អន្តរជាតិ
លោកស្រីអធិការបតីអាល្លឺម៉ង អែនជែឡា មើគែល និងប្រធានាធិបតីអាមេរិក ដូណាល់ ត្រាំ ក្នុងជំនួបNATO នៅទីក្រុងឡុងដ៏ឆ្នាំ២០១៩។ រូបភាពAFP
×![]()
លោកប្រធានាធិបតីអាមេរិក ដូណាល់ ត្រាំ បានសម្រេចអនុម័តគម្រោងកាត់កងទ័ព៩ពាន់៥រយនាក់ចេញពីអាល្លឺម៉ង់។ នេះបើតាមការប្រកាសរបស់ក្រសួងការពារជាតិអាមេរិកនៅថ្ងៃទី ៣០ ខែមិថុនា។ ការកាត់កងទ័ពនេះបណ្តាលឲ្យមានការព្រួយបារម្ភពីសំណាក់ប្រទេសអាល្លឺម៉ង និងបណ្តាប្រទេសសម្ព័ន្ធមិត្តNATO ឯទៀត នៅពេលដែលការប្រឈមមុខជាមួយរុស្ស៊ីនៅតំបន់ខាងកើតអឺរ៉ុបកាន់តែកើនឡើងនោះ។
គម្រោងដកទ័ពអាមេរិកពីអាល្លឺម៉ង់ ដែលបង្កឲ្យមានការព្រួយបារម្ភសន្តិសុខពីបណ្តាសម្ព័ន្ធមិត្ត NATO និងគោលនយោបាយការបរទេសពីសំណាក់តំណាងរាស្ត្រអាមេរិកទាំងពីរបក្ស បានឆ្លងផុតមួយដំណាក់កាលទៀត។ មន្ទីរបញ្ចកោណ ប្រកាសថា លោក ត្រាំ បានឯកភាពចំនួនទ័ព៩៥០០នាក់ដែលត្រូវដកពីបន្ទាយនៅអាល្លឺម៉ង់។
លោក Jonathan Hoffman អ្នកនាំពាក្យមន្ទីរបញ្ជកោណអាមេរិក បានលើកឡើងថា៖ «ការដកទ័ពនេះ គឺដើម្បីពង្រាយកងទ័ពឡើងវិញ បង្កើនការគំរាមប្រឆាំងរុស្ស៊ី ពង្រឹង NATO និងការធានាចំពោះសម្ព័ន្ធមិត្ត ក៏ដូចជាកែលម្អភាពបត់បែននៃយុទ្ធសាស្ត្រអាមេរិក»។ យោងតាមទីភ្នាក់ងារព័ត៌មាន AFP ការដកទ័ពអាមេរិកលើកនេះ នឹងកាត់បន្ថយចំនួនពី ៣ម៉ឺន៤ពាន់៥រយនាក់ មកត្រឹម២ម៉ឺន៥ពាន់នាក់។
ទោះជាយ៉ាងណាក្តី លោក Hoffman មិនបានប្រាប់ពីគម្រោងលម្អិតថា កងទ័ព នឹងត្រូវដកចេញនៅពេលណា ឫ បង្វែរទៅប្រទេសNATOផ្សេងទៀតឡើយ។ ប៉ុន្តែមន្ត្រីមន្ទីរបញ្ជកោណម្នាក់បានលើកឡើងថា បើសិនជាការដកកងទ័ពកើតឡើងមែន កងទ័ពមួយចំនួននឹងត្រូវដាក់ពង្រាយទៅប្រទេសអឺរ៉ុបខាងកើត។ ដោយក្នុងនោះមានមួយចំនួននឹងត្រូវដាក់ពង្រាយជាអចិន្ត្រៃយ៍ និងមួយចំនួនទៀតក្នុងរយៈពេលខ្លីដើម្បីផ្ញើសារទៅរុស្ស៊ី។
លោក Hoffman ក៏បានបន្ថែមផងដែរថា គម្រោងដកកងទ័ពនេះនឹងត្រូវជូនដំណឹងបទៅកាន់សភា នៅប៉ុន្មានសប្តាហ៍ខាងមុខ ហើយអាមេរិកក៏នឹងពិគ្រោះយោបល់ជាមួយអង្គការ NATO ជាបណ្តើរៗពាក់ព័ន្ធបញ្ហានេះ។
សូមបញ្ជាក់ថា ក្នុងជំនួបជាមួយលោកប្រធានាធិបតីប៉ូឡូញ Andrzej Duda កាលពីថ្ងៃទី២៤ ខែមិថុនា លោកត្រាំបាននិយាយថា កងទ័ពអាមេរិកមួយចំនួននឹងត្រូវបញ្ជូនទៅប៉ូឡូញ។ នៅពេលនិយាយដល់ការដកទ័ព លោកត្រាំបាននិយាយថា៖« មួយចំនួន នឹងមកផ្ទះ ឯមួយចំនួនទៀតនឹងទៅកន្លែងផ្សេង។ ប៉ូឡូញ នឹងក្លាយជាកន្លែងមួយក្នុងចំណោមកន្លែងទាំងនោះ»។ ប្រធានាធិបតីប៉ូឡូញ ក៏បានប្រាប់លោក ត្រាំ វិញដែរថាការ ដកកងទ័ពអាមេរិកចេញពីអឺរ៉ុប នឹងធ្វើឲ្យប៉ះពាល់សន្តិសុខតំបន់នេះ។
គម្រោងដកកងទ័ពពីអាល្លឺម៉ង់របស់លោកត្រាំ ចាប់ផ្តើមលេចចេញជារូបរាងឡើងកាលពីដើមខែមិថុនា ដោយសារតែលោកមិនសប្បាយចិត្តជាមួយនឹងអាល្លឺម៉ង់ទាក់ទងទៅនឹងជំនួញទ្វេភាគី ក៏ដូចជាការចាយវាយតិចរបស់អាល្លឺម៉ង់ក្នុងNATO ។
អាមេរិក មានវត្តមានកងទ័ពនៅអាល្លឺម៉ង់តាំងតែពីចប់សង្គ្រាមលោកលើកទី២។ ក្នុងអំឡុងសង្គ្រាមត្រជាក់ អាមេរិកមានកងទ័ពរបស់ខ្លួនដល់ទៅ២សែននាក់ក្នុងប្រទេសអាល្លឺម៉ង់ ដើម្បីទប់ទល់នឹងគំរាមកំហែងសន្តិសុខពីសហភាពសូវៀត។ ក្រោយសង្គ្រាមត្រជាក់បានផុតរលត់ទៅ អាមេរិកបានកាត់បន្ថយកងទ័ពពីអាល្លឺម៉ង់ ក៏ដូចជាអឺរ៉ុបទាំងមូល ប៉ុន្តែការព្រួយបារម្ភសន្តិសុខពីបណ្តាប្រទេស NATO កើតមានឡើងសារជាថ្មី ក្រោយពេលរុស្ស៊ីផ្តាច់យកទឹកដីកោះគ្រីមៀ របស់អ៊ុយក្រែននៅឆ្នាំ២០១៤៕
Tag:
អាមេរិក
អាល្លឺម៉ង់
NATO
© រក្សាសិទ្ធិដោយ thmeythmey.com
