ជាតិ
សុខភាព
ការពន្យារពេលចាក់វ៉ាក់សាំងបង្ការជំងឺលើទារក ឬកុមារ អាចប្រឈមនឹងអ្វីខ្លះ?
×![]()
ភ្នំពេញ៖ ការចាក់ថ្នាំបង្ការ ឬវ៉ាក់សាំងលើទារក-កុមារ គឺជួយឱ្យទារក ឬកុមារជៀសផុតពីជំងឺផ្សេងៗ និងអាចកាត់បន្ថយអត្រាគ្រោះថ្នាក់ និងស្លាប់ផងដែរ។ លោកវេជ្ជបណ្ឌិត លី លីមអ៊ាង ឯកទេសផ្នែកកុមារ និងទារក បានលើកឡើងថា ទារកទើបកើតត្រូវទទួលការចាក់វ៉ាក់សាំងឬថ្នាំបង្ការ ចំនួនពីរមុខគឺ ថ្នាំបង្ការជំងឺថ្លើមប្រភេទបេ (B) និងថ្នាំបង្ការជំងឺរបេង។ ក្រៅពីថ្នាំបង្ការទាំងពីមុខនេះ កុមារក៏ត្រូវតែទទួលការចាក់ថ្នាំបង្ការលើជំងឺផ្សេងៗទៀត ដូចជា ជំងឺរលោកសួត, ក្អកមាន់, រលាកខួរក្បាល និងជំងឺគ្រុនស្វិតដៃជើងជាដើម។
ដើម្បីជ្រាបច្បាស់សូមអញ្ជើញលោក-អ្នកនាងទស្សនាបទសម្ភាសរវាង កញ្ញា អ៊ុត រស្មី អ្នកសារព័ត៌មានថ្មីៗ ជាមួយ វេជ្ជបណ្ឌិត លី លីមអ៊ាង ឯកទេសផ្នែក កុមារ និងទារក នៃមន្ទីរពហុព្យាបាលសម្ភពសោភាមានជ័យ ដូចតទៅ៖
លោកវេជ្ជបណ្ឌិតឯកទេសផ្នែកកុមារ និងទារក លី លីម អ៊ាង បានណែនាំថា ទារក ឬកុមារ ត្រូវតែមកទទួលការចាក់ថ្នាំបង្ការ តាមវេជ្ជបញ្ជារបស់គ្រូពេទ្យ ឱ្យបានត្រឹមត្រូវតាមការកំណត់ ហើយបើទារក ឬកុមារ ពន្យារថ្ងៃចាក់វ៉ាក់សាំងយូរ នោះនឹងធ្វើឱ្យការផលិតប្រព័ន្ធភាពស៊ាំរបស់កុមារមិនបានគ្រប់គ្រាន់ ហើយប្រសិទ្ធភាពនៃថ្នាំបង្ការអាចថយចុះ ឬអាចគ្មានប្រសិទ្ធភាពផងដែរ។
បើតាមលោកវេជ្ជបណ្ឌិតឯកទេសផ្នែកកុមារ និងទារក នៃមន្ទីរពហុព្យាបាលសម្ភពសោភាមានជ័យ រូបនេះ បានអះអាងថា ក្រោយពេលចាក់ថ្នាំបង្ការទារក ឬកុមារ អាចមានអាការៈក្ដៅខ្លួនទៅតាមប្រភេទ នៃថ្នាំបង្ការនីមួយៗ ប៉ុន្តែ អាការៈនេះមិនធ្ងន់ធ្ងរនោះទេ។ លោកវេជ្ជបណ្ឌិតឯកទេសផ្នែកកុមារ និងទារក លី លីម អ៊ាង បានណែនាំពីវិធីបញ្ចុះកម្ដៅទារក ឬកុមារក្រោយពេលចាក់ថ្នាំបង្ការយ៉ាងដូច្នេះថា៖«អ្នកម្ដាយអាចយកកន្សែងពោះគោ ជ្រលក់ជាមួយទឹកក្ដៅឧណ្ហៗ ស្អំលើខ្លួនទារក ឬកុមារ ដើម្បីបញ្ចុះកម្ដៅ។ ប្រសិនបើ ទារក ឬកុមារ នៅតែក្ដៅខ្លួនទៀតនោះ អ្នកម្តាយត្រូវតែប្រញាប់យកកូនមកជួបវេជ្ជបណ្ឌិតជំនាញ»៕
Tag:
វ៉ាក់សាំង
ទារក
កុមារ
សុខភាព
© រក្សាសិទ្ធិដោយ thmeythmey.com
