សម្រាប់ប្រតិបត្តិការងាររបស់ប្រទេសនៅឡើយនោះទេ៕
Tag:
ឥណ្ឌូណេស៊ី
រដ្ឋបាល
Covid19
© រក្សាសិទ្ធិដោយ thmeythmey.com