កីឡាជាតិ
ជាតិ
ពានសម្តេច ហ៊ុន សែន ថ្នាក់ខេត្តវគ្គ១/៤៖ សៀមរាបប៉ះកណ្តាល, ព្រៃវែងជួបកោះកុងថ្ងៃនេះ ក្រុមកីឡាករខេត្តកណ្តាលអបអរក្រោយរកគ្រាប់បាល់បានកន្លងមក, រូបពី CNCC
× ការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន ថ្នាក់ខេត្តប្រចាំឆ្នាំ២០២០ បានឈានដល់វគ្គ៨ក្រុមចុងក្រោយ(១/៤) ដោយនៅថ្ងៃអង្គារនេះ មានការប្រកួតចំនួនពីរគូ ដែលធ្វើឡើងនៅទីលានផ្សេងៗគ្នា។ ក្នុងនោះក្រុមសៀមរាបប៉ះក្រុមកណ្តាល ខណៈក្រុមព្រៃវែងស្វាគមន៍កោះកុង។
ក្រោយផ្អាកការប្រកួតអស់រយៈពេលជាច្រើនខែដោយសារការរាតត្បាតនៃជំងឺកូវីដ-១៩ ពានរង្វាន់សម្តេច ហ៊ុន សែន បានវិលត្រឡប់មកវិញហើយ។ ប៉ុន្តែការវិលត្រឡប់នេះ មានលក្ខណៈខុសពីប្លែកពីការចាប់ផ្តើមលើកដំបូង ពោលគឺលើកនេះគណៈកម្មការប្រកួតបាល់ទាត់ជាតិកម្ពុជា(CNCC) មិនអនុញ្ញាតឲ្យមានទស្សនិកជនចូលរួមទស្សនាផ្ទាល់នោះទេ។ ការធ្វើបែបនេះ គឺដើម្បីរួមចំណែកបង្ការនិងទប់ស្កាត់ការឆ្លងរីករាលដាលនៃជំងឺកូវីដ-១៩។
សម្រាប់ការប្រកួតជើងទី១វគ្គ៨ក្រុមចុងក្រោយនៃពានរង្វាន់សម្តេច ហ៊ុន សែន ថ្នាក់ខេត្តនៅថ្ងៃទី៣០ ខែមិថុនា ឆ្នាំ២០២០ នេះមានការប្រកួតចំនួនពីរគូ។ ក្នុងនោះក្រុមជើងឯករងឆ្នាំចាស់ខេត្តសៀមរាប ប៉ះ ក្រុមខេត្តកណ្តាលនៅកីឡដ្ឋានខេត្តសៀមរាប ខណៈទីលានខេត្តព្រៃវែងក្លាយជាទីតាំងកាត់សេចក្តីរវាងក្រុមខេត្តព្រៃវែងជាមួយក្រុមខេត្តកោះកុង។ ការប្រកួតទាំងពីរគូនេះ ធ្វើឡើងនៅម៉ោង៣រសៀលដូចគ្នា។
គួររំលឹកថា ក្រុមត្បូងឃ្មុំជាម្ចាស់ជើងឯកពានរង្វាន់សម្តេច ហ៊ុន សែន ថ្នាក់ខេត្តប្រចាំឆ្នាំ២០១៩ ក្រោយឈ្នះក្រុមសៀមរាបក្នុងលទ្ធផល ១-០ នៅវគ្គផ្តាច់ព្រ័ត្រ។ ចំណែកក្រុមរតនៈគិរីទទួលបានចំណាត់ថ្នាក់លេខ៣ក្រោយយកឈ្នះក្រុមកោះកុង ៤-១។ ក្រុមជើងឯកត្បូងឃ្មុំទទួលបានប្រាក់រង្វាន់លើកទឹកចិត្តចំនួន១៥លានរៀល រីឯក្រុមជើងឯករងសៀមរាបទទួលបាន៧លាន៥០ម៉ឺនរៀល ចំណែកក្រុមលេខរតនៈគិរីបាន៥លានរៀល៕
Tag:
បាល់ទាត់
Hun Sen Cup 2020
© រក្សាសិទ្ធិដោយ thmeythmey.com