លោក ឡុង សាលវ័ន្ត គ្រូបង្វឹកក្លិបសាលវ័ន្តកីឡាត្រូវបានបោះឆ្នោតតែងតាំងឲ្យធ្វើជាគ្រូបង្វឹកក្រុមជម្រើសជាតិគុនខ្មែរប្រចាំឆ្នាំ២០២០ ខណៈលោក អេ ភូថង គ្រូជំនួយកាលពីឆ្នាំ២០១៩ មិនទទួលបានសម្លេងគ្រប់គ្រាន់ក្នុងការបន្តធ្វើជាគ្រូជំនួយឡើយ។ ការបោះឆ្នោតនោះ មានបេក្ខជនឈរឈ្មោះបោះឆ្នោតចំនួន៨រូប តែដកខ្លួន៣រូប។
សហព័ន្ធកីឡាប្រដាល់គុនខ្មែរនៅថ្ងៃទី២៦ ខែមិថុនា ឆ្នាំ២០២០ បានរៀបចំការបោះឆ្នោតជ្រើសរើសគ្រូបង្វឹក និងគ្រូជំនួយក្រុមជម្រើសជាតិគុនខ្មែរប្រចាំឆ្នាំ២០២០ ដែលមានតំណាងក្លិប-សមាគម និងមន្ទីរអប់រំយុវជន និងកីឡាតាមបណ្តាខេត្តជាង១០រូបចូលរួមបោះឆ្នោត។ ការឆ្នោតនេះធ្វើឡើងតាមរយៈការគូសសន្លឹកឆ្នោត ប្រកបដោយភាពត្រឹមត្រូវនិងយុត្តិធម៌។
តាមរយៈលទ្ធផលបោះឆ្នោត លោក ឡុង សាលវ័ន្ត គ្រូបង្វឹកក្លិបសាលវ័ន្តកីឡា ត្រូវបានជាប់ឆ្នោតជាគ្រូបង្គោល ក្រោយទទួលបានសំឡេងគាំទ្រចំនួន៧សំឡេង ខណៈលោក ជា រិទ្ធ គ្រូបង្វឹកក្លិបគុហារព្រហ្មជ័យ ជាប់ឆ្នោតជាគ្រូជំនួយជាមួយសំឡេងគាំទ្រចំនួន៥សំឡេង។ នេះជាលើកទី៣របស់លោក ឡុង សាលវ័ន្ត សម្រាប់តំណែងមួយនេះ ដ្បិតលោកធ្លាប់ត្រូវបានសហព័ន្ធកីឡាប្រដាល់គុនខ្មែរតែងតាំងជាគ្រូបង្វឹកពីរលើករួចមកហើយ កាលពីឆ្នាំ២០១៧ និងឆ្នាំ២០១៩។
ប៉ុន្តែវាជាលើកទី១សម្រាប់លោក ជា រិទ្ធ ដែលបានក្លាយជាចំណែកមួយនៃក្រុមជម្រើសជាតិគុនខ្មែរ។ តែយ៉ាងណាលោក ជា រិទ្ធ ជាអាជ្ញាកណ្តាលអន្តរជាតិ ដែលត្រូវបានសហព័ន្ធបញ្ជូនកីឡាប្រដាល់គុនខ្មែរបញ្ជូនទៅកាត់ក្តីក្នុងការប្រកួតកីឡាស៊ីហ្គេមលើកទី៣០នៅហ្វីលីពីនកាលពីឆ្នាំ២០១៩។ អ្វីដែលកាន់តែពិសេសគឺ លោក ត្រូវបានគណៈកម្មការរៀបចំការប្រកួតប្រដាល់របស់ហ្វីលីពីនជ្រើសរើសជាអាជ្ញាកណ្តាលល្អប្រចាំព្រឹត្តិការណ៍នេះទៀតផង។
ដោយឡែកលោក អេ ភូថង ដែលជាគ្រូជំនួយក្រុមជម្រើសជាតិកាលពីឆ្នាំ២០១៩ មិនទទួលបានសម្លេងគ្រប់គ្រាន់ក្នុងការបន្តធ្វើជាគ្រូជំនួយនៅឆ្នាំ២០២០ឡើយ។ ការបាត់បង់ឱកាសនេះ ធ្វើឡើងក្រោយអតីតកីឡាករឆ្នើមរបស់កម្ពុជារូបនេះ ទទួលបានសំឡេងគាំទ្រតិចជាងលោក ជា រិទ្ធ មួយសំឡេង ពោលគឺលោកទទួលបានការគាំទ្រតែ៤សំឡេងប៉ុណ្ណោះ។
សម្រាប់ការបោះឆ្នោតនេះមានបេក្ខជនឈរឈ្មោះបោះឆ្នោតចំនួន៨រូបរួមមានលោក ឡុង សាលវ័ន្ត(៧សំឡេង), លោក ជា រិទ្ធ(៥សំឡេង), លោក អេ ភូថង(៤សំឡេង), លោក អាត់ សារ៉ាត់(២សំឡេង) និងលោក ទេស សារីន(គ្មានសំឡេងគាំទ្រ)។ ចំណែកលោក ហង់ ស៊ឺន, លោក ធន់ សុភា និងលោក ឡៅ ស៊ីឡាត ត្រូវបានដកខ្លួន។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរអះអាងថា មូលហេតុ ដែលគ្រូបង្វឹកទាំងបីដកខ្លួនចេញពីការបោះឆ្នោតជ្រើសរើសគ្រូបង្វឹកនិងគ្រូជំនួយមិនមែនពួកគេគ្មានសមត្ថភាពនោះទេ គឺដោយសារកត្តាពេលវេលា។ បើតាមប្រធានសហព័ន្ធរូបនេះ គ្រូបង្វឹកទាំងបីពុំមានពេលវេលាគ្រប់គ្រាន់ក្នុងការបំពេញការងារតាមការកំណត់របស់ក្រសួងអប់រំយុវជននិងកីឡាបាននោះទេ ដ្បិតពួកគេសុទ្ធតែរវល់បង្ហាត់សិស្សនៅក្លិបរៀងៗខ្លួន។
លោកបានបន្ថែមថា៖«ជាគ្រូបង្វឹកជម្រើសជាតិត្រូវមានភារកិច្ចច្រើនដែលត្រូវធ្វើ ហើយត្រូវមានវិន័យតឹងរ៉ឹង និងការងារម៉ត់ចត់ ព្រោះវាជាការងារតំណាងឲ្យប្រទេសជាតិ។ ដូច្នេះពួកគេក៏សម្រេចដកខ្លួន ដោយសារគិតថា គ្មានពេលវេលាគ្រប់គ្រាន់ដើម្បីធ្វើការងារមួយនេះ។ ម្យ៉ាងទៀត ពួកគេមិនចង់ចោលសិស្ស និងចោលក្លិបរបស់ពួកគេ មិនមែនពួកគាត់មិនចង់ចូលរួមនោះទេ»៕