ជាតិ
សង្គមជាតិ
សម្ដេច ហ៊ុន សែន បញ្ជាឱ្យស្ថាប័នពាក់ព័ន្ធ កាត់តំបន់ពលរដ្ឋរស់នៅចេញពីផែនទីគម្របព្រៃឈើ
× ភ្នំពេញ៖ ពីកិច្ចប្រជុំគណៈរដ្ឋមន្ត្រី នាព្រឹកថ្ងៃទី៣ កក្កដានេះ សម្ដេចនាយករដ្ឋមន្ត្រី ហ៊ុន សែន បានបញ្ជាឱ្យគ្រប់ស្ថាប័នពាក់ព័ន្ធទាំងអស់ កាត់ដីនៅតំបន់ដែលមានពលរដ្ឋរស់នៅ ឱ្យចេញផុតពីផែនទីគម្របព្រៃឈើ ដើម្បីកុំឱ្យប៉ះពាល់ដល់ការរស់នៅរបស់ពួកគេ។
បើតាមសម្ដេច ហ៊ុន សែន ការទុកដីឱ្យពលរដ្ឋរស់នៅ ប្រសើជាងការកាត់លក់ទៅឱ្យក្រុមហ៊ុនឯកជន។ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានស្រង់ប្រសាសន៍សម្ដេច ហ៊ុន សែន នៅក្នុងកិច្ចប្រជុំគណៈរដ្ឋមន្ត្រី មកសរសេរលើហ្វេសប៊ុកដូច្នេះថា៖« ត្រូវទុកឱ្យប្រជាជនរស់នៅផង ... កុំតែកាត់ដីទៅលក់ឱ្យឯកជន»។
សម្ដេច ហ៊ុន សែន បានបញ្ជាឱ្យក្រសួងចំនួន៣ កាត់ឆ្វៀលដីជូនប្រជាពលរដ្ឋដែលបានមករស់នៅលើទីតាំងដីដែលជាគម្របព្រៃឈើ ឬជាតំបន់ការពារ និងតំបន់អភិរក្សសត្វព្រៃរបស់រដ្ឋ ដូចជានៅកោះកុង ព្រះវិហារជាដើម។ រដ្ឋមន្រ្តីក្រសួងទាំង៣ ដែលត្រូវទទួលភារកិច្ចនេះ រួមមានលោក សាយ សំអាល់ រដ្ឋមន្រ្តីក្រសួងបរិស្ថាន, លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងលោក ជា សុផារ៉ា ក្រសួងរៀបចំដែនដី នគរូបនីយកម្ម និងសំណង់។
«ព្រោះកន្លងមក រដ្ឋមានតែដីក្នុងផែនទីទេ តាមពិតមានប្រជាពលរដ្ឋបានកសាងលំនៅដ្ឋានរស់នៅបង្កើតកូនចៅរាប់សិបឆ្នាំមកហើយនៅលើទីតាំងដីទាំងនោះ។ នេះជាការដោះស្រាយកង្វល់ជូនពលរដ្ឋពិតប្រាកដ។ កុំទុកប្រជាពលរដ្ឋឱ្យភ័យខ្លាច អត់ឃ្លាន រត់ទៅចំណាកស្រុកគេតទៅទៀត។ ទន្ទឹមនឹងនេះ សូមកុំឱ្យពលរដ្ឋពង្រីកថែមទៀត ព្រោះត្រូវការរក្សាទុកព្រៃសហគមខ្លះនៅជិតៗដើម្បីជាប្រយោជន៍សហគមរស់នៅផងដែរ»។ នេះជាការបញ្ជាក់របស់ប្រមុខរដ្ឋាភិបាល ដែលបានបន្ថែមថា ក្រសួងទាំង៣ ត្រូវដោះស្រាយឱ្យដាច់ស្រេចក្នុងតែប៉ុន្មានខែខាងមុខ ដើម្បីចេញប្លង់កម្មសិទ្ធិជូនពលរដ្ឋ ដោយឈរលើភាពហ្មត់ចត់និងត្រឹមត្រូវ។
គណៈរដ្ឋមន្ត្រី កំពុងតែពិភាក្សាលើ «សេចក្តីព្រាងច្បាប់ស្ដីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បតិ្តរដ្ឋ» នៅព្រឹកនេះ។សេចក្ដីព្រាងច្បាប់ស្ដីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋនេះ ត្រូវបានរៀបចំតាក់តែងឡើង ក្នុងគោលដៅពង្រឹងក្របខណ្ឌច្បាប់ រចនាសម្ព័ន្ធស្ថាប័ន និងលើកម្ពស់សមត្ថភាពស្ថាប័នក្នុងការគ្រប់គ្រងទ្រព្យសម្បតិ្តរដ្ឋជាអាទិ៍ ដូចជា៖ ការកំណត់អំពីប្រភព ប្រភេទទ្រព្យសម្បតិ្តរដ្ឋរបបគតិយុត្តគ្រប់គ្រងនិងចាត់ចែងទ្រព្យសម្បតិ្តរដ្ឋច្បាប់ជាក់លាក់, ការរៀបចំបញ្ជីសារពើភណ្ឌសម្បត្តិរដ្ឋ, ការផ្ទេរសិទ្ធិកាន់កាប់, ការអភិវឌ្ឍ, ការប្រើប្រាស់ទ្រព្យសម្បត្តិរដ្ឋ, ការធ្វើអធិការកិច្ច និងសវនកម្ម និងការកំណត់អំពីការលើកទឹកចិត្ត និងការដាក់ទណ្ឌកម្មចំពោះអំពីល្មើសច្បាប់ ជាដើម។ល។
មិនតែប៉ុណ្ណោះសេចក្តីព្រាងច្បាប់នេះ ក៏ពង្រឹងអភិបាលកិច្ចល្អក្នុងការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋប្រកបដោយប្រសិទ្ធភាព និងចីរភាព ទន្ទឹមនឹងការបង្កើនចំណូលពីទ្រព្យសម្បត្តិរដ្ឋឱ្យកាន់តែមានភាពច្បាស់លាស់ សំដៅធានាដល់ការគ្រប់គ្រងធនធានសាធារណៈ ការបង្កើនចំណូលជាប្រយោជន៍ដល់ថវិកាជាតិ និងកំណើនសេដ្ឋកិច្ចជាតិ សម្រាប់គាំទ្រដល់ការបន្តអភិវឌ្ឍសេដ្ឋកិច្ច សង្គមកម្ពុជា ឱ្យកាន់តែមានការរីកចម្រើនឈានឡើង ប្រកបដោយវិបុលភាព និងចីរភាពក្នុងបរិការណ៍ថ្មី សម្រាប់រយៈពេលមធ្យម និងវែង។
ក្នុងកិច្ចប្រជុំនេះ សម្ដេច ហ៊ុន សែន ក៏ប្រកាសឱ្យអនុវត្តវិធានការដោះស្រាយ និងទប់ស្កាត់បញ្ហាជម្លោះដីធ្លី កុំឱ្យមានកើតឡើងទៀត។ «រឿងដីធ្លីត្រូវតែជម្រះគ្នាម្តង។ ពេលនេះ ជាពេលដែលត្រូវធ្វើការវះកាត់ហើយ» ។ នេះជាការបញ្ជាក់របស់សម្ដេច ហ៊ុន សែន ដែលបានលើកយកបញ្ហាដីធ្លី នៅក្នុងស្រុកគាស់ក្រឡ ខេត្តបាត់ដំបង មកអធិប្បាយនៅក្នុងកិច្ចប្រជុំគណៈរដ្ឋមន្ត្រីនេះ៕
Tag:
ហ៊ុន សែន
ដីធ្លី
ព្រៃឈើ
© រក្សាសិទ្ធិដោយ thmeythmey.com