អន្តរជាតិ
មីយ៉ាន់ម៉ា រៀបចំការបោះឆ្នោតនៅខែវិច្ឆិកា ខណៈបក្សរបស់លោកស្រី ស៊ូជី រំពឹងបន្តឈ្នះឆ្នោត
ពលរដ្ឋមីយ៉ាន់ម៉ាទម្លាក់សន្លឹកឆ្នោតក្នុងការបោះឆ្នោតកន្លងមក។ រូបភាព AFP
×![]()
ដោយ: តន ចាន់រិទ្ធារ៉ា
មីយ៉ាន់ម៉ា នឹងរៀបចំការបោះឆ្នោតទូទៅនៅខែវិច្ឆិកាខាងមុខ ស្របពេលដែលស្ថានភាពជំងឺ COVID-19 ក្នុងប្រទេសអាស៊ីអាគ្នេយ៍មួយនេះ ត្រូវមើលឃើញថា ស្ថិតក្រោមការគ្រប់គ្រង។ បក្សសម្ព័ន្ធជាតិដើម្បីប្រជាធិបតេយ្យ (NLD) របស់ទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី រំពឹងឈ្នះឆ្នោតដើម្បីបន្តដឹកនាំប្រទេស។ ប៉ុន្តែវិបត្តិរ៉ូហ៊ីងយ៉ា ដែលបំបាក់មុខលោកស្រី ស៊ូជី លើឆាកអន្តរជាតិ ទំនងធ្វើឲ្យការគាំទ្រអាចធ្លាក់ចុះធៀបការបោះឆ្នោតឆ្នាំ២០១៥ ។
គណៈកម្មការរៀបការបោះឆ្នោតសហភាពមីយ៉ាន់ម៉ា នៅថ្ងៃទី១ ខែកក្កដា បានកំណត់កាលបរិច្ឆេទបោះឆ្នោតជ្រើសរើសសមាជិកសភាថ្នាក់ជាតិ និងថ្នាក់តំបន់នៅថ្ងៃទី៨ ខែវិច្ឆិកាខាងមុខ។ ការបោះឆ្នោតនេះ ក៏កំណត់មេដឹកនាំប្រទេសថ្មីផងដែរ។
ក្នុងការបោះឆ្នោតលើកនេះ គណៈកម្មការរៀបចំការបោះឆ្នោតមីយ៉ាន់ម៉ាប្រកាសថា កៅអីសមាជិកសភាជាន់ខ្ពស់ចំនួន១៦៨ នឹងត្រូវដាក់ឲ្យប្រជែង ខណៈកៅអីសម្រាប់ប្រជែងនៅសភាជាន់ទាបមានចំនួន៣៣០ ។ បើបូកទាំងកៅអីសភានៅនៅតាមរដ្ឋ និងតំបន់នានា កៅអីសរុបដែលដាក់ឲ្យប្រជែងមានចំនួន១១៧១ ។ នេះបើតាមការផ្សាយរបស់កាសែតមីយ៉ាន់ម៉ា Myanmar Times ។
ការបោះឆ្នោតនេះ ត្រូវបានមើលឃើញថា ជាការធ្វើតេស្តការដឹកនាំរបស់គណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រី អ៊ុងសាន ស៊ូជី ទីប្រឹក្សារដ្ឋមីយ៉ាន់ម៉ា។ ប្រជាប្រិយភាពលោកស្រី ស៊ូជី ដែលត្រូវបានចាត់ទុកជាពន្លឺក្ដីសង្ឃឹមរបស់ពលរដ្ឋមីយ៉ាន់ម៉ា នៅតែមានកម្រិតខ្ពស់ដដែល បើទោះជារដ្ឋាភិបាលក្រុងណៃពិដោរងការរិះគន់ខ្លាំងលើសំណុំរឿងជនភៀសខ្លួនរ៉ូហ៊ីងយ៉ាដែលរងការធ្វើទុក្ខបុកម្នេញពីសំណាក់យោធាក្ដី។
លោកស្រី ស៊ូជី បានចេញមុខដោយផ្ទាល់ការពារមុខមាត់របស់មីយ៉ាន់ម៉ានៅឯតុលាការអន្តរជាតិឡាអេ ក្រោយរងបណ្ដឹងរបស់ប្រទេសអាហ្វ្រិកហ្កំប៊ីដែលតំណាងឲ្យប្រទេសមូស្លីមពាក់ព័ន្ធអំពើអមនុស្សធម៌នៅរដ្ឋ Rakhine ។ កាលនោះ ប្រជាជនមីយ៉ានម៉ាភាគច្រើន បានគាំទ្ររដ្ឋាភិបាលក្នុងការតទល់នឹងក្ដីក្ដាំនេះ។
គណបក្សកាន់អំណាច រំពឹងរក្សាសំឡេងភាគច្រើនក្នុងសភាទាំងពីរដដែល ប៉ុន្តែគេក៏មើលឃើញថា សំឡេងភាគច្រើននេះ អាចធ្លាក់ចុះផងដែរដោយសារបញ្ហាសេដ្ឋកិច្ច និងទំនាក់ទំនងជាមួយក្រុមភាគតិចក្នុងប្រទេស។ គូប្រជែងសំខាន់របស់ NLD គឺបក្សសហភាពរួបរួម និងអភិវឌ្ឍដែលគាំទ្រដោយយោធា។ ការថយចុះកៅអី នឹងធ្វើឲ្យការកែរដ្ឋធម្មនុញ្ញមីយ៉ាន់ម៉ាដែលតាក់តែងដោយយោធា កាន់តែពិបាកថែមទៀត ខណៈរដ្ឋធម្មនុញ្ញនេះផ្ដល់ឲ្យយោធានូវកៅអីសភា២៥ភាគរយដោយស្វ័យប្រវត្តិទៅហើយ៕
Tag:
មីយ៉ាន់ម៉ា
អ៊ុងសាន ស៊ូជី
© រក្សាសិទ្ធិដោយ thmeythmey.com
