សង្គមអន្តរជាតិ
អន្តរជាតិ
ទីក្រុងប៉េកាំង វាយបកលើការរិះគន់របស់បរទេសជុំវិញច្បាប់សន្តិសុខជាតិហុងកុង រូបភាព៖ AFP
× ទីក្រុងប៉េកាំង នៅថ្ងៃទី១ ខែកក្កដា បានវាយបកទៅលើការរិះគន់មួយចំនួន ជុំវិញច្បាប់សន្តិសុខជាតិហុងកុង ដែលគណៈអចិន្ត្រៃយ៍សភាប្រជាជនចិន បានអនុម័តនៅថ្ងៃទី៣០ ខែមិថុនា និងចូលជាធរមាននៅម៉ោង១១យប់។ ទាក់ទិននឹងបញ្ហានេះ មន្ត្រីប៉េកាំងបានប្រាប់ប្រទេសទាំងនោះថា កុំឲ្យចេះដឹងរឿងចិន។
ច្បាប់សន្តិសុខជាតិហុងកុង ត្រូវបានអឺរ៉ុប អាមេរិក និងតៃវ៉ាន់ រិះគន់យ៉ាងខ្លាំងថា បានដកហូតសិទ្ធិសេរីភាពប្រជាជនហុងកុង ក៏ដូចជាបំផ្លាញគោលការណ៍ «ប្រទេសមួយ ប្រព័ន្ធពីរជាដើម»។ ព្រោះបញ្ហានេះ បានធ្វើឲ្យប្រទេសមួយចំនួនដូចជាអាមេរិកជាដើម បានរឹតត្បិតលើទិដ្ឋាការសមាជិកបក្សកុម្មុយនីស្តចិនមួយចំនួន ចំណែកតៃវ៉ាន់វិញ បានបង្កើតការិយាល័យមួយ ដើម្បីជួយជាជំនួយដល់ប្រជាជនហុងកុងមួយចំនួន ដែលចង់ចាកចេញពីទីក្រុងហុងកុង។
ទាក់ទិននឹងបញ្ហានេះ លោក Zhang Xiaoming នាយករងនៃការិយាល័យកិច្ចការទីក្រុងម៉ាកាវ និងហុងកុងរបស់រដ្ឋាភិបាលចិន បានប្រតិកម្មខ្លាំងនឹងការរិះគន់របស់បរទេស។ ក្នុងសន្និសីទសារព័ត៌មានថ្ងៃទី១ ខែកក្កដា លោក Zhang បានលើកជាសំណួរថា៖ «តើច្បាប់នេះ បានធ្វើឲ្យប៉ះពាល់ដល់អ្នកឬយ៉ាងណា?» ។ ដោយសំដៅដល់ប្រទេសរិះគន់មួយចំនួន នាយករងនៃការិយាល័យកិច្ចការទីក្រុងម៉ាកាវ និងហុងកុងរូបនេះ បានបន្ថែមទៀតថា៖ « វាមិនមែនជារឿងរបស់អ្នកទេ»។
ជាមួយគ្នានេះ លោកZhang បានបន្តថា ច្បាប់សន្តិសុខជាតិ មិនមែនធ្វើឡើងតែទីក្រុងប៉េកាំងដោយឯកតោភាគីប៉ុណ្ណោះទេ ប៉ុន្តែក៏មានការពិភាក្សាជាមួយអ្នកតំណាងមកពីទីក្រុងហុងកុងផងដែរ។ មន្ត្រីរូបនេះ លើកឡើងថា បើគ្រាន់តែចង់យកហុងកុងមកគ្រប់គ្រងវិញ ប៉េកាំងមិនបាច់ចំណាយពេលសរសេរច្បាប់សន្តិសុខជាតិថ្មីសម្រាប់ហុងកុងតែមួយឡើយ គឺអាចយកច្បាប់មានស្រាប់ដូចជាច្បាប់ព្រហ្មទណ្ឌ នីតិវិធីព្រហ្មទណ្ឌ និងច្បាប់ជាតិផ្សេងទៀត ទៅអនុវត្តជាការស្រេច។
ក្រៅពីការលើកឡើងបែបនេះ លោកZhang ក៏បានរិះគន់លើប្រទេសមួយចំនួន ដែលព្រមានពីការដាក់ទណ្ឌកម្មមកលើមន្ត្រីចិនដែរ ដោយលោកបានចាត់ទុកប្រទេសទាំងនោះដូចជាប្រទេសខូច។ ការលើកឡើងបែបនេះ នាយករងនៃការិយាល័យកិច្ចការទីក្រុងម៉ាកាវ និងហុងកុងទំនងជាចង់សំដៅដល់អាមេរិក ដែលបានរឹតត្បិតទិដ្ឋាការលើសមាជិកបក្សកុម្មុយនិស្តចិន និងបញ្ចប់ការនាំចេញសម្ភារការពារ និងបច្ចេកវិទ្យាដែលអាចប្រើបានទាំងក្នុងសង្គ្រាម ឬកិច្ចការស៊ីវិល ដូចជាដ្រូនមកទីក្រុងហុងកុងជាដើម។
ក្នុងថ្ងៃដដែលនេះ លោកស្រីប្រធានប្រតិបត្តិទីក្រុងហុងកុង ការី ឡាំ បានបញ្ជាក់ថា ការអនុម័តច្បាប់សន្តិសុខជាតិហុងកុង គឺជាការអភិវឌ្ឍយ៉ាងសំខាន់រវាងទំនាក់ទំនងទីក្រុងប៉េកាំង និងហុងកុង ចាប់តាំងពីអង់គ្លេសប្រគល់ឲ្យ។ បើតាមលោកស្រីប្រធានប្រតិបត្តិ ច្បាប់សន្តិសុខជាតិហុងកុង គឺសំខាន់ណាស់ ដើម្បីស្តារស្ថិរភាពនៅក្នុងទីក្រុង។ យ៉ាងណាក៏ដោយ លោកស្រីបន្តថា ច្បាប់សន្តិសុខនេះ នឹងផ្តោតតែទៅលើមនុស្សតែមួយក្រុមតូចប៉ុណ្ណោះ ដែលគំរាមកំហែងដល់សន្តិសុខជាតិហុងកុង៕
© រក្សាសិទ្ធិដោយ thmeythmey.com