សង្គមអន្តរជាតិ
អន្តរជាតិ
ប្រមុខការទូតអាមេរិក៖ សមុទ្រចិនខាងត្បូង មិនមែនជាអាណាចក្រសមុទ្ររបស់ចិនទេ
លោក ម៉ៃ ប៉ុមប៉េអូ រដ្ឋមន្រ្តីការបរទេសអាមេរិក។ រូបភាព៖ AFP
×![]()
ដោយ: ធៀន ភារិន្ទ
រដ្ឋមន្ត្រីការបរទេសអាមេរិក លោក ម៉ៃ ប៉ុមប៉េអូ នៅថ្ងៃទី២៨ ខែមិថុនា បានលើកឡើងថា ចិន មិនអាចត្រូវបានអនុញ្ញាតឲ្យចាត់ទុកសមុទ្រចិនខាងត្បូង ជាអាណាចក្រសមុទ្រ (Maritime Empire) របស់ខ្លួនឡើយ។ ការអះអាងរបស់ប្រមុខការទូតអាមេរិកបែបនេះ ធ្វើឡើងបន្ទាប់ពីអាស៊ាន បានចេញសេចក្តីថ្លែងការណ៍រួមមួយ ជុំវិញការប្រើប្រាស់អនុសញ្ញាស្តីពីច្បាប់សមុទ្រនៃអង្គការសហប្រជាជាតិ (UNCLOS) ឆ្នាំ១៩៨២ ជាមូលដ្ឋាននៃការប្រើប្រាស់សិទ្ធិលើសមុទ្រចិនខាងត្បូង។ 
អត្ថបទទាក់ទង
តាមរយៈសំណេរលើបណ្តាញសង្គមTwitter របស់ខ្លួន លោក ម៉ៃ ប៉ុមប៉េអូ រដ្ឋមន្ត្រីការបរទេសអាមេរិក បានលើកឡើងយ៉ាងដូច្នេះថា៖ «ចិន មិនអាចត្រូវបានអនុញ្ញាឲ្យចាត់ទុកសមុទ្រចិនខាងត្បូង ជាអាណាចក្រសមុទ្ររបស់ខ្លួនឡើយ»។ ជាមួយគ្នានេះ លោក ប៉ុមប៉េអូ បានបន្តថា អាមេរិក នឹងជជែកពីបញ្ហានេះបន្ថែមទៀត នៅក្នុងពេលឆាប់ៗខាងមុខ។
ក្រៅពីលើកឡើងពីការមិនអនុញ្ញាតឲ្យចិនអុងអាត់តែឯងនៅសមុទ្រចិនខាងត្បូង ប្រមុខការទូតអាមេរិករូបនេះ ក៏បានសម្តែងស្វាគមន៍ចំពោះសេចក្តីថ្លែងការណ៍រួមរបស់ថ្នាក់ដឹកនាំអាស៊ាន ដែលជំរុញឲ្យ ជម្លោះសមុទ្រចិនខាងត្បូង គួរតែដោះស្រាយដោយផ្អែកទៅតាមច្បាប់អន្តរជាតិ ជាពិសេសគឺអនុសញ្ញា UNCLOS ឆ្នាំ១៩៨២ ផងដែរ។
អនុសញ្ញាស្តីពីច្បាប់សមុទ្រនៃអង្គការសហប្រជាជាតិឆ្នាំ ១៩៨២ គឺជាលិខិតបទដ្ឋានគតិយុត្តិអន្តរជាតិមួយ ដែលកំណត់សិទ្ធិរបស់ប្រទេសនីមួយៗនៅលើដែនសមុទ្រ កំណត់ពីព្រំដែនសមុទ្រ នាវាចរណ៍ តំបន់នេសាទ និងចំណុចសំខាន់ជាច្រើនទៀតទាក់ទិនសមុទ្រ។
នាកិច្ចប្រជុំកំពូលអាស៊ាននាថ្ងៃទី២៦ ខែមិថុនា ប្រធានាធិបតីហ្វីលីពីន លោករ៉ូឌ្រីហ្គោ ឌូទើតេ បានលើកឡើងថា ទោះបីតំបន់អាស៊ីអាគ្នេយ៍កំពុងតែប្រយុទ្ធប្រឆាំងនឹងវីរុស Covid-19 ក៏ដោយ នៅតែមានករណីនៃការប៉ះទង្គិចគ្នានៅក្នុងសមុទ្រចិនខាងត្បូង បន្តកើតឡើង ដែលបង្កដោយភាគីខ្លះ។ ចំណែកនាយករដ្ឋមន្ត្រីវៀតណាមវិញ ដែលបានលើកឡើងស្រដៀងទៅនឹងហ្វីលីពីន ដែរនោះ បានអះអាងថា ក្នុងពេលពិភពលោក កំពុងប្រយុទ្ធប្រឆាំងជាមួយជំងឺឆ្លងសកល វាមានសកម្មភាពមិនទទួលខុសត្រូវ ការបំពានច្បាប់អន្តរជាតិ ដែលប៉ះពាល់ដល់ស្ថិរភាព និងសន្តិសុខនៅក្នុងតំបន់កើតឡើង។
នៅខែមេសាកន្លងទៅ ទាំងហ្វីលីពីន និងវៀតណាម បានដាក់បណ្តឹងតវ៉ាទៅកាន់ចិន បន្ទាប់ពីចិន បានប្រកាសដោយឯកតោភាគីក្នុងការបង្កើតតំបន់រដ្ឋបាលថ្មីនៅក្នុងប្រជុំកោះ ដែលជាផ្នែកមួយនៃសមុទ្រចិនខាងត្បូង ដែលហ្វីលីពីន និងវៀតណាម ក៏បានទាមទារជាតំបន់កម្មសិទ្ធិរបស់ខ្លួនផងដែរ។
សូមបញ្ជាក់ ជម្លោះសមុទ្រចិនខាងត្បូង គឺជារបៀបវារៈមួយដ៏សំខាន់ ក្នុងចំណោមរបៀបវារៈផ្សេងទៀត នៅក្នុងកិច្ចប្រជុំកំពូលអាស៊ានលើកទី ៣៦ ក្រោមមូលបទ «ភាពស្អិតល្មួត និងការឆ្លើយតប» ដែលធ្វើឡើងតាមវីដេអូ Conference។ កិច្ចប្រជុំកំពូលអាស៊ានលើកនេះ វៀតណាមគឺជាប្រធានផ្លាស់វេន៕
Tag:
អាមេរិក
ចិន
© រក្សាសិទ្ធិដោយ thmeythmey.com
