អន្តរជាតិ
លោក ចនសុន ថា ច្បាប់សន្តិសុខជាតិហុងកុង គឺជាការបំពានសន្ធិសញ្ញាអង់គ្លេស-ចិនឆ្នាំ១៩៨៤ នាយករដ្ឋមន្រ្តីអង់គ្លេស លោក បូរីស ចនសុន។ រូបភាព៖ Reuters
× ការអនុម័តច្បាប់សន្តិសុខជាតិហុងកុងពីសំណាក់ទីក្រុងប៉េកាំង គឺជាការបំពានយ៉ាងច្បាស់ និងធ្ងន់ធ្ងរទៅលើសេចក្តីប្រកាសរួមគ្នារវាងអង់គ្លេស-ចិន ឆ្នាំ១៩៨៤។ លោកនាយករដ្ឋមន្ត្រីអង់គ្លេស បូរីស ចនសុន បានលើកឡើងបែបនេះ នៅថ្ងៃទី១ ខែកក្កដា ដោយបន្ថែមថា អង់គ្លេសនៅតែរក្សាការសន្យារបស់ខ្លួន ក្នុងការផ្តល់លិខិតឆ្លងដែនឲ្យប្រជាជនហុងកុងមានសិទ្ធិមកតាំងលំនៅក្នុងប្រទេសនៅតំបន់អឺរ៉ុបមួយនេះ។
ច្បាប់សន្តិសុខជាតិ បានបង្កឲ្យមានបញ្ហាចម្រូងចម្រាស់យ៉ាងខ្លាំង ទាំងនៅហុងកុង និងបរទេស។ ប្រជាជនហុងកុងជាច្រើនពាន់នាក់ បានចេញមកបាតុកម្ម និងប្រារព្ធខួបទី២៣ ដែលអង់គ្លេសប្រគល់ទឹកដីហុងកុង ត្រលប់មកវិញ។ មនុស្សប្រមាណ ៣៧០នាក់ ត្រូវប៉ូលិសចាប់ខ្លួន ហើយក្នុងចំណោមនោះ មានមនុស្ស ១០នាក់ ត្រូវគេចោទពីបទបំពានច្បាប់សន្តិសុខជាតិ។ ចំណែកនៅបរទេសវិញ អឺរ៉ុប អាមេរិក បានរិះគន់ច្បាប់សន្តិសុខជាតិថ្មីនេះថា គឺបំផ្លាញសិទ្ធិសេរីភាព និងគោលការណ៍ «ប្រទេសមួយ ប្រព័ន្ធពីរ»។
ចំណែកអង់គ្លេស ដែលជាអតីតម្ចាស់អាណានិគមហុងកុង ក៏បានចេញមុខមករិះគន់ដែរ ជុំវិញបញ្ហាច្បាប់សន្តិសុខជាតិថ្មីនេះ។ ថ្លែងនៅក្នុងសភាអង់គ្លេស លោកនាយករដ្ឋមន្ត្រីអង់់គ្លេស លោក បូរីស ចនសុន បានលើកឡើងយ៉ាងដូច្នេះថា៖ «ការអនុម័ត និងដាក់ឲ្យអនុវត្តនូវច្បាប់សន្តិសុខជាតិហុងកុង គឺជាបំពានយ៉ាងច្បាស់ និងធ្ងន់ធ្ងរទៅលើសេចក្តីប្រកាសរួមចិន និងអង់គ្លេស ឆ្នាំ១៩៨៤»។
សេចក្តីប្រកាសរួមរវាងចិន និងអង់គ្លេសឆ្នាំ ១៩៨៤ គឺជាសន្ធិសញ្ញាមួយ ដែលបើកផ្លូវឲ្យអង់គ្លេសប្រគល់ទឹកដីហុងកុងមកឲ្យចិនវិញនៅក្នុងឆ្នាំ១៩៩៧។ ក្នុងសន្ធិសញ្ញា ចំណុចមួយបានចែងថា ក្នុងរយៈពេល៥០ បន្ទាប់ពីអង់គ្លេសប្រគល់ហុងកុងឲ្យមកចិន គោលនយោបាយមូលដ្ឋានរបស់ចិន ដែលទាក់ទិននឹងហុងកុង នឹងមិនត្រូវមានការផ្លាស់ប្តូរអ្វីឡើយ ក្នុងនោះក៏រួមបញ្ចូលទាំងស្វ័យភាពកម្រិតខ្ពស់របស់ហុងកុងផងដែរ។ ចំណុចនេះ មានចែងនៅក្នុងច្បាប់មូលដ្ឋានរបស់ហុងកុង។
សេចក្តីប្រកាសរួមចិន-អង់គ្លេសឆ្នាំ ១៩៨៤នេះ ត្រូវបានចុះហត្ថលេខាដោយ នាយករដ្ឋមន្ត្រីចិន Zhao Ziyang និងសមភាគីអង់គ្លេស លោកស្រី Margaret Thatcher។ កិច្ចចរចាលើសេចក្តីប្រកាសរួមនេះ ត្រូវចំណាយពេលចរចារហូតដល់ ២ឆ្នាំឯណោះ ពោលគឺចាប់តាំងពីនាយករដ្ឋមន្ត្រីអង់គ្លេស លោកស្រី Margaret Thatcher ធ្វើដំណើរទស្សនកិច្ចទៅចិននៅក្នុងឆ្នាំ ១៩៨២៕
លោកនាយករដ្ឋមន្ត្រីក៏បានបញ្ជាក់ពីការផ្តល់លិខិតឆ្លងដែនសម្រាប់ជនជាតិចក្រភពអង់គ្លេសនៅបរទេស(British National Overseas) ផងដែរ។ លិខិតឆ្លងដែននេះ គឺអនុញ្ញាតឲ្យប្រជាពលរដ្ឋហុងកុង តាំងលំនៅអង់គ្លេស និងអាចទទួលសិទ្ធិជាពលរដ្ឋអង់គ្លេស។ បើតាមការបញ្ជាក់របស់នាយករដ្ឋមន្ត្រី មនុស្សប្រមាណ ៣លាននាក់ អាចទទួលសិទ្ធិកាន់លិខិតឆ្លងដែននេះ ខណៈមនុស្សប្រមាណ ៣៤ម៉ឺននាក់ មានលិខិតឆ្លងដែននេះរួចហើយ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ជាការឆ្លើយតបទៅនឹងប្រមុខរដ្ឋាភិបាលអង់គ្លេស លោក Zhao Lijian អ្នកនាំពាក្យក្រសួងការបរទេសចិន បានទទូចឲ្យប្រទេសដទៃ ឈប់យកបញ្ហាហុងកុង មកជ្រៀតជ្រែកកិច្ចការផ្ទៃក្នុងរបស់ចិន។ ទន្ទឹមនេះ អ្នកនាំពាក្យក្រសួងការបរទេស ក៏បានអះអាងថា ចិននៅតែបន្តអនុវត្តគោលការណ៍ «ប្រទេសមួយ ប្រព័ន្ធពីរ» យ៉ាងរឹងមាំ ហើយចិន ជំទាស់ជាដាច់ខាត រាល់ការជ្រៀតជ្រែកកិច្ចការផ្ទៃក្នុងរបស់ខ្លួន។
Tag:
អង់គ្លេស
ចិន
ហុងកុង
© រក្សាសិទ្ធិដោយ thmeythmey.com