កីឡាករខ្មែរ-អាមេរិក Eric Piroun Pen ត្រូវបានសហព័ន្ធកីឡាប្រដាល់សកលកម្ពុជាជ្រើសរើសឲ្យធ្វើជាកីឡាករជម្រើសជាតិប្រចាំឆ្នាំ២០២០។ Eric ដែលកំពុងហ្វឹកហាត់នៅប្រទេសវៀតណាមបានបង្ហាញអារម្មណ៍រំភើបសប្បាយរីករាយយ៉ាងខ្លាំង ដែលបានក្លាយជាចំណែកមួយក្នុងសហព័ន្ធកីឡាបាល់គុនខ្មែរ។ ជាមួយគ្នានេះ រូបគេប្តេជ្ញានឹងខិតខំប្រឺងប្រែងហ្វឹកហាត់ ដើម្បីត្រៀមប្រជែងក្នុងព្រឹត្តិការណ៍កីឡាស៊ីហ្គេមឆ្នាំ២០២៣។
ម្ចាស់ខ្សែក្រវាត់ WBA Asia Heavyweight Championship កីឡាករ Eric Pieroun Pen នឹងប្រកួតតំណាងឲ្យកម្ពុជាក្នុងការប្រកួតអន្តរជាតិនានា ចាប់ពីខែកក្កដា ឆ្នាំ២០២០ តទៅ។ ការក្លាយជាចំណែកមួយរបស់កម្ពុជានេះ គឺបន្ទាប់ពីកីឡាករខ្មែរ-អាមេរិករូបនេះ ត្រូវបានសហព័ន្ធកីឡាប្រដាល់សកលកម្ពុជាជ្រើសរើសឲ្យធ្វើជាកីឡាករជម្រើសជាតិប្រចាំឆ្នាំ២០២០។
ទោះបីកីឡាករមានឪពុកម្តាយមានដើមកំណើតនៅខេត្តកំពតរូបនេះ មានឈ្មោះប្រមូលផ្តុំហ្វឹកហាត់ក្នុងក្រុមជម្រើសជាតិ តែរូបគេមិនមកហ្វឹកហាត់នៅកម្ពុជានោះទេ ពោលគឺរូបគេនឹងបន្តហ្វឹកហាត់នៅប្រទេសវៀតណាម។ កីឡាកររូបនេះនឹងមកកម្ពុជានៅពេលកម្ពុជាមានការរៀបចំការប្រកួត ឬត្រូវការរូបគេដើម្បីចេញទៅប្រកួតក្នុងព្រឹត្តិការណ៍អន្តរជាតិនានា។ នេះបើតាមការសរសេររៀបរាប់របស់លោក ប៊ុយ សោភ័ណ្ឌ អគ្គលេខាធិការនៃសហព័ន្ធកីឡាប្រដាល់សកលកម្ពុជា។
កីឡាករ Eric Pen បានបង្ហាញអារម្មណ៍រំភើបសប្បាយរីករាយយ៉ាងក្រៃលែង ដែលបានក្លាយជាកីឡាករជម្រើសជាតិរបស់កម្ពុជា។ សម្រាប់ Eric នេះជាឱកាសរបស់ខ្លួន ដើម្បីផ្សព្វផ្សាយពីកម្ពុជា ដែលជាប្រទេសកំណើតរបស់ឪពុកម្តាយគេឲ្យពិភពលោកស្គាល់កាន់តែច្បាស់។
តាមរយៈវីដេអូឃ្លីបដែលសហព័ន្ធបានផ្តល់ឲ្យអ្នកសារព័ត៌មានកីឡាករ Eric Pen បានបង្ហាញអារម្មណ៍យ៉ាងដូច្នេះថា៖«ខ្ញុំពិតជាមានមោទកភាព និងកិត្តិយសយ៉ាងក្រៃលែង ដែលបានក្លាយជាកីឡាករជម្រើសជាតិកម្ពុជា។ ខ្ញុំពិតជាចង់បង្ហាញពីដើមកំណើតខ្ញុំ និងឪពុកម្តាយរបស់ខ្ញុំ ក៏ដូចជាបង្ហាញដល់សាធារណៈជនពីកម្ពុជា»។
ជាមួយការប្តេជ្ញាខិតខំប្រឹងប្រែងហ្វឹកហាត់ អ្នកប្រដាល់ទម្ងន់ធ្ងន់រូបនេះរំពឹងថា រូបគេនឹងមានសមត្ថភាពគ្រប់គ្រាន់ក្នុងការប្រកួតប្រជែងក្នុងព្រឹត្តិការណ៍កីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ ជាមួយគ្នានេះ រូបគេអរគុណដល់ប្រជាជនកម្ពុជាដែលបានគាំទ្ររូបគេកន្លងមក។
រូបគេបានប្តេជ្ញាថា៖«ខ្ញុំនឹងបន្តប្រឹងប្រែងហ្វឹកហាត់ និងចូលរួមប្រកួតបន្ថែមទៀត រហូតដល់ពេលវេលាមកដល់ ខ្ញុំនឹងអាចរៀបចំខ្លួនបានល្អសម្រាប់ការប្រកួតកីឡាស៊ីហ្គេម ហើយយើងនឹងឈានទៅសម្រេចគោលដៅ។ ខ្ញុំចង់ប្រាប់ទៅអ្នកទាំងអស់គ្នានៅក្នុងប្រទេសកម្ពុជាថា ខ្ញុំអរគុណយ៉ាងក្រៃលែងសម្រាប់ការគាំទ្ររូបខ្ញុំ ។ ខ្ញុំស្រឡាញ់អ្នកទាំងអស់គ្នា និងជួបគ្នានាពេលឆាប់ៗនេះ»។
កីឡាករខ្មែរ-អាមេរិករូបនេះ បានចូលប្រឡូកធ្វើកីឡាករប្រដាល់សកលស្ម័គ្រចិត្តនៅឆ្នាំ២០១៤ ហើយរូបគេបានវិវត្តខ្លួនទៅជាកីឡាករអាជីពនៅឆ្នាំ២០១៨។ នៅឆ្នាំ២០១៩ រូបគេដណ្តើមបានខ្សែក្រវាត់ WBA Asia Heavyweight Championship៕