អាល្លឺម៉ង់ជំរុញឲ្យអឺរ៉ុបមានសំឡេងតែមួយ ដើម្បីប្រឆាំងច្បាប់សន្តិសុខហុងកុង

COVID-19

សេដ្ឋកិច្ច

អាល្លឺម៉ង់ជំរុញឲ្យអឺរ៉ុបមានសំឡេងតែមួយ ដើម្បីប្រឆាំងច្បាប់សន្តិសុខហុងកុង

01, Jul 2020 , 8:29 am

រូបភាព

រដ្ឋមន្រ្តីការបរទេសអាល្លឺម៉ង់ លោក Heiko Maas។ រូបភាព៖ Anadolu Agency

ដោយ: ធៀន ភារិន្ទ

វាគឺសំខាន់ណាស់ សម្រាប់អឺរ៉ុប ដែលត្រូវរួមគ្នា និងនិយាយក្នុងសម្លេងតែមួយ ដើម្បីប្រឆាំងនឹងការអនុម័តច្បាប់សន្តិសុខជាតិហុងកុងពីសំណាក់ទីក្រុងប៉េកាំង។ ប្រមុខការទូតអាល្លឺម៉ង់ លោក Heiko Maas បានលើកឡើងបែបនេះ នៅថ្ងៃទី២៩ ខែមិថុនា មុនគណៈអចិន្ត្រៃយ៍សភាប្រជាចិន អនុម័តសេចក្តីស្នើច្បាប់សន្តិសុខជាតិហុងកុង។

ថ្លែងនៅក្នុងសន្និសីទនៅស្ថាប័នផ្ដល់យោបល់ European Council of Foreign Relations លោក Heiko Maas រដ្ឋមន្ត្រីការបរទេសអាល្លឺម៉ង់ បានទទូចឲ្យសមាជិកសហភាពអឺរ៉ុបចំនួន ២៧ប្រទេសរួមសាមគ្គីគ្នា និងនិយាយក្នុងសម្លេងតែមួយ ដើម្បីប្រឆាំងនឹងការអនុម័តសេចក្តីស្នើច្បាប់សន្តិសុខជាតិចិន។ ការលើកឡើងរបស់លោករដ្ឋមន្ត្រីបែបនេះ ធ្វើឡើងនៅមុនការអនុម័តច្បាប់សន្តិសុខជាតិហុងកុង។

ទាក់ទិននឹងបញ្ហានេះ ប្រមុខការទូតអាល្លឺម៉ង់រូបនេះ បានទទូចឲ្យអឺរ៉ុប រៀបចំជំនួបរវាងចិន និងសហភាពអឺរ៉ុបឡើងវិញឲ្យកាន់តែឆាប់បំផុត។ ប៉ុន្តែលោករដ្ឋមន្ត្រី មិនបានបញ្ជាក់ឲ្យបានច្បាស់លាស់ឡើយជុំវិញបញ្ហាកែសម្រួលជំនួប ចិន និងអឺរ៉ុប។ កន្លងមកអាល្លឺម៉ង់ បានប្រកាសលើកពេលកិច្ចប្រជុំចិន- អឺរ៉ុប ដែលគ្រោងនឹងធើ្វឡើងនៅខែកញ្ញា ទៅធ្វើនៅពេលផ្សេង ដោយសំអាងលើការរាតត្បាតនៃ COVID-19។

ការលើកឡើងរបស់ប្រមុខការទូតអាល្លឺម៉ង់បែបនេះ ធ្វើឡើងបន្ទាប់ពីប្រធានគោលនយោបាយការបរទេសអឺរ៉ុប បានស្នើឲ្យមានវិធានការម៉ឺងម៉ាត់មួយ ទៅលើការអនុវត្តពាណិជ្ជកម្មជាមួយចិន។ កន្លងមកសហភាពអឺរ៉ុប ធ្លាប់បានព្រមានចិន ឲ្យទម្លាក់សេចក្តីស្នើច្បាប់សន្តិសុខជាតិចិនចោល បើមិនចង់មានផលវិបាកផ្សេងៗ ស្របពេលអឺរ៉ុប ទទូចឲ្យចិនចុះកិច្ចព្រមព្រៀងពាណិជ្ជកម្ម និងវិនិយោគឲ្យបានឆាប់ផងដែរ។

សូមបញ្ជាក់ថា សេចក្តីស្នើច្បាប់សន្តិសុខជាតិហុងកុង ត្រូវបានសភាចិនអនុម័តរួចហើយនាព្រឹកថ្ងៃទី៣០ ខែមិថុនា ដែលនាំឲ្យមានការរិះគន់មកពីគ្រប់ទិសទី ជាពិសេសគឺអាមេរិក និងប្រជាជនហុងកុងតែម្តង។ បើតាមការរំពឹងទុកច្បាប់នេះ ចូលជាធរមាននៅថ្ងៃទី១ ខែកក្កដា នេះ ពោលគឺនៅចំថ្ងៃខួបលើកទី២៣ នៃអង់គ្លេសប្រគល់ទឹកដីហុងកុង មកឲ្យទីក្រុងប៉េកាំង៕