សង្គមអន្តរជាតិ
អន្តរជាតិ
×![]()
ដោយ: ធៀន ភារិន្ទ
ចិន និងឥណ្ឌាបានយល់ព្រម ដកកងទ័ពរៀងៗខ្លួនចេញពីតំបន់ព្រំដែនជម្លោះ ដើម្បីបន្ធូរបន្ថយភាពតានតឹង។ ការព្រមព្រៀងដកកងទ័ពនេះ ធ្វើឡើងបន្ទាប់ពីទីក្រុងញូវដែលី និងទីក្រុងប៉េកាំងមានជំនួបចរចាមួយជាមួយគ្នា។ នេះបើតាមការចុះផ្សាយរបស់កាសែតរដ្ឋចិន People’s Daily នៅថ្ងៃទី២ ខែកក្កដា។ 
ស្ថានការណ៍នៅតាមតំបន់ព្រំដែនរវាងចិន-ឥណ្ឌា ហាក់ដូចជាក្តៅដោយសារភាគីជម្លោះទាំងពីរបន្ថែមទ័ព និងមានសមយុទ្ធនៅក្បែរតំបន់ព្រំដែនជម្លោះ។ បើទោះបីជាមានបញ្ហាចម្រូងចម្រាសដាក់គ្នាក៏ពិតមែន ប៉ុន្តែយក្សនុយក្លេអ៊ែរទាំងពីរ បានបញ្ជូនអ្នកចរចារៀងៗជាបន្តបន្ទាប់ ដើម្បីជួបតទល់គ្នា បន្ធូរបន្ថយភាពតានតឹង ដែលកើតមានតាំងពីថ្ងៃទី១៥ ខែមិថុនាកន្លងមក។
តាមការចុះផ្សាយរបស់សារព័ត៌មាន People’s Daily ទីក្រុងប៉េកាំង និងទីក្រុងញូវដែលី បានយល់ព្រមចាត់វិធានការមួយចំនួន ដើម្បីបន្ធូរបន្ថយភាពតានតឹងដាក់គ្នានៅតាមតំបន់ព្រំដែនជម្លោះ។ កងទ័ពជាច្រើន នៃភាគីទាំងសងខាង នឹងដកចេញពីតំបន់ជម្លោះ។ តាមការចុះផ្សាយនេះដដែល កងទ័ពនៅតាមកងពលផ្សេងៗគ្នា នឹងដកចេញពីតំបន់ព្រំដែនជម្លោះមួយចំនួន។ ការប្រឈមមុខដាក់គ្នារវាងកងទ័ពចិន និងឥណ្ឌា គឺមាននៅតាមទីតាំងជាច្រើនតាមបណ្តោយព្រំដែនចិន និងឥណ្ឌា។
ការកាត់បន្ថយកម្លាំងទ័ពនេះ ធ្វើឡើងបន្ទាប់ពីជំនួបរវាងមេបញ្ជាការចិន និងឥណ្ឌា នៅភូមិ Chushul តំបន់ Ladakh ប្រទេសឥណ្ឌា នាថ្ងៃទី៣០ ខែមិថុនា។ ក្នុងជំនួបចរចានេះ ក្រសួងការបរទេសចិន បានអះអាងថា គឺជាដំណើរការវិជ្ជមានមួយ ក្នុងការកាត់បន្ថយភាពតានតឹង និងមានទំនាក់ទំនងជាមួយគ្នាកាន់តែជិតស្និទ្ធ។
ចិន និងឥណ្ឌា គឺមានព្រំដែនជាមួយគ្នារហូតដល់ប្រមាណ ៣៤០០គីឡូម៉ែត្រឯណោះ ប៉ុន្តែភាគីទាំងពីរមិនទាន់មានព្រំដែនផ្លូវការជាមួយគ្នានៅឡើយទេ ពោលគឺមានត្រឹមតែខ្សែបន្ទាត់ព្រំដែនគ្រប់គ្រងជាក់ស្តែង (LAC) ប៉ុណ្ណោះ។
សូមបញ្ជាក់ ការប៉ះទង្គិចគ្នានៅថ្ងៃទី១៥ ខែមិថុនា បានបណ្តាលឲ្យកងទ័ពឥណ្ឌាចំនួន ២០នាក់បាត់បង់ជីវិត និងរបួសជាច្រើននាក់ ខណៈចិន មានស្លាប់នឹងរបួសដូចគ្នា ប៉ុន្តែមិនបញ្ចេញរបាយការណ៍។ ការប៉ះទង្គិចនេះ បានបង្កឲ្យប្រជាជនឥណ្ឌាជាច្រើននាក់ តវ៉ា និងមិនប្រើប្រាស់ផលិតផលចិន ហើយឈានទៅដល់រដ្ឋាភិបាលឥណ្ឌាបិទកម្មវិធីចិន លើទូរសព្ទជាច្រើនថែមទៀត ដោយសារបញ្ហាសន្តិសុខជាតិ៕
Tag:
ចិន
ឥណ្ឌា
© រក្សាសិទ្ធិដោយ thmeythmey.com
