ភ្នំពេញ៖ ស្ថានទូតកម្ពុជាប្រចាំម៉ាឡេស៊ី ប្រាប់ឱ្យពលរដ្ឋខ្មែររស់នៅទីនោះ ហើយមានបំណងចង់មកកម្ពុជានោះ ប្រញាប់ទិញសំបុត្រយន្តហោះ សម្រាប់ជើងយន្តហោះថ្ងៃទី៣ កក្កដា។
ស្ថានទូតកម្ពុជា បានបញ្ជាក់ថា ជើងយន្តហោះពាណិជ្ជកម្ម Malaysian airlines នឹងហោះទៅកាន់ទីក្រុងភ្នំពេញ តាមជើងហោះហើរលេខ MH 754។ បើតាមស្ថានទូត ជើងយន្តហោះពាណិជ្ជកម្មធម្មតានេះ មិនមែនជាជើងយន្តហោះពាណិជ្ជកម្មពិសេសដូចកន្លងមកទេ។
ចំពោះការទិញសំបុត្រយន្តហោះនេះវិញ ស្ថានទូតកម្ពុជា ក៏រំឭកពលរដ្ឋខ្មែរឱ្យពិនិត្យមើលលិខិតឆ្លងដែរ ហើយបើលិខិតឆ្លងអស់សុពលភាព (passport ងាប់) ត្រូវទាក់ទង ឬមកស្ថានទូត ដើម្បីទទួលបានការពន្យល់ណែនាំ។
ចំណែកលិខិតឆ្លងដែនត្រូវមានទិដ្ឋាការ (visa) ត្រឹមត្រូវ ឬទិដ្ឋាការនោះអស់សុពលភាព (visa ងាប់) គិតចាប់ពីថ្ងៃទី០១ ខែមករា ឆ្នាំ២០២០។ ប៉ុន្តែប្រសិនបើ visa អស់សុពលភាពមុនថ្ងៃទី០១ ខែមករា ឆ្នាំ២០២០ ត្រូវទៅដោះស្រាយជាមួយអន្តោប្រវេសន៍ម៉ាឡេស៊ីឱ្យបានរួចរាល់ជាមុនសិន។ នេះជាការបញ្ជាក់របស់ស្ថានទូតកម្ពុជា។
ស្ថានទូតកម្ពុជាប្រចាំម៉ាឡេស៊ី បានសរសេរលើហ្វេសប៊ុកដូច្នេះថា៖«ក្នុងករណីមានគ្រប់លក្ខខណ្ឌខាងលើ សូមទិញសំបុត្រ online ដោយផ្ទាល់នៅលើគេហទំព័ររបស់ក្រុមហ៊ុន Malaysian Airlines ហើយអាចសាកសួរព័ត៌មានបន្ថែមដោយ WhatsApp ទៅកាន់លេខទូរសព្ទ +60122605359 »។
បន្ថែមពីនេះ ស្ថានទូតខ្មែរ ក៏ផ្ដាំពលរដ្ឋឱ្យមានការប្រុងប្រយ័ត្ន ចំពោះការទិញសំបុត្រនេះដែរ ខណៈជនឆបោកមួយចំនួន កំពុងឆ្លៀតឱកាសបោកប្រាស់យកប្រាក់ពលរដ្ឋ តាមរយៈការទិញសំបុត្រយន្តហោះនេះ។«សូមកុំជឿតាមការឃោសនារបស់ពួកមេខ្យល់ ដែលធានាទិញសំបុត្រឱ្យបងប្អូនត្រឡប់ទៅវិញប្រសិនបើមិនមានគ្រប់លក្ខខណ្ឌខាងលើពីព្រោះកន្លងមក មានបងប្អូនខ្លះបានចាញ់បោកមេខ្យល់ខាតបង់លុយកាក់ជាច្រើន ប៉ុន្តែពុំអាចត្រឡប់ទៅវិញបាន»។ នេះបើតាមស្ថានទូតខ្មែរ។
បើគិតចាប់ពីថ្ងៃទី១២ មិថុនាមក និស្សិត និងពលរដ្ឋខ្មែរជាង៣០០នាក់ និងជនបរទេសជាង១០០នាក់ ពីម៉ាឡេស៊ី បានវិលត្រឡប់មកកម្ពុជា តាមរយៈកិច្ចសម្របសម្រួល និងការបើកជើងហោះហើរ រវាងរដ្ឋាភិបាលទាំងពីរ។
គិតត្រឹមថ្ងៃទី២៩ មិថុនានេះ កម្ពុជា មានឆ្លងជំងឺកូវីដ-១៩ ចំនួន១៤១នាក់ ដោយក្នុងនោះជាសះស្បើយ១៣០នាក់។ ចំណែកម៉ាឡេស៊ី មានអ្នកជំងឺកូវីដ-១៩ ជាង៨,៦ពាន់នាក់ ជាសះស្បើយជាង៨,៣ពាន់នាក់ និងស្លាប់ជាង១២១នាក់៕