សង្គមអន្តរជាតិ
អន្តរជាតិ
យន្តហោះចម្បាំង MiG-29 របស់កងទ័ពអាកាសឥណ្ឌា។ រូបភាព AFP
×![]()
ដោយ: តន ចាន់រិទ្ធារ៉ា
រដ្ឋាភិបាលឥណ្ឌា នៅថ្ងៃទី២ ខែកក្កដា បានឯកភាពលើការទិញយន្តហោះចម្បាំងពីរុស្ស៊ីចំនួន៣៣គ្រឿង និងការដំឡើងសមត្ថភាព (Upgrade) យន្តហោះមានស្រាប់ចំនួន៥៩គ្រឿងទៀត។ ការទិញអាវុធនេះ ត្រូវបានមើលឃើញ ជាការប្រឹងប្រែងរបស់ទីក្រុងញូវដែលីដើម្បីពង្រឹងសមត្ថភាពកងទ័ពអាកាសរបស់ខ្លួន ស្របពេលដែលស្ថានភាពនៅតាមព្រំដែនជាមួយចិនបានឡើងកម្ដៅ។ 
ឥណ្ឌានឹងទិញយន្តហោះប្រយុទ្ធធុន MiG-29 ចំនួន២១គ្រឿង និងយន្តហោះចម្បាំងស៊េរីទំនើប Su-30 ចំនួន១២គ្រឿងទៀត ដែលមានតម្លៃសរុប២,៤៣ពាន់លានដុល្លារ។ នេះបើតាមប្រកាសរបស់ក្រសួងការពារជាតិឥណ្ឌានៅថ្ងៃទី២ ខែកក្កដា។ អមនឹងការទិញយន្តហោះចម្បាំងថ្មី រដ្ឋាភិបាលឥណ្ឌាក៏យល់ព្រមលើការកែប្រែយន្តហោះមានស្រាប់ MiG-29 ចំនួន៥៩គ្រឿងទៀតផងដែរ។
ក្រសួងការពារជាតិឥណ្ឌាបញ្ជាក់ថា ការទិញ និងការដំឡើងសមត្ថភាពយន្តហោះនេះ គឺជាបំពេញតម្រូវការរបស់កងទ័ពអាកាសឥណ្ឌាក្នុងការបង្កើនចំនួនយន្តហោះរបស់ខ្លួន។ កិច្ចព្រមព្រៀងទិញលក់នេះ ត្រូវបានចប់រួចរាល់អំឡុងពេលទស្សនកិច្ចរបស់រដ្ឋមន្ត្រីការពារជាតិឥណ្ឌា Rajnath Singh នៅរុស្ស៊ី។ មន្ត្រីឥណ្ឌានិយាយថា លោក Singh បានទទូចឲ្យរុស្ស៊ីប្រញាប់បញ្ជូនយន្តហោះចម្បាំងដែលបានទិញហើយ។
ក្រៅពីការបង្កើនសមត្ថភាពប្រយុទ្ធលើអាកាស ក្រសួងការពារជាតិឥណ្ឌាក៏មានគម្រោងពង្រឹងមីស៊ីលផងដែរដែលនឹងត្រូវប្រើប្រាស់ក្នុងជួរកងទ័ពអាកាស និងកងទ័ពជើងទឹក។ បើតាមការប្រកាសដដែល ឥណ្ឌានឹងទិញប្រព័ន្ធមីស៊ីលប្រយុទ្ធចម្ងាយឆ្ងាយ ក៏ដូចជាប្រព័ន្ធមីស៊ីល Pinaka ផងដែរ។ សព្វាវុធទាំងនេះ សុទ្ធតែជាផលិតផលត្រូវបានអភិវឌ្ឍក្នុងស្រុកផ្ទាល់។
គម្រោងទិញ និងអភិវឌ្ឍយុទ្ធោបករណ៍របស់ឥណ្ឌា កើតឡើងក្រោយការប៉ះទង្គិចមួយប្រាវនៅតាមព្រំដែនជាមួយចិន។ ទោះជាហេតុការណ៍ថ្ងៃទី១៥ ខែមិថុនា មិនមានប្រើអាវុធក្ដី លទ្ធភាពដែលជម្លោះតូចតាចបែបនេះប្រែទៅជាជម្លោះប្រដាប់អាវុធទ្រង់ទ្រាយធំ នៅតែមានដដែល។ ម្យ៉ាងនៅពេលដែលចិនប្រឹងបង្កើនសមត្ថភាពកងទ័ពរបស់ខ្លួននោះ ឥណ្ឌារឹតតែមិនអាចអង្គុយអោបដៃមើលគូប្រជែងរបស់ខ្លួនបានដែរ។
ឥណ្ឌា និងចិន ធ្លាប់ប្រយុទ្ធគ្នាតាមព្រំដែននៅឆ្នាំ១៩៦២ ដែលកាលនោះ ឥណ្ឌារងបរាជ័យធ្ងន់ករហូតបាត់បង់ទឹកដីមួយផ្នែកនៃតំបន់កាស្មៀរ។ កំណាត់ជាច្រើនព្រំដែនចិន និងឥណ្ឌា ដែលមានប្រវែងជាង៣៥០០គីឡូម៉ែត្រ មិនទាន់ត្រូវបានកំណត់ជាផ្លូវការ ដែលនេះជាចំណុចនាំឲ្យមានការប៉ះទង្គិចគ្នាជារឿយៗ៕
Tag:
រុស្ស៊ី
ចិន
ឥណ្ឌា
© រក្សាសិទ្ធិដោយ thmeythmey.com
